Eendombwedi daJehova odi na ko nasha filufilu novaitaveli vakwao. (1 Petrus 2:17) Vahapu vomufye ohatu kala tu udite ngaashi omumwameme Tannis wokoKenya. Okwa ti: “Ondi hole okushiiva osho tashi ningilwa ovamwatate novamwameme mounyuni aushe.” Tannis nosho yo Eendombwedi dikwao omamiliyona ohadi shiiva ngahelipi osho tashi ningwa po? Okudja mo 2013, otwa dula oku shi shiiva okupitila kOnhele yEenghundana kepandja letu, ko jw.org.

 Konhele yEenghundana ohaku kala eelaporta di shii okulineekelwa di na sha noikundafanwa kombinga yEendombwedi daJehova, ngaashi okupitifwa kwEembiibeli, oilonga yokuyandja oikwafa, oilonga yokutunga nosho yo oiningwanima ya fimana. Ohaku kala ovamwatate novamwameme ovo va tulwa modolongo omolweitavelo lavo. Konhele yEenghundana ohaku kala yo oimoniwa tai tu omukumo i na sha noikonga yokuudifa nosho yo Edimbuluko. Oolyelye hava ningi omapekapeko e na sha noitukulwa oyo yeenghundana, nohave i longekida ngahelipi?

 Onhele yEenghundana ohai unganekwa kOmbelewa yOuyelele waAveshe. Oshikando osho oshi li keembelewa da kula nohashi longo koshi yewiliko lOvaunganeki vOkomitiye yOlutuwiliki. Kombelewa yOuyelele waAveshe ohaku longo ovamwatate novamwameme ve dulife 100, vahapu vomuvo ohava longo ve li komaumbo, mwa kwatelwa ovashangi, ovapekapeki, ovafaneki nosho yo ovatoloki. Vamwe oilonga yavo okukwatafana novanambelewa vepangelo, ovashiivinawa, ovahongi nosho yo ovatoolinghundana. Ombelewa yOuyelele waAveshe ohai kwafelwa kOikondo i na sha nOmauyelele Aaveshe i dulife po 80 oyo i li koitaimbelewa mounyuni aushe.

 Ngeenge taku longekidwa eenghundana, Ombelewa yOuyelele waAveshe ohai longele kumwe nOshikondo shOmauyelele Aaveshe. Ovamwatate ohava tokola kutya ehokololo oli wa nokushiivifa, nohava va ningi omapekapeko e na sha naasho, nokwoongela ouyelele u shii okulineekelwa. Osho osha kwatela mo okuninga omapulapulo nosho yo okupopya naavo ve na owino. Konima eshi va ongela ouyelele u li mondjila, ohava shange oshitukulwa osho, have shi wa peke, have shi leshulula, have shi tula omafano noku shi tumina kOvaunganeki vOkomitiye, opo shi ka pewe ediminino.

 Ovaitaveli vakwetu ove udite ngahelipi shi na sha nOnhele yEenghundana? Cheryl, wokoPhilippines, okwa ti: “Ondi hole neenghono okuhovela efiku lange nokulesha eenghundana di na sha nehangano laJehova nosho yo oshiwana shaye.”

 Ovaleshi vahapu ova popya eyooloko olo li li pokati kOnhele yEenghudana doko jw.org noikundaneki ikwao. Tatiana, wokoKazakhstan, okwa ti: “Ohandi pandula eshi handi dulu okulineekela eenghundana doko jw.org. Odi shii okulineekelwa nodi li paushili.” Omumwameme wokoMexico, wedina Alma, okwa ti: “Okuyelekanifa neenghundana dii odo hatu udu koikundaneki, Onhele yEenghundana oi li etwomukumo.”

 Onhele yEenghundana kai fi ashike okulineekelwa, ndele ohai pameke yo eitavelo. Bernard, wokoKenya, okwa ti: “Onhele yEenghundana oya kwafela nge, opo ndi tale ko ovamwatate novamwameme mounyuni aushe ve li oukwaneumbo wange, kashi na nee mbudi kutya ove li peni. Ohandi dulu okutumbula omadina avo nokupopya kondadalunde eenghalo davo momailikano ange.” Omumwameme Bybron, naye wokoKenya, okwa ti: “Ohandi kala alushe nda hafa, ngeenge nda mono oshitukulwa shi na sha nokupitifwa kwOmbiibeli melaka limwe! Oitukulwa oyo ohai dimbulukifa nge kutya Jehova ke na okatongo.”

 Nokuli nomahokololo e na sha novamwatate ovo tava hepekwa otaa dulu oku tu twa omukumo. Jackline, wokoKenya, okwa ti: “Okudiladila kouladi wavo osha pameka lela eitavelo lange. Alushe ohandi tale osho tashi va kwafele ve lididimike. Onde lihonga nghee oinima yanafangwa ngaashi eilikano, okulesha Ombiibeli nokwiimba haku dana onghandangala ya fimana mokupameka ovamwatate.”

 Omumwameme wokoCosta Rica, wedina Beatriz, okwa pandula eenghundana di na sha noiponga yopaushitwe. Okwa ti: “Onhele yEenghundana oya kwafela nge ndi mone nghee ehangano hali wanifa po eemhumbwe dovamwatate meendelelo, monghedi tai pondola noyopahole. Osho sha tomha nge kutya eli ehangano laJehova.”

 Inatu pandula tuu eshi hatu mono eenghundana di li pefimbo di na sha noumwainafana wetu womounyuni aushe! Osho itashi shiiva nopehe na omayambidido eni oilonga yomounyuni aushe, oo mahapu ha yandjwa okupitila ko-donate.dan124.com. Tangi komayambidido eni ehalo liwa.