Omapangelo mahapu mounyuni okwa tula po eendjidikila dokulikala kokule nosho yo okuhaongalo pamwe. Eendombwedi daJehova oda tokola toko okudulika komapangelo, nopefimbo opo tuu opo otadi twikile okwoongala pamwe nopehe na okutula eemwenyo moshiponga. Opo di dule okuninga ngaho, omaongalo okwa kala taa ongala pavidio taa longifa o-Zoom.

 Opo tu dule okukala hatu ongala pandjikilile, Olutuwiliki ola pitika opo omayambidido a longifwe okulandela omaongalo eeakaunda ko-Zoom. Osho osha kwafela neenghono omaongalo amwe oo a li itaa dulu okufutila eeakaunda da tya ngaho, molwaashi oakaunda imwe oi na okufutilwa komwedi eedola 250.65-334.20 lwaapo ile shi dulife. Omolwokuhenanghee, omaongalo okwa kala haa longifa ee-app doshali odo tadi dulu ashike okukwatakanifa omuvalu wa ngabekwa ile inadi amenwa. Omaongalo aeshe oo haa longifa eeakaunda do-Zoom odo hadi futilwa kehangano ohaa mono ouwa, molwaashi ova amenwa nomuvalu wovanhu ovo tava dulu okukwatakanifwa inau ngabekwa. Fiyo opapa, omaongalo e dulife 65 000, moilongo 170, otaa longifa eeakaunda odo.

 Eongalo laKairagi muManado, muNorth Sulawesi shaIndonesia, ola li la efa po okulongifa ee-app doshali nokuhovela okulongifa eeakaunda dehangano ko-Zoom. Omumwatate Hadi Santoso okwa ti: “Nokuli novamwatate novamwameme ovo vehe shii okulongifa nawa oikwaelektronika yavo otava dulu okuhafela okwoongala paife, molwaashi paife inava pumbwa okukala tava loginga mo lwoikando pefimbo lokwoongala.”

 Lester Jijón, Jr., omukulunhuongalo wokeongalo laGuayacanes Oeste moGuayaquil shaEcuador, okwa ti: “Omolwouxupilo tau kande omapunya, ngeno ovamwatate novamwameme vahapu momaongalo amwe inava dula okufutila oakaunda yo-Zoom opo eongalo alishe li dule okwoongala pamwe. Ashike paife omolwehangano, otu na eeakaunda do-Zoom odo tadi tu pitike tu ongale momuvalu munene nopehe na okutila kutya ohatu umbwa mo konima yeeminute donhumba.”

 Johnson Mwanza, omukulunhuongalo meongalo laNgwerere muLusaka shaZambia, okwa shanga a ti: “Ovamwatate novamwameme vahapu ova kala nokupopya kutya, ‘elongekido lehangano li na sha nokulongifa o-Zoom inali tu ningifa ashike tu kale twa hangana novamwatate novamwameme, ndele otu udite kutya Jehova oku tu hole noku na ko nasha nafye.’”

 Eeakaunda dehangano otadi futilwa nomayambidido oo a li a nuninwa okukwafela ngeenge pa holoka oiponga yopaushitwe. Omayambidido a tya ngaho okwa yandjwa nehalo liwa omolwoilonga yomounyuni aushe. Omayambidido mahapu oo okwa yandjwa okupitila ko donate.dan124.com. Otwa pandula unene omolwomayambidido eni, oo haa longifwa yo mokuyandja oikwafa mounyuni aushe. — 2 Ovakorinto 8:14.