Ongula yOmaandaxa yomafiku 10 Oktoba 2022, Russia okwa li a umba Ukraine neemisaela konima yomafiku avali, eshi Ukraine a hanauna po onhopa ya fimana oyo ya kwatakanifa Crimea naRussia. Oiningwanima oyo oya ningifa ovanapolotika va yandje elondwelo kutya Armagedon ote uya mafiku.

•   Omupresidende wa U.S. Joe Biden, okwa popya mo 6 Oktoba 2022 a ti: “Paife otwa ehena popepi naArmagedon okudja eshi [omupresidende wa U.S. John F.] Kennedy naCuba ve li momhumbwe yeemisaela. . . . Kandi shii ngeenge ohatu ka dula okulongifa oilwifo yolute nopehe na okweetifa Armagedon.”

•   Omupresidende waUkraine, Volodymyr Zelensky, eshi a pulwa keenghundana do-BBC mo 8 Oktoba 2022 kombinga yoilanduliko oyo tai etifwa kokulongifa oilwifo yolute, okwa ti: “Onda dimina kutya eshi oArmagedon, notashi ka tula moshiponga ombada yedu alishe.”

 Mbela okulongifa oilwifo yolute oko taku etifa Armagedon? Ombiibeli otai ti ngahelipi?

 Ahawe. Oshitya “Armagedon” osha tumbulwa mOmbiibeli lumwe aluke notashi hangwa mEhololo 16:16. Inashi yukifwa koita oyo i li pokati koiwana, ndele oita pokati kaKalunga “neehamba adishe dokombada yedu.” (Ehololo 16:14) Kalunga ota ka longifa oita yaArmagedon, opo a xulife po omapangelo aeshe opanhu. — Daniel 2:44.

 Opo u lihonge shihapu nghee Armagedon ta ka kuma edu, lesha oshitukulwa Oita yaArmagedon oshike?

 Ahawe. Nonande ovapangeli vopanhu otava ka longifa oilwifo yolute monakwiiwa, Kalunga ita ka efa edu li hanaunwe po. Ombiibeli oya ti:

•   ‘Edu otali kala po fiyo alushe.’ — Omuudifi 1:4.

•   “Ovayuki, vo otava ka fyuulula edu, ndele tava kala mo alushe.” — Epsalme 37:29.

 Ashike omaxunganeko Ombiibeli nosho yo oiningwanima oyo tai ningwa paife otai ulike kutya otu li pefimbo lididilikwedi mondjokonona yovanhu. (Mateus 24:3-7; 2 Timoteus 3:1-5) Opo u mone kutya Ombiibeli otai ti ngahelipi kombinga yonakwiiwa, kwatafana nafye, u konakone Ombiibeli oshali.