قاسيەتتى بولۋ دەگەن نەنى بىلدىرەدى؟
كيەلى كىتاپتىڭ جاۋابى
قاسيەتتى نە كيەلى بولۋ دەگەن بويدى ارام نارسەلەردەن اۋلاق ۇستاۋعا نۇسقايدى. «كيەلى، قاسيەتتى» دەپ اۋدارىلعان ەۆرەي ٴسوزى «بولەكتەپ الۋ» دەگەن ماعىنانى بەرەدى. كيەلى نارسەلەر تازا ٵرى كىرشىكسىز بولعاندىقتان، كادىمگى قولدانىستان بولىنەدى نە قاسيەتتى دەپ قاراستىرىلادى.
قۇداي — ەڭ كيەلى تۇلعا. كيەلى كىتاپتا: «ەحوباداي a كيەلى ەشكىم جوق»،— دەلىنگەن (سامۋيلدىڭ 1-جازباسى 2:2). سوندىقتان نەنىڭ كيەلى ەكەنىن شەشۋگە قۇداي عانا قۇقىلى.
«كيەلى» دەگەن ٴسوز قۇدايعا تىكەلەي قاتىسى بار كەز كەلگەن نارسەگە، اسىرەسە تەك قانا عيبادات ەتۋ ٷشىن قولدانىلاتىن نارسەلەرگە، قاتىستى ايتىلۋى مۇمكىن. مىسالى:
كيەلى جەرلەر: قۇداي ورتەنىپ جاتقان بۇتانىڭ قاسىندا تۇرعان مۇسا پايعامبارعا: «سەن تۇرعان جەر كيەلى»،— دەگەن (مۇسانىڭ 2-جازباسى 3:2—5).
قاسيەتتى وقيعالار: ەجەلدە قۇدايدىڭ حالقى «قاسيەتتى جيىن» دەپ اتالاتىن ٴدىني مەيرامداردا ەحوباعا عيبادات ەتكەن (مۇسانىڭ 3-جازباسى 23:37).
كيەلى زاتتار: يەرۋساليمدەگى ەجەلگى عيباداتحانادا قۇدايعا عيبادات ەتۋ ٷشىن قولدانىلعان زاتتار «كيەلى بۇيىمدار» دەپ اتالعان (پاتشالار 1-جازبا 8:4). مۇنداي كيەلى زاتتار ۇلكەن قۇرمەتپەن قولدانىلاتىن. ٴبىراق ولارعا مۇلدەم تابىنۋعا بولمايتىن b.
كۇناكار پەندە قاسيەتتى بولا الا ما؟
ٴيا. قۇداي ٶز قىزمەتشىلەرىنە: «كيەلى بولىڭدار، سەبەبى مەن كيەلىمىن»،— دەگەن (پەتىردىڭ 1-حاتى 1:16). ارينە، كەمەلسىز ادام ەشقاشان قۇدايدىڭ كەمەلدى كيەلىلىگىنە ساي بولا المايدى. ٴبىراق ٶزىنىڭ ٵدىل زاڭدارىنا مويىنسۇناتىن ادامدى قۇداي «قاسيەتتى» دەپ قاراستىرادى (ريمدىكتەرگە 12:1). قاسيەتتى بولۋعا ۇمتىلاتىن ادام مۇنى سوزىمەن، ىسىمەن كورسەتەدى. مىسالى، مۇنداي ادام قۇداي سوزىندەگى «قاسيەتتى بولىڭدار»، «ازعىندىقتان اۋلاق بولىڭدار» جانە «بارلىق ٸس-ارەكەتتەرىڭدە كيەلى بولىڭدار» دەگەن سوزدەرگە قۇلاق اسادى (سالونيكالىقتارعا 1-حات 4:3؛ پەتىردىڭ 1-حاتى 1:15).
ادام قۇدايدىڭ الدىندا بۇدان بىلاي قاسيەتتى سانالماي قالۋى مۇمكىن بە؟
ٴيا. ەگەر ادام قۇدايدىڭ ٴجۇرىس-تۇرىسقا قاتىستى تالاپتارىن ۇستانباي كەتسە، قۇداي ونى بۇدان بىلاي قاسيەتتى دەپ سانامايدى. مىسالى، كيەلى جازبالارداعى ەۆرەيلەرگە دەگەن كىتاپ «قاسيەتتى باۋىرلاستارعا» ارناپ جازىلعان. ٴبىراق ولارعا: «ٴتىرى قۇدايدان الىستاپ، جۇرەكتەرىڭ زۇلىم ٵرى سەنىمنەن ادا بولىپ جۇرمەسىن»،— دەگەن ەسكەرتۋ جاسالعان (ەۆرەيلەرگە 3:1، 12).
قاسيەتتى بولۋعا قاتىستى قاتە پىكىرلەر
قاتە پىكىر: ادام ٶزىن-ٶزى شەكتەۋ ارقىلى قاسيەتتى بولا الادى.
شىندىق: كيەلى كىتاپتا «تىم كوپ شەكتەۋلەرمەن ٴتاندى قالجىراتۋدىڭ» قۇدايدىڭ الدىندا «ەش پايداسى جوق» ەكەنى ايتىلعان (قولوستىقتارعا 2:23). كەرىسىنشە، قۇداي ٴبىزدىڭ جاقسى نارسەلەردىڭ يگىلىگىن كورگەنىمىزدى قالايدى. ونىڭ كيەلى سوزىندە: «ٵربىر ادام ٸشىپ-جەپ، ەڭبەگىنىڭ جەمىسىنە قۋانسىن. بۇل — قۇدايدىڭ سيى»،— دەلىنگەن (ۋاعىزداۋشى 3:13).
قاتە پىكىر: نەكە مەن جىنىستىق قاتىناستان باس تارتۋ (سەليبات) ادامدى قاسيەتتى ەتەدى.
شىندىق: نەكەگە تۇرۋدان باس تارتقان ٴماسىحشى جىنىستىق قاتىناسقا تۇسپەگەنى ٷشىن عانا قۇدايدىڭ الدىندا قاسيەتتى بولىپ كەتپەيدى. راس، بويداق بولىپ جۇرگەن ادام الاڭداماي قۇدايعا عيبادات ەتە الادى (قورىنتتىقتارعا 1-حات 7:32—34). ٴبىراق كيەلى كىتاپتان نەكەگە تۇرعان ادامداردىڭ دا قاسيەتتى بولا الاتىنىن كورۋگە بولادى. مىسالى، يسانىڭ پەتىر دەگەن ەلشىسى ۇيلەنگەن ادام بولعان (ماتاي 8:14؛ قورىنتتىقتارعا 1-حات 9:5).
a ەحوبا — قۇدايدىڭ جەكە ەسىمى. كيەلى كىتاپتىڭ جۇزدەگەن تارماقتارىندا بۇل ەسىم «كيەلى» جانە «كيەلىلىك» دەگەن سوزدەرمەن قاتار قولدانىلادى.
b كيەلى كىتاپتا ٴدىني بۇيىمدارعا تابىنۋ ايىپتالادى (قورىنتتىقتارعا 1-حات 10:14).
قىزىقتى بولار مالىمەتتەر
كيەلى كىتاپتىڭ ماڭىزدى تالىمدەرى
مۇسىنگە تابىنۋدى قۇداي ماقۇلداي ما؟
ولار ٴبىزدى كوزگە كورىنبەيتىن قۇدايعا جاقىنداتا الا ما؟
ٴبىز جونىندە
ەحوبا كۋاگەرلەرىنىڭ كەلۋىن ٶتىنۋ
كيەلى كىتاپقا قاتىستى سۇراقتارىڭىزدىڭ جاۋابىن الىڭىز نەمەسە ەحوبا كۋاگەرلەرى جايلى كوبىرەك ٴبىلىڭىز.