كيەلى كىتاپتا ٶز-ٶزىمىزدى جاقسى كورۋگە قاتىستى نە دەلىنگەن؟
كيەلى كىتاپتىڭ جاۋابى
كيەلى كىتاپتا ٶز-ٶزىمىزدى لايىقتى شامادا جاقسى كورگەنىمىز دۇرىس، ٴتىپتى قاجەت ەكەنى ايتىلعان. مۇنداي سۇيىسپەنشىلىككە ٶز قامىمىزدى ويلاۋ، ٶز-ٶزىمدى قۇرمەتتەۋ جانە قادىرلەۋ جاتادى (ماتاي 10:31). كيەلى كىتاپ وزىمشىلدىكتى قۇپتامايدى، ٴبىراق ٶزىمىزدى ورىندى تۇردە جاقسى كورۋگە تالپىندىرادى.
ەڭ الدىمەن كىمدەردى جاقسى كورۋىمىز كەرەك؟
قۇدايعا دەگەن سۇيىسپەنشىلىك جۇرەگىمىزدىڭ تورىنەن ورىن الۋ كەرەك. كيەلى كىتاپتاعى «قۇدايىڭ ەحوبانى بار جۇرەگىڭمەن... ٴسۇي» دەگەن وسيەت ەڭ باستى وسيەت بولىپ تابىلادى (مارقا 12:28—30؛ مۇسانىڭ 5-جازباسى 6:5).
ال ەكىنشى باستى وسيەت مىنانداي: «وزگە ادامدى ٶزىڭدى سۇيگەندەي ٴسۇي» (مارقا 12:31؛ مۇسانىڭ 3-جازباسى 19:18).
كيەلى كىتاپتا ٶزىمىزدى جاقسى كورۋگە قاتىستى ناقتى وسيەت جوق. الايدا «وزگە ادامدى ٶزىڭدى سۇيگەندەي ٴسۇي» دەگەن وسيەتتەن ٶزىمىزدى ورىندى تۇردە جاقسى كورىپ، قۇرمەتتەگەنىمىز كادىمگى نارسە ٵرى پايدالى ەكەنىن كورەمىز.
يسا ەڭ الدىمەن كىمدەردى جاقسى كورگەن؟
يسا قۇدايعا، ادامدارعا جانە وزىنە دەگەن سۇيىسپەنشىلىكتى ٶز ورنىمەن تانىتقان. ول شاكىرتتەرىن ٶز ۇلگىسىنە ەلىكتەۋگە شاقىرعان (جوحان 13:34، 35).
يسا ٴبىرىنشى كەزەكتە ەحوبا قۇدايدى جاقسى كورگەن ٵرى ونىڭ تاپسىرعان ٸسىن ورىنداۋعا بار ٶمىرىن ارناعان. ول: «اكەمدى جاقسى كورەتىنىمدى وسى دۇنيە ٴبىلسىن دەپ، اكەم نەنى وسيەت ەتسە، سونى ورىندايمىن»،— دەگەن (جوحان 14:31).
يسا ادامداردى جاقسى كورەتىنىن ولاردىڭ قامىن ويلاۋ ارقىلى كورسەتكەن. ٴتىپتى ولار ٷشىن ٶز ٶمىرىن قيعان (ماتاي 20:28).
يسا ٶزىن جاقسى كورەتىنىن كورسەتىپ، تىنىعۋعا، تاماقتانۋعا ۋاقىت بولگەن، ىزباسارلارىمەن ٵرى شاكىرتى بولعىسى كەلەتىندەرمەن ارالاسۋدى ۇناتقان (مارقا 6:31، 32؛ لۇقا 5:29؛ جوحان 2:1، 2؛ 12:2).
وزگەلەردى وزىمىزدەن ارتىق جاقسى كورگەنىمىز قۋانىشتان ايىرىپ، قادىرىمىزدى تۇسىرە مە؟
جوق، ويتكەنى ٴبىز قۇدايعا ۇقساس ەتىپ جاراتىلعانبىز. ال ونىڭ ەڭ باستى قاسيەتى — رياسىز سۇيىسپەنشىلىك (مۇسانىڭ 1-جازباسى 1:27؛ جوحاننىڭ 1-حاتى 4:8). بۇل ٴبىز باسقالاردى جاقسى كورەتىندەي ەتىپ جاراتىلعانىمىزدى بىلدىرەدى. ارينە، ٶزىمىزدى ورىندى تۇردە جاقسى كورۋىمىز كەرەك. ٴبىراق ەڭ الدىمەن قۇدايدى جاقسى كورسەك جانە باسقالارعا جاقسىلىق جاساساق، ٶزىمىزدى باقىتتىراق سەزىنەمىز. كيەلى كىتاپتا: «العاننان گورى بەرگەن باقىتتى»،— دەلىنگەن (ەلشىلەردىڭ ىستەرى 20:35).
بۇگىندە كوپ ادام ٴبىرىنشى كەزەكتە ٶزىن ويلايتىن ادام باقىتتى دەپ ەسەپتەيدى. ولار «وزگەلەردى جاقسى كور» دەگەن سوزدەردى «ٶزىڭدى ٴسۇي» دەگەن سوزدەرگە الماستىرىپ العان. الايدا بۇگىنگى جاعدايلاردان كورىنەتىندەي، كيەلى كىتاپتاعى «اركىم ٶزىنىڭ ەمەس، وزگەنىڭ يگىلىگىن ويلاسىن» دەگەن كەڭەسكە ساي جۇرەتىن ادام باقىتتى ٵرى دەنساۋلىعى جاقسى بولادى (قورىنتتىقتارعا 1-حات 10:24).