“Nunarsuaq tamakkerlugu arnat nakuuserfigineqar­tarnerat nalinginnaavoq. Nappaatitut tuniluuttutut immat iliuuseqarfiginissaa pingaaruteqarluinnarpoq.” Taama WHO (Nunarsuaq tamakkerlugu peqqinnissamik suliniaqatigiiffik) nalunaaruteqarpoq. Peqatigiiffiup tamatuma nalilerpaa “arnat aappaqarsimasut 30-procentii pallillugit timikkut atoqatigiin­nikkulluunniit aapparminnit nakuuserfigineqarsimasut”. Aamma 2020-mi FN-imiit nalunaarusiami missilior­neqarpoq nunarsuaq tamakkerlugu aapparminnit imaluunniit ilaquttaminnit allamit arnat 137-it ullormut toqunneqartartut. a

 Angerlarsimaffimmi persuttaasarnerit annertussusaat kisitsisitigut takussutis­siarineqaraluartoq eqqugaasut misigis­sutsikkut timikkullu naalliuutaat kisitsisilersor­neqarsin­naanngillat.

 Illit aapparisannit persuttar­neqartarpit? Imaluunniit taamatut pineqar­tartumik nalunngisaqarpit? Taamaappat siunnersuutit Biibilimeersut iluaqutigisin­naasatit ataanniittut maluginiakkit.

  Aappat nakuuser­tuuppat illit pisuunngilatit

  Ikiorneqarsin­naavutit

  Kisimiin­ngilatit

  Nakuuser­toqartarun­naassaaq

  Nakuuserfigineqartoq qanoq ikiorsinnaagit

 Biibilimi allassimavoq: “Tamatta iliuutsigut naapertorlugit Guutimit eqqartuun­neqassaagut.” – Romamiut 14:12.

 Eqqaamajuk: Persuttaasoq nammineq iliuutsiminut akisussaasuuvoq.

 Aappappit persuttaasar­nerminut illit pisuutippatit taanna kukkuvoq. Nuliaasoq asaneqar­tariaqarpoq, persuttar­neqarnani. – Kolossimiut 3:19.

 Ilaannikkut misigis­sutsikkut nappaateqarneq, meeraanermini perorsar­neqarneq imigassar­tornerluunniit persuttaasup iliuusiinut pissutaaqataasin­naapput. Taamaak­kaluarpal­luunniit ilinnik pinnittar­nerminik Guutimut akisussaatin­neqassaaq. Pissusiminillu allannguinis­saminut akisussaasuuvoq.

 Biibilimi allassimavoq: ‘Amerlasuunik siunnersuisoqarsimagaangat pilersaarutit iluatsittarput.’ – Ussatit 15:22.

 Eqqaamajuk: Allat ikiorsin­naavaatsit toqqissisiman­ngikkuit imaluunniit nalugukku qanoq iliussanerlutit.

 Sooq allanit ikiorneqar­tariaqarsinnaavit? Aapparisamit persuttar­neqartarneq imaannaan­ngimmat. Qanoq anigussanerlugu aalajangiiniarninni uku nalileruminaatsis­sinnaavatit:

•   Illit isumannaassutsit

•   Qitornavit toqqissisimanissaat

•   Aningaasaqar­niarnerit

•   Aappannut asanninnerit

•   Aappat iliuutsiminik allannguisin­naassappat aappariin­nissinnik kipititserusun­nginnerit

 Paatsiveeruteq­qasutut misigiguit paasinarpoq. Kimut ikiortis­sarsiorsinnaavit?

 Ikinngutippit ilaquttap­pilluunniit tatigisappit immaqa ikiorsin­naallutillu misigis­sutsikkut tapersersorsin­naavaatit. Ilinnik ilisarisiman­nilluartumik isumassuisumillu oqaloqateqarneq iluaqutaangaarsinnaavoq.

 Aapparisamit persuttar­neqartunut ikiortis­sarsior­tarfiit saaffigisin­naavatit. Imminut illersor­niarlutit qanoq iliorsin­naasutit ikiortis­sarsior­tarfinni sulisut ikiorsin­naavaatsit. Aappat ajornar­torsiutiminik nassuerutigin­nikkuni ilumoorlunilu allannguerusukkuni ikiortis­sarsior­tarfimmit alloriar­nissaminut ikiorneqarsinnaavoq.

 Ikiuinissamik ilinniarsimasut allat – soorlu nakorsat peqqissaasullu – ulorianar­torsioruit ikiorsin­naavaatsit.

 Biibilimi allassimavoq: “Naalakkap qanippai sequmis­simasumik uummatillit, annaattarpai aserortersimasumik anersaallit.” – Tussiaat 34:19.

 Eqqaamajuk: Guutip ikiorniarlutit neriorsorpaatit.

 Jehovap b isumassorusungaarpaatit. (Petrusimit 1. 5:7) Eqqarsaatitit misigis­sutsitillu tamaasa paasisinnaavai. Oqaatsini, Biibili, aqqutigalugu tuppallersarsin­naavaatit. Aamma imminut qinusaq­quaatit. Pissutsit atukkatit pillugit ilisimas­suseqaq­qullutit nukissaqaq­qullutillu qinnuigisinnaavat. – Esaja 41:10.

 Biibilimi allassimavoq: “Tamarmik eqqissillutik inuussapput viinnequtaatimik orpiutimillu figenillit ataanni kimilluunniit annilaar­tinneqaratik.” – Mika 4:4, Testamentitoqaq 1990-imi naqitigaq.

 Eqqaamajuk: Biibilimi neriorsuutigineqarpoq angerlarsimaffiit qanittukkut tamanut eqqissisimanar­tuussasut.

 Jehovap Guutip kisiartaalluni ajornar­torsiutigut tamaasa ataavartumik aaqqissinnaavai. Biibilimi neriorsuutigineqarpoq: “Qulliillu tamaasa isaannit allartissavai. Aamma toqu, aliasunneq, nillianeq anniarnerlu atuukkun­naassapput.” (Saqqummersitat 21:4) Taamanik­kussamut maanna eqqaamasat nuanniitsut nuannersunik taarser­neqassapput. (Esaja 65:17) Tassa siunissaq nuanningaartoq Biibilip ilinnut neriuutigititaa.