Kina pisuua?
Naalliuutit Guutimit pisuunngippata, kaannersuit, piitsuujuarneq, sorsunnerit, nappaatit innarluuteqalissutaasut pinngortitamilu ajunaarnersuit sumik pissuteqarpat? Biibilimi naalliuutinut pissutaanerpaasut pingasut ersersinneqarput:
Namminissarsiorneq, piumatuneq uumissuinerlu. “Inuit ilaat ataaseq inoqatiminut ajoqutaasumik pissaaneqarpallaartarpoq.” (Oqaluussisartup oqaasii 8:9) Inuit naalliuttarput allat naammalluinnanngissutaat, namminissarsiortuunerat naakkittaanneralluunniit pissutigalugu.
Nalaatsornikkut pisut. ‘Nalaatsornertigut pisartut’ inuit naalliuutaannut pissutaasarput. (Oqaluussisartup oqaasii 9:11, Testamentitoqaq 1990-imi naqitigaq) Tassa nalaatsornikkut ajutoorneq ajunaarnerlu inuilluunniit mianersuaalliornerat kukkussuteqarneralluunniit pissutaasarput.
Silarsuarmik naalakkersuisoq ajortoq. Biibilimi inuit naaliuutaannut pisuunerpaasup kinaanera erseqqissarneqarpoq. Allassimavoq Ajortup silarsuaq aqukkaa. (1 Johannesi 5:19) ‘Ajortoq’ taanna tassaavoq Saatani Diaavulu aallaqqaammut tassaasoq Guutip inngiliisa ilaat ‘sallusuissummilli aalajangiussinngitsoq’. (Johannesi 8:44, tastamantitâĸ 1961-imi naqitigaq) Anersaat pinngortitat allat namminissarsiorlutik Saatani Guutimut pikitsitseqatigaat, taamaalillutillu anersaapilunngorput. (1 Mosesi 6:1-5) Saatanip anersaapiluillu pikitsitsigamilli silarsuaq naakkittaatsumik sunniuteqarfigingaarsimavaat. Ingammik nalitsinni taamaappoq. Maanna Diaavulu kamangaarluni ‘silarsuarmik tamarmik tammartitsiniarpoq’, tamatumalu kingunerisaanik nunami erloqinartorpassuaqarpoq. (Saqqummersitat 12:9, 12) Aap, Saatani kisermaassilluni naalakkersuisuuvoq naakkittaatsoq. Inuit naalliunnerat nalerisimaarutigaa. Inuit naalliunnerannut Saatani pisuuvoq – Guuti pisuunani.
UNA EQQARSAATIGIUK: Naakkittaallunilu ajorluinnartuusup kisimi inuit pisuussuteqanngitsut naalliutsissinnaavai. Akerlianilli Biibilimi ima allassimavoq: ‘Guuti tassaavoq asanninneq.’ (1 Johannesi 4:8) Asannittuunerminut naapertuuttumik “Guuti ajortumik iliunngisaannarpoq, Ajugaqanngitsoq peqquserluttumik iliorneq ajorpoq”. – Jobi 34:10.
Imali eqqarsarsinnaavutit: ‘Guutip Ajugaqanngitsup qanoq sivisutigisumik Saatanip naalakkersuinera amiilaarnartoq akuerissavaa?’ Paaseriikkatsitut Guutip ajussuseq maajugaa uagullu anniaativut anniaatigingaarlugit. Aammami ima kajumissaarneqarpugut: ‘Isumakuluutisi tamaasa taassumunnga pisissigit isumassormasi.’ (1 Petrusi 5:7) Guutip asagamisigut naalliuutinillu naapertuilluanngitsuliornernillu atorunnaarsitsinissaminut pissaaneqarami qanittukkut taamaaliussaaq, tamannalu allaaserisami tulliuttumi nassuiarneqarpoq. *
^ par. 7 Sooq Guutip naalliunnartoqarnera akuerineraa sukumiisumik paasisaqarfigiumallugu takuuk: Atuakkami Biibilimi sorpiaat ajoqersuutigineqarpat?-mi kapitali 11. Jehovap Nalunaajaasuinit saqqummersinneqartoq, www.dan124.com-imilu akeqanngitsumik aaneqarsinnaasoq.