Anersaakkut ittunik sammisaqartarnikkut nukissaqaleqqittarit

“Nammaatara ilissinnut pisissiuk . . . ; taava qasuerfissarsiumaarpusi tarnissinnut [tarnissigullu nukissaqalissaasi, NV].” — MATTHÆUSI 11:29.

1. Guutip qaqqap Sinajip eqqaani suna isumagaa, aamma sooq?

INATSISIT tunngavigalugit angeruseq qaqqap Sinajip eqqaani angeruserineqalermat angerutsimut ilaavoq sabbati pillugu aalajangersagaq. Jehovap oqaaseqartartuni Mosesi aqqutigalugu Israelikkut ima peqquai: “Ulluni arfinilinni suliassatit suliarissavatit, ullulli arfineq-aappaat sulinngiffigissavat ussiutit siutituujutillu inussiaativillu arnap ernera takornartarlu qasuersaaqqullugit.” (2 Mosesi 23:12) Aap, Mosesip inatsisaanik maleruaasussanut soqutigittarluni Jehovap innuttami ‘qasuersaarfeqarnissaat’ asannilluni isumagaa taakku nukissaqaleqqeqqullugit.

2. Israelikkut sabbatisiortarnertik qanoq iluaqutigaat?

² Sabbati ulloq qasuersaarfiinnaava? Naagga, Israelikkut guutisiornerannut ilaavoq pingaarutilik. Sabbatimi ilaqutariinni ittuusut ilaquttaminnik ilinniartitsinissaminnut piffissaqartarput, taakkua ‘naapertuilluartumik iliorlutik Jehovap aqqutigeqqusaanik maleruaanissartik’ ilinniarniassammassuk. (1 Mosesi 18:19) Aamma sabbati ilaqutariit taakkualu ikinngutaasa Jehovap suliaanik eqqarsaatiginninnissamut peqatigiinnerminnillu nuannaarutiginninnissamut periarfissaqalissutigaat. (Esaja 58:13, 14; aamma takuuk nutsigaq 1990-imeersoq) Suli pingaaruteqarnerusoq tassaavoq sabbatip piffissamut Kristusip ukiuni tusindini naalakkersuineratigut nukissaqaliviffiusussamut siulittuutaanera. (Romamiut 8:21) Ullumikkummi? Kristumiut ilumoortut, Jehovap iluarisaatut iliornissamik soqutiginnittut, sumi qanorlu ilillutik nukissaqaleqqissinnaappat?

Kristumiunik allanik peqateqartarnikkut nukissaqaleqqittarit

3. Ukiuni hundredelinni siullerni kristumiut imminnut qanoq ilillutik nakussatseqatigiittarpat, qanorlu kinguneqartarpa?

³ Apustilip Paulusip ilagiit kristumiut ‘sallusuissutip sukaralugulu tunngavigisaatut’ eqqartorpai. (1 Timotheusi 3:15) Kristumiut siulliit asannillutik kajumissaaqatigiinnertik ineriartorteqatigiinnertillu nakussatsissutigisarpaat. (Efesosimiut 4:11, 12, 16) Paulusi Efesosimiitilluni qatanngutinit Korinthimi ilagiinneersunit qiimmassaataasumik pulaarneqarpoq. Maluginiaruk tamanna Paulusimut qanoq sunniuteqartoq: ‘Tipaatsuppunga Stiiffanap Fortunaatusillu Akaakusillu najormannga; uangami anersaara inuummarissarpaat.’ (1 Korinthimiut 16:17, 18, 1936) Titusi qatanngutit Korinthimiittut kiffartuunniarlugit Korinthimeereermat, Paulusip tamatumunnga assingusumik ilagiit taakku ima allaffigai: ‘Tamassinnit anersaamigut inuummarissagaavoq.’ (2 Korinthimiut 7:13, 1936) Ullumikkuttaaq Jehovap Nalunaajaasui kristumiunik allanik ineriartornartumik peqateqartarnermikkut nukissaqaleqqittarput.

4. Ilagiit ataatsimiinnerini qanoq ililluta nukissaqaleqqittarpugut?

⁴ Misigisartakkatsinnit nalunngilarput ilagiit ataatsimiinneri nuannaarutaangaartartut, ataatsimiinnernimi ‘upperisaqaqatigiinnitsigut kajumissaaqatigiittarpugut’. (Romamiut 1:12) Qatanngutivut qarsupittumik ilisarisimasariinnanngilavut ilaannikkuinnaq ilagisartakkavut. Ikinngutigaavut ilumoortut, asallugillu ataqqivavut. Ataatsimiinnitsinni taakkuninnga aalajangersimasumik peqateqartarnerput nuannaarutigingaartarlugulu tuppallersaatigingaartarparput. — Fiilimuut 7.

5. Ataatsimeersuarnerni immitsinnut qanoq nakussatseqatigiissinnaavugut?

 ⁵ Aamma ataatsimeersuarnerni nukissaqaleqqittarpugut. Sallusuissutip ernganik inuunartumik Guutip oqaasianeersumik pisarnitta saniatigut katersuunnerni annerusuni taakkunani aamma ‘ammarnissatsinnut’, tassa ikinngutitaartornissamut, periarfissaqartarpugut. (2 Korinthimiut 6:12, 13) Taavami ittoortarutta allanillu oqaloqateqarnissaq ajornakusoortittarlugu? Qatanngutitsinnik ilisarisimannilerniarsinnaavugut ilaatigut ataatsimeersuarnerni nammineq kajumissutsimik suleqataanikkut. Qatanngut arnaq ataatsimeersuarnermi nunanit tamalaanit peqataaffigineqartumi ikiuutaareerluni ima oqaluttuarpoq: “Ilaquttama ikinnguterpaalummalu saniatigut ilisarisimasaqarpianngilanga. Asaasunulli ikiuutaagama qatannguterpassuit ilisarisimalerpakka. Nuannivippoq!”

6. Feeriaraangatta ilaatigut qanoq nukissaqaleqqittarsinnaavugut?

⁶ Israelikkut ukiup ataatsip ingerlanerani nalliuttorsiornerit pingasut nalliussiartorlugit Jerusalemiliartarput. (2 Mosesi 34:23) Amerlanertigut nunaatitik tuniniaavitilluunniit qimattariaqartarpaat aqqusinikkullu pujoralaqisukkut ulluni arlalinni pisuinnaq angalallutik. Naalaffiliaraangamilli tassanilu ‘Jehova unnersiutigalugu’ erinarsortut tusarnaaraangamikkit ‘nuannaangaartarput’. (2 Nalunaarsuutit 30:21) Taamatuttaaq ullumikkut Jehovap kiffaasa ilarpassuisa Betelimut, Jehovap Nalunaajaasuisa immikkoortortaqarfiannut, pulaarneq nuannersorujussuartut misigisarpaat. Ilissi ilaqutariittut tulliani feerialerussi taamatut pulaarsinnaassavisi?

7. (a) Ilaquttanik ikinngutinillu katerisimaaqateqarneq qanoq iluaqutaasarpa? (b) Qanoq ililluni ineriartornartumik nuannersutullu eqqaamasassamik katerisimaartoqartarpa?

⁷ Aamma qiimmassaataangaarsinnaavoq ilaquttanik ikinngutinillu katerisimaaqateqarneq. Kunngi Salomo silatooq ima allappoq: “Inummut pitsaanerusumik [pilluaatissaqanngilaq] kisianni nerinermik, imernermik nuannaarnermillu.” (Oqaluussisartup oqaasii 8:15) Taamatut katerisimaaraangatta nukissaqaleqqiinnarata aamma uppeqativut ilisarisimaneruleraangatsigit asaqatigiinnerulertarpugut. Nuannersumik ineriartornartumillu katerisimaassagaanni pitsaanerussaaq amerlavallaanngitsunik qaaqqusinissaq, susoqarnera malinnaavigineqarsinnaaniassammat. Tamanna ingammik pingaaruteqarpoq imigassallertoqartillugu.

Oqaluussineq nukissaqaleqqinnarpoq

8, 9. (a) Jiisusip tusarliussaa allakkanik ilisimasut farisiiarillu tusarliussaannit qanoq allaanerua? (b) Sallusuissutinik Biibilimiittunik allanut oqaluussissutiginninnerput qanoq iluaqutigisarparput?

⁸ Jiisusi oqaluussisartuuvoq aallussilluartoq, ajoqersukkanilu aamma taamaaqqullugit kajumissaartarpai. Tamanna oqaatsinit ilisimaneqarluartunit ukunannga erserpoq: “Katersugassat amerlaqaat sulisussalli ikittuinnaallutik. Taamaattumik katersuinermi naalagaasoq qinnuigisiuk katersuisussanik aallartitseqqullugu.” (Matthæusi 9:37, 38) Tusarliussaq Jiisusip oqaluussissutigisaa tusarnaartuisa nukissaqaleqqissutigivippaat. Tusarliussaa ‘iivangkiiliuuvoq’, tassa nutaarsiassaavoq nuannersoq. (Matthæusi 4:23; 24:14) Farisiiarit inunnut ersukkiussaannit oqimaatsunit allaanerulluinnarpoq. — Atuakkit Matthæusi 23:4, 23, 24.

⁹ Guutip naalagaaffianik tusarliussaq allanut oqaluussissutigigaangatsigu, taakku anersaakkut nakussatsittarpavut, tamannalu ilutigalugu sallusuissutit Biibilimiittut nammineq isummatsigut uummatitsigullu puiuikkiuttarpavut. Tussiaasiortoq eqqorluartumik ima allappoq: “Iluaqaaq Guuterput erinalimmik unnersiutigalugu, nuanneqaaq tusarnersumik unnersiutigissallugu.” (Tussiaat 147:1) Illit nuannaarnerulersinnaavit inunnut illit angalaarfigisartakkanniittunut Jehovamik unnersiutiginnittarnikkut?

10. Tusarliussatsinnut ajunngitsumik periartoqartarnera oqaluussinermi qanoq iluatsilluartiginitsinnut aalajangiisuua? Nassuiaruk.

¹⁰ Soorunami inuit angalaarfigisartakkat ilaanniittut inunnit angalaarfigisartakkani allaniittuninngarnit nutaarsiassaq nuannersoq pillugu tusarnaarumanerusarput. (Atuakkit Apustilit Suliaat 18:1, 5-8). Guutip naalagaaffianik tusarliussamik soqutiginnittoqarpianngiffiusumi najugaqaruit, taava oqaluussinermi naammassisatit isiginiarnerukkit. Eqqaamajuk Jehovap aqqanik oqaluussissutiginninniarlutit ilungersornitit  asuliinnaanngitsut. (1 Korinthimiut 15:58) Aamma eqqarsaatigiuk oqaluussinermi qanoq iluatsilluartigineq inuit qanoq periarnerat naapertorlugu naatsorsorneqarsinnaanngimmat. Qularutiginngilluinnarsinnaavarput eqqortuliorusuttut tusarliussamik isummerfiginninnissamut periarfissinneqarumaartut. — Johannesi 6:44.

Ilaqutariittut Jehovamik pallorfiginninneq nukissaqaleqqinnarpoq

11. Jehovap angajoqqaat sumik akisussaaffilerpai, akisussaaffitsillu tamanna qanoq isumagisinnaavaat?

¹¹ Angajoqqaat Guutimik mianerinnittut meeqqaminnik Jehova taassumalu aqqutigeqqusai pillugit ilinniartitsinissartik akisussaaffigaat. (5 Mosesi 11:18, 19) Meeraqaruit, taava taakkua Ataatatsinnik qilammiusumik ilisarisimannilernissaannut ikiornissaannut piffissamik immikkoortitsisarpit? Akisussaaffimmik angisuumik tamatuminnga ilaquttavillu pisariaqartitaannik isumaginninnissannut ikiorniarlutit Jehovap anersaakkut inuussutissanik ineriartornartunik — soorlu atuakkanik, atuagassianik, dvd-nik tusarnaagassianillu — naammangaartunik pilersorsimavaatigut.

12, 13. (a) Ilaqutariit unnuk ilaqutariittut anersaakkut ittunik sammisaqarfik qanoq iluaqutigisinnaavaat? (b) Angajoqqaat qanoq ilillutik qulakkeersinnaavaat unnuup ilaqutariittut pallorfiginneqatigiiffimmik nukissaqaleqqinnartuunissaa?

¹² Aamma inussiaq aalajaallunilu silatooq unnummik ilaqutariittut anersaakkut ittunik sammisaqarfiusussamik aallarniivoq. Unnuk taanna ilaqutariittut Biibilimik atuaqqissaaqatigiinnissamut sapaatit-akunneri tamaasa immikkoortinneqartarpoq. Ilaqutariippassuit paasisimavaat aaqqissuussaq tamanna asaqatigiinnerulissutigisimallugu Jehovamullu attaveqarluarnerulissutigisimallugu. Angajoqqaalli qanoq ilillutik qulakkeersinnaavaat unnuup ilaqutariittut pallorfiginneqatigiiffimmik anersaakkut ineriartornartuunissaa?

¹³ Unnuk ilaqutariittut anersaakkut ittunik sammisaqarfik pikkunaatsuussanngilaq. ‘Guutimi pilluartoq’ kiffartorfigaarput, taassumalu kissaatigaa nuannaarluta pallorfigissagitsinni. (1 Timotheusi 1:11; Filippimiut 4:4) Pilluaqqussutaangaarpoq unnuk taannattaaq sallusuissutinik anersaakkut ittunik naleqangaartunik Biibilimeersunik oqaloqatigiissuteqarfigisinnaagatsigu. Angajoqqaat ilinniartitsinerminni naleqqussarsinnaasariaqarput takorluuisinnaassusertillu isumassarseriallaqqissusertillu atorlugit. Assersuutigalugu ilaqutariit ernertik qulinik ukiulik, Brandon, “Sooq pulateriaarsuk Saatanimut assersuutitut atorneqarpa?”-mik qulequtalimmik saqqummiitippaat. Brandon apeqqut tamanna pillugu isumakuluttarsimavoq pulateriaarsuit alutorisaramigit taakkualu Saatanimut atassuserneqartarnerat eqqissiunnaarutigisarlugu. Ilaqutariit ilaat ilaannikkut Biibilimik tunngavilinnik isiginnaartitsissusiorsimapput tusarnaagassiaannaasumik ilaqutariinniittut oqaaserineqartunik Biibilimeersunik atuaasarlutik, isiginnaartitsissuteeraliortarsimallutilluunniit Biibilimi inuttaasuusaarlutik isiginnaartitsisarlutik. Ilinniartitseriaaseq tamanna nuanniinnarani aammali meeqqanik peqataatitsisarpoq taakkualu najoqqutassianik Biibilimiittunik qannartarpiaminni puiuikkiussinerannik kinguneqartarluni. *

Artorsaatissiisinnaasut pinaveersaakkit

14, 15. (a) Artorsarneq toqqissisimannginnerlu ulluni kingullerni makkunani qanoq ilillutik ingasatsikkaluttuinnarpat? (b) Qanoq allatut aamma tatineqartarpugut?

¹⁴ Artorsarneq toqqissisimannginnerlu pissutsit aaqqissuussaanerata ajortup matuma ulluini kingullerni ingasatsikkaluttuinnarput. Inuit millionillit suliffissaaleqillutillu aningaasatigut ajornartorsiorput. Suliffeqaraluartulluunniit misigisarput aningaasarsiatik “aningaasivinnut alinnikunut” pisartut ilaqutariinnullu immannguaannaq iluaqutaasartut. (Naleqqiuguk Haggaji 1:4-6). Politikerit innuttaaqatigiinnilu siuttut allat peqqarniisaarniarnernut ajortunullu allanut akiuunnerminni susinnaanngippasipput. Inuppassuit nikallungasarput nammineq kukkusarnitik pillugit. — Tussiaat 38:5.

¹⁵ Kristumiut ilumoortut aamma Saatanip silarsuaani ajortumi ajornartorsiutinit tatineqarnermillu  eqqugaasarput. (1 Johannesi 5:19) Ilaatigut suli tatineqarnerulertarput Jehovamut aalajaattuarniarsarigamik. Jiisusi ima oqarpoq: “Uanga qinugisimaguninnga ilississaaq qinugiumaarpaasi.” (Johannesi 15:20) Kisianni ‘qinugineqaraluaraangattaluunniit’, tassa malersorneqaraluaraangattaluunniit, ‘ilaginnaannagaaneq’ ajorpugut. (2 Korinthimiut 4:9) Sooq?

16. Suut nuannaartuarnissamut iluaqutigaavut?

¹⁶ Jiisusi ima oqarpoq: “Ornissinga tamassi suleruluttusi nanertugaasusilu, qasuertissavassi [nukissaqalerseqqissavassi, NV].” (Matthæusi 11:28) Jiisusip utertitsissutitut pilliutaanik upperinnilluinnarnitsigut inuunerput Jehovap assaanut tunniuttarparpullusooq. Taamaalilluta ‘pissaanermik asseqanngitsumik’ tunineqartarpugut. (2 Korinthimiut 4:7) ‘Ikiuisoq’ (NV), Guutip anersaava illernartoq, uppernitsigut ima nakussatsissutigitigisarparput misilinneqarnivut annikilliornivullu naammagalugit atorsinnaaginnarnagit, aammali nuannaartuarsinnaalluta. — Johannesi 14:26; Jaaku 1:2-4.

17, 18. (a) Anersaaq suna mianersorfigisariaqarparput? (b) Silarsuarmi matumani nuannaarutinik aliikkutassanillu pingaartitsivallaarneq qanoq kinguneqarsinnaava?

¹⁷ Kristumiut ilumoortut silarsuup matuma anersaavanit nuannaarniutileritusumit sunnertinnaveersaartariaqarput. (Atuakkit Efesosimiut 2:2-5). Taamaaliunngikkutta ‘uinngup pilerigisaanit, isit pilerigisaannit nunallu piinik usorsisimaaruteqarnermit’ napitinneqarsinnaavugut. (1 Johannesi 2:16) Imaluunniit nakutitaalluta isumaqalersinnaavugut uinngup pilerigisaanut nakkaannarneq nukissaqaleqqissutigissallugu. (Romamiut 8:6) Assersuutigalugu inuit ilaasa ikiaroornartut, imigassaq, pornografii, timersuutit ingasattut imaluunniit iluarusutsitsisartut pissanganiutilluunniit assigiinngitsut qimaaffigisarpaat. Saatanip ‘qoqassiiniutaanut’ siunertaavoq uagutsinnik tammartitsinissaq, salloqittarluta nukissaqaleqqittutut misigilersilluta. — Efesosimiut 6:11.

¹⁸ Soorunami nerineq, imerneq ineriartornartunillu aliikkutassarsiorneq eqqunngitsuliornerunngillat, ingasaatinngikkaanni. Taakkuli inuunermi pingaarnerpaatinngilavut. Oqimaaqatigiissaarisariaqarpugut imminullu naalakkersinnaasariaqarluta, ingammik piffissaq inuuffigisarput eqqarsaatigalugu. Piffissarput nukivullu nammineq sammisartakkanut soqutigisanullu ima atortigisinnaavavut ‘ilatsiinnartunngorsinnaalluta inerititaqanngitsoorlutalu Naalakkatsinnik Jiisusi-Kristusimik ilisarsinitsinni’. — 2 Petrusi 1:8.

19, 20. Qanoq ililluta nukissaqaleqqissinnaavugut?

¹⁹ Eqqarsaativut kissaativullu Jehovap najoqqutassiaanut naapertuuppata paasillugulu akuerissavarput silarsuarmi matumani aliikkutassat sivikitsuinnarmik atuuttut. Mosesip tamanna paasivaa; uaguttaaq tamanna paasisariaqarparput. (Hebræerit 11:25) Ilumoortormi unaavoq: Ilumut nukissaqalersitsisartoq ataavartumillu nuannaarnarlunilu nalerisimaarnartoq tassaavoq Ataatatta qilammiusup piumasaatut iliorneq. — Matthæusi 5:6.

²⁰ Qanortoq anersaakkut ittunik sammisaqartarnitsigut nukissaqaleqqittuarta. Taamaaliorutta ‘naaggaarsinnaassaagut iluaatsuussusermut silarsuarmiullu kajungerisaannut utaqqitillugit neriuutitta pilluarnartup naammassineqarnissaa’ Guutillu angingaartup annaassisittalu Jiisusip Kristusip naalannassuseqarlutik saqqummernissaat. (Titusi 2:12, 13) Jiisusip oqartussaassusianut siulersuineranullu naalatsigitinnikkut taassuma nammaataanik nammaataqartuarnissarput aalajangiusimajuartigu. Taamaaliorutta nukissaqaleqqissaagut piviusumillu nuannaarlutalu pilluassalluta.

[Quppernerup ataani ilanngussaq]

Qanoq akissavit?

• Ullumikkut Jehovap innuttai qanoq ilillutik nukissaqaleqqittarpat?

• Oqaluussineq qanoq ililluni uagutsinnut oqaloqatitsinnullu nukissaqaleqqissutaasarpa?

• Ilaqutariinni ittuusut unnuk ilaqutariittut pallorfiginneqatigiiffik nukissaqaleqqinnartuutikkumallugu susinnaappat?

• Suut anersaakkut artorsaatissiisinnaappat?

[Atuaqqissaarnermi apeqqutit]