ការស្វែងរកការពិតអំពីស្ថានសួគ៌
ការស្វែងរកការពិតអំពីស្ថានសួគ៌
សេចក្ដីសង្ឃឹមឡើងទៅស្ថានសួគ៌ពិតជាទាក់ទាញចិត្តមែន! សេចក្ដីសង្ឃឹមដែលថា មានជីវិតក្រោយពេលមនុស្សស្លាប់ បានត្រូវប្រកាន់យកដោយពួកអ្នកកាន់តាមសាសនាព្រះពុទ្ធ អ៊ីស្លាម ហិណ្ឌូ សមាជិកវិហារនៃពិភពគ្រិស្តសាសនា ហើយសូម្បីតែមនុស្សជាច្រើនដែលមិនចាប់អារម្មណ៍នឹងសាសនាក៏មានសេចក្ដីសង្ឃឹមនេះដែរ។ ធម្មតាគេនឹកគិតអំពីស្ថានសួគ៌ថាជាកន្លែងដ៏សែនស្អាត ដែលមានតែការសប្បាយដែលពួកអ្នកនៅទីនោះលែងមានទុក្ខលំបាក ហើយជួបជុំ«បងប្អូនជាទីស្រឡាញ់ដែលបានស្លាប់»។ ក៏ប៉ុន្តែ ចំពោះមនុស្សភាគច្រើនពាក្យចាស់បុរាណមួយគឺពិតមែនដែលថា មនុស្សទាំងអស់ចង់ទៅស្ថានសួគ៌ តែគ្មាននរណាចង់ស្លាប់ដើម្បីទៅទីនោះទេ។ ហេតុអ្វីបានជាមនុស្សមិនចង់ស្លាប់ដើម្បីទៅស្ថានសួគ៌?
ប្រសិនបើយើងបានត្រូវបង្កើតដើម្បីស្លាប់ ហើយទៅស្ថានសួគ៌មែន មនុស្សកាន់តែច្រើននឹងរង់ចាំធ្វើដូច្នេះ ដូចជាកូនក្មេងរង់ចាំដល់ពេលធំឡើង ឬក្មេងជំទង់រង់ចាំពេលខ្លួនរៀបការ មែនទេ? ប៉ុន្តែ មនុស្សភាគច្រើនមិនចង់ស្លាប់ឡើយ។
ទោះជាយ៉ាងណាក៏ដោយ ពួកអ្នកផ្សាយសាសនាអះអាងថា ស្ថានសួគ៌ជាកន្លែងដែលបានត្រូវគ្រោងទុកឲ្យយើងរស់នៅ ក្រោយយើងស្នាក់នៅផែនដីមួយរយៈពេលខ្លី។ ជាឧទាហរណ៍ កាឌីណលធាអូដរ ម៉ាក់ការិក ដែលជាមេអេវ៉ែកម្នាក់នៅវ៉ាស៊ីនតោន ឌី.ស៊ី. សហរដ្ឋអាម៉េរិក មានប្រសាសន៍ថា៖ «យើងមិនបានត្រូវបង្កើតមកឲ្យរស់នៅទីនេះទេ។ យើងបានត្រូវបង្កើតមកឲ្យរស់នៅស្ថានសួគ៌»។ ស្រដៀងគ្នាដែរ អតីតប្រធាននៃសមាគមជាតិនៃអ៊ីវ៉ាន់ជីលិកខលនៅសហរដ្ឋអាម៉េរិក បានពោលថា៖ «គោលដៅនៃជីវិតយើងគឺសរសើរព្រះ ហើយឡើងទៅស្ថានសួគ៌ . . . ពីព្រោះស្ថានសួគ៌ជាទីលំនៅរបស់យើង» (U.S. National Association of Evangelicals)។
ពួកអ្នកដែលជឿថាមានជីវិតនៅស្ថានសួគ៌ក្រោយពីស្លាប់ មានជំនឿដែលផ្អែកទៅលើព័ត៌មានស្តួចស្តើង។ លោកចច បាណា ប្រធាននៃក្រុមហ៊ុនមួយដែលស្រាវជ្រាវមតិអំពីសាសនា បានយល់ឃើញថា មនុស្សជាច្រើនមាន«ទស្សនៈអំពីជីវិតនិងជីវិតក្រោយពីស្លាប់ដែលផ្អែកលើគំនិតដែលមកពីប្រភពផ្សេងៗ ដូចជាភាពយន្ត ចម្រៀងនិងសៀវភៅប្រលោមលោក»។ នៅរដ្ឋហ្ល័ររីដា សហរដ្ឋអាម៉េរិក គ្រូគង្វាលម្នាក់បាននិយាយថា៖ «យើងគ្រាន់តែដឹងថាស្ថានសួគ៌ជាទីលំនៅរបស់ព្រះ ក្រៅពីនេះយើងមិនដឹងអ្វីទៀតទេអំពីស្ថានសួគ៌»។
ក៏ប៉ុន្តែ ស្ថានសួគ៌ជាសាច់រឿងដ៏សំខាន់មួយក្នុងគម្ពីរ។ យោងទៅតាមបណ្ដាំរបស់ព្រះ តើស្ថានសួគ៌មានសភាពបែបណា? តើមនុស្សបានត្រូវបង្កើតឲ្យរស់នៅស្ថានសួគ៌ឬ? បើមនុស្សទៅស្ថានសួគ៌មែន តើពួកគេនឹងធ្វើអ្វីនៅទីនោះ?
[ឃ្លាអក្សរធំនៅទំព័រ៣]
ហេតុអ្វីបានជាមនុស្ស ជាច្រើនចង់ទៅស្ថានសួគ៌ តែមានមនុស្សតិចណាស់ ចង់ស្លាប់ដើម្បីទៅស្ថានសួគ៌?