សំណួរនិងចម្លើយពីគម្ពីរ
តើយើងអាចទទួលការអភ័យទោសចំពោះអំពើខុសឆ្គងរបស់យើងបានទេ?
យោងទៅតាមគម្ពីរបរិសុទ្ធមនុស្សទាំងអស់មានភាពខុសឆ្គង។ យើងមានទំនោរចិត្តប្រព្រឹត្តខុសឆ្គងដែលមកពីអាដាមជាមនុស្សដំបូង។ ហេតុនេះ ពេលខ្លះយើងធ្វើខុស ហើយក្រោយមកយើងប្រហែលជាស្ដាយក្រោយ។ លោកយេស៊ូគ្រិស្តដែលជាបុត្ររបស់ព្រះបានលោះយើងពីភាពខុសឆ្គងដោយលះបង់ជីវិតរបស់លោក។ ដូច្នេះ តាមរយៈគ្រឿងបូជាលោះរបស់លោក យើងអាចទទួលការអភ័យទោស។ នេះជាអំណោយពីព្រះ។—សូមអាន រ៉ូម ៣:២៣, ២៤
មនុស្សខ្លះបានប្រព្រឹត្តអំពើខុសឆ្គងធ្ងន់ធ្ងរ ហើយឆ្ងល់ថាតើព្រះអាចអភ័យទោសឲ្យពួកគេឬទេ។ បណ្ដាំព្រះសម្រាលទុក្ខយើងថា៖«ឈាមរបស់លោកយេស៊ូជាបុត្ររបស់ព្រះ ក៏សម្អាតយើងពីភាពខុសឆ្គងទាំងអស់»។ (១យ៉ូន. ១:៧) ព្រះយេហូវ៉ាសុខចិត្តអភ័យទោសឲ្យយើង បើយើងប្រែចិត្តយ៉ាងស្មោះ សូម្បីតែអំពើខុសឆ្គងនោះធ្ងន់ធ្ងរក៏ដោយ។—សូមអាន អេសាយ ១:១៨
តើយើងត្រូវធ្វើអ្វីដើម្បីទទួលការអភ័យទោស?
បើយើងចង់ទទួលការអភ័យទោសពីព្រះយេហូវ៉ា យើងត្រូវរៀនអំពីលោក គឺត្រូវយល់អំពីការប្រព្រឹត្តរបស់លោក ឱវាទរបស់លោក និងតម្រូវការពីលោក។ (យ៉ូន. ១៧:៣) ព្រះយេហូវ៉ាតែងតែអភ័យទោសឲ្យអស់អ្នកដែលប្រែចិត្ត និងខំព្យាយាមកែខ្លួន។—សូមអាន សកម្មភាព ៣:១៩
ការធ្វើឲ្យព្រះយេហូវ៉ាពេញចិត្តមិនមែនពិបាកពេកនោះទេ។ ព្រះយេហូវ៉ាយល់ថាយើងមានភាពទន់ខ្សោយ។ លោកមានចិត្តមេត្តាករុណានិងសប្បុរស។ បន្ថែមទៅទៀត ដោយសារព្រះយេហូវ៉ាប្រកបដោយសេចក្ដីស្រឡាញ់ដ៏ស្មោះត្រង់ នេះច្បាស់ជាធ្វើឲ្យអ្នកចង់រៀនថែមទៀតអំពីរបៀបដែលធ្វើឲ្យលោកពេញចិត្ត មែនទេ?—សូមអាន ចម្រៀងសរសើរព្រះ ១០៣:១៣, ១៤