សន្តិភាពនៅផែនដី តើនេះនឹងកើតឡើងយ៉ាងដូចម្ដេច?
ចម្លើយពីគម្ពីរ
សន្តិភាពនៅផែនដីនឹងមានជាមិនខាន តែមិនមែនមកពីការខំព្យាយាមរបស់មនុស្សទេ គឺមកពីរាជាណាចក្ររបស់ព្រះដែលជារដ្ឋាភិបាលមួយនៅស្ថានសួគ៌គ្រប់គ្រងដោយលោកយេស៊ូគ្រិស្ត។ សូមកត់សម្គាល់នូវអ្វីដែលគម្ពីរបង្រៀនអំពីសេចក្ដីសង្ឃឹមដ៏អស្ចារ្យនេះ។
១. ព្រះនឹងធ្វើឲ្យ«ផែនដីទាំងមូលលែងមានសង្គ្រាមទៀត»។ លោកធ្វើឲ្យសេចក្ដីសន្យានេះបានសម្រេច ដោយនាំឲ្យមាន«សេចក្ដីសុខសាន្តនៅផែនដី»ដល់«មនុស្សដែលជាទីគាប់ចិត្តលោក»។—ចម្រៀងសរសើរព្រះ ៤៦:៩; លូកា ២:១៤
២. រាជាណាចក្រព្រះនឹងគ្រប់គ្រងពីស្ថានសួគ៌មកលើផែនដីទាំងមូល។ (ដានីយ៉ែល ៧:១៤) រាជាណាចក្រនេះជារដ្ឋាភិបាលដែលគ្រប់គ្រងទូទាំងពិភពលោក ហើយរាជាណាចក្រនេះនឹងបំបាត់ចោលការប្រកាន់ពូជសាសន៍ដែលជាដើមហេតុនាំឲ្យមានសង្គ្រាមជាច្រើន។
៣. លោកយេស៊ូជាអ្នកគ្រប់គ្រងរាជាណាចក្រព្រះ ហើយលោកបានត្រូវហៅថា«ម្ចាស់នៃសេចក្ដីសុខសាន្ត»។ លោកនឹងធ្វើឲ្យប្រាកដថា«នឹងមានសេចក្ដីសុខសាន្តជានិច្ច»។—អេសាយ ៩:៦, ៧
៤. មនុស្សដែលនៅតែតាំងចិត្តធ្វើសង្គ្រាម នឹងមិនត្រូវអនុញ្ញាតឲ្យរស់នៅក្រោមការគ្រប់គ្រងនៃរាជាណាចក្រព្រះឡើយ ព្រោះ«[ព្រះ]ស្អប់អ្នកដែលចូលចិត្តអំពើឃោរឃៅ»។—ចម្រៀងសរសើរព្រះ ១១:៥; សុភាសិត ២:២២
៥. ព្រះបង្រៀនរាស្ត្ររបស់លោកអំពីរបៀបរស់នៅដោយសន្តិភាព។ គម្ពីររៀបរាប់អំពីលទ្ធផលពីការធ្វើតាមការណែនាំនេះ ដោយចែងថា៖«ពួកគេនឹងយកដាវរបស់ខ្លួន ដំធ្វើជាផាលនង្គ័ល ហើយយកលំពែង ដំធ្វើជាដង្កាវវិញ។ ប្រជាជាតិមួយនឹងមិនលើកដាវច្បាំងនឹងប្រជាជាតិមួយទៀតឡើយ ហើយក៏មិនរៀនធ្វើសង្គ្រាមទៀតដែរ»។—អេសាយ ២:៣, ៤
សាក្សីព្រះយេហូវ៉ារាប់លាននាក់នៅទូទាំងពិភពលោកកំពុងទទួលការបង្ហាត់បង្រៀនពីព្រះនូវរបៀបធ្វើឲ្យមានសន្តិភាព។ (ម៉ាថាយ ៥:៩) ទោះជាយើងមានជាតិសាសន៍ផ្សេងគ្នានិងរស់នៅជាង២៤០ប្រទេសខុសពីគ្នាក្ដី យើងមិនព្រមធ្វើសង្គ្រាមឡើយ។
សាក្សីព្រះយេហូវ៉ាកំពុងរៀនអំពីរបៀបធ្វើឲ្យមានសន្តិភាពនៅសព្វថ្ងៃនេះ