Mu dízui d’okulu dia Hebalaiku ni Ngeleku, o kizuelu sheʼohlʹ ni kia mukuá, haiʹdes, ki moneka 70 ia ji veji mu Bibidia. O izuelu iiadi íii, iamba ia lungu ni kufuá. Mu ji Bibidia ja mukuá, a isoneka kála “mbila,” mba “dikungu.” Kienhiki-phe, mu mazui a mukuá, ki muala izuelu ilombolola kiambote o kijimbuluilu kia izuelu íii, mu Hebalaiku ni Ngeleku. Kiki-phe, o Tradução do Novo Mundo, i tanga o izuelu ‘Seol’ ni ‘Hades.’ O izuelu íii, ijimbulula ihi? Ndoko tu di longe, se kiebhi kia ki jimbulula mu ukexilu uéngi mu ibatulu ia Bibidia.

O divulu dia Ndongixi 9:10 diambe: “O mu mbila mu ua-nda kuia, kana-mu dingi kikalakalu, mba ufunu, mba uhete, mba kuijiia kuoso-kuoso.” O kuila o Seol, ilombolola dikungu dimoxi di tu tena ku funda-mu o ndandu ietu? Kana. Kioso o Bibidia kiamba o kididi kia ku funda, mba, dikungu, iene i tanga izuelu ia mukuá mu dízui dia Hebalaiku ni mu Ngeleku, ki i tumbula sheʼohlʹ ni haiʹdes. (Dimatekenu 23:7-9; Matesu 28:1) O Bibidia ki i tumbula o kizuelu ‘Seol’ kuila o dikungu, mua funda athu a vulu, kála dikungu dia muiji.—Dimatekenu 49:30, 31.

O ‘Seol’ kididi kiahi? O maka a Nzambi alondekesa kuila o ‘Seol’ mba ‘Hades,’ kididi kia dikota, o dikungu dia muiji ndenge. O divulu dia Izaia 5:14 dizuela kuma o Seol “kuvudisa o hânji iê, ni kujikula dikanu diê sé mbambe.” Sumbala mu Seol muai kiá madifundu a vulu, né kiki ki iene mu zuela k’abhu kiá. (Jisabhu 30:15, 16) Ki kia difuangana ni dikungu dioso-dioso, muene muia o madifundu, “Ni kalunga ni dibuikilu, kene kuikuta.” (Jisabhu 27:20) Kiki, o Seol ki iene mu kuizala. Ki iene disukilu. O Seol, mba Hades, ki kididi kimoxi. Maji o mbila ia athu’oso a fuá mu ngongo.

 O milongi ia Bibidia ia lungu ni difukunukinu, i tu kuatekesa ku tendela kiambote se o ‘Seol’ ni ‘Hades’ ihi.’ O Maka a Nzambi a sokesa o Seol ni Hades, kuma oso ala-mu a-nda ku a fukununa. * (Jobe 14:13; Ikalakalu 2:31; Dijingunuinu 20:13) O Maka a Nzambi alondekesa ué kuma, oso ala mu Seol, mba mu Hades, ki ió ngó ene mu bheza Jihova, muala ué ió a kambe ku mu bheza. (Dimatekenu 37:35; Jisálamu 55:15) Kienhiki, o Bibidia i longa kuma hádia ku kala “difukunukinu dia athu aiuka ni athu abhukumuka.”—Ikalakalu 24:15.