DISÁ 40
Kyebhi Kitutena Kukala tu Athu Azele Bhu Pholo ya Nzambi?
Xinganeka mama wamusokejeka mon’ê phala kuya muxikola. Mwene utonginina se wazowo, se izwatu yê yazele, yayuka. Kima kyambote kubhanga kiki phala o sawidi ya mona, kilondekesa we ku akwa kwila o jitata jê amumulanga kyambote. Kala o jitata amesena kwila twana twâ tuzela, o Tata yetu Jihova wamesena kwila tuzela kikale muxitu ni mukilunji. Kyoso kitukala tu athu azele tukatula mbote, tubhana we kijingu kwa Jihova.
1. Kyebhi kitutena kukala tu athu azele muxitu?
Jihova ututangela: ‘Kalenu mu athu azele.’ (1 Phetele 1:16) Phala tukale tu athu azele, twatokala kuzela kikale muxitu ni mukilunji. Etu tutena kukala tu athu azele mu xitu, kyoso kituzowa izuwa yoso, kyoso kitusukula o izwatu, kukomba o inzo ni kusukula o dikalu dyetu. Tutena kukwatekesa kuzelesa o Kididi kya Ubhezelu. Kyoso kitukala tu athu azele mu xitu, tubhana kijingu kwa Jihova.—2 Kolindu 6:3, 4.
2. Idifwa yebhi yeji tufidisa kukala tu athu azele?
O Bibidya itutendelesa phala kweha o “ufusa woso wa xitu ni wa nzumbi.” (2 Kolindu 7:1) Kiki kilombolola kwila, twabhingi kubhanga nguzu phala kulenga kima kyosokyoso kyeji tubhanga kyayibha kikale muxitu ni mukilunji. Twamesena kwila o ibanzelu yetu ibhana kijingu kwa Jihova. Mukiki twamesena kubhanga yoso phala kulenga o ixinganeku yayibha. (Jisálamu 104:34) Twamesena kwila o izwelu yetu ikala izwelu yambote, yakidi.—Tanga Kolose 3:8.
Ihi dingi yeji tubhangesa kukala tu athu axidi kikala mu xitu ni mukilunji? Sayi ima itena kutubhanga kyayibha ku mukutu wetu. Mukonda dya kiki, etu kituxibhi mba tubwakula makanya mba tunwa jidroga. Kyoso kitubhanga kiki, tukala ni sawidi yambote, tulondekesa we kwila tuxila o mwenyu. Kyebhi kitutena kukala ni kilunji kyazele? Mukubhânga ni jihanji ja yibha kala o kutala o ufusa. (Jisálamu 119:37; Efezu 5:5) Sayi bhabha kutubhonza kutolola o jihanji ja yibha, maji Jihova utena kukukwatekesa kubhanga kiki.—Tanga Izaya 41:13.
DILONGE DINGI
Tala kyebhi o kuzela kubhana kijingu kwa Jihova. Tala we kyebhi kitutena kutolola o jihanji jayibha.
3. O kuzela muxitu kubhana kijingu kwa Jihova
Kyoso kitutanga o itumu ya Jihova yabhana ku kifuxi kya Izalayele, tudilonga se mukonda dyahi mwene wamesena kwila o mundu we uzela. Tanga Makatukilu 19:10; 30:17-19 mukusuluka bhanga o ibhwidisu ya kayela:
-
Ihi ilondekesa o jivelusu jiji ya lungu ni kyebhi Jihova kyatala o kuzela muxitu?
-
Idifwa yebhi yambote itena kukukwatekesa kukala u muthu wazele muxitu?
Kubhinga kithangana ni nguzu phala kukala muthu wazele muxitu. Maji tutena kubhanga kiki kabasa kididi bhu twatungu, né mwene se tujinvwama mba tu jingadyama. Tala OVIDYU, mukusuluka bhanga o kibhwidisu kya kayela.
-
Mukonda dyahi kukala ni imbamba ya zele, kutena kubhana kijingu kwa Jihova mu ukunji wetu?
4. Tolola o idifwa yayibha
Jihova utena kukukwatekesa kutolola kifwa kyoso kyoso kyayibha
Se ubwakula makanya mba unwa jidroga, wejiya kwila kubhonza kutolola o ifwa yayibha. Ihi itena kukukwatekesa? Xinganeka kyebhi o ifwa yiyi itena kukubhanga kyayibha. Tanga Matesu 22:37-39, mukusuluka dizwelesyenu kyebhi o kubwakula makanya ni kunwa jidroga kutena kuzanga . . .
-
o ukamba wa muthu ni Jihova.
-
o mwiji wa muthu ni athu akamukwa atungu ni mwene.
Xinda mbambe phala kutolola o kifwa kyayibha. a Tala OVIDYU.
Tanga Filipe 4:13, mukusuluka bhanga o kibhwidisu kya kayela:
-
Kyebhi o ukexilu wa kusamba, kudilonga o Bibidya, kuya muyônge, kutena kukwatekesa muthu kutolola o ifwa yayibha?
5. Tolola o ixinganeku ni ifwa yayibha
Tanga Kolose 3:5, mukusuluka bhanga o ibhwidisu ya kayela:
-
Kyebhi kitwejiya kwila, o kutala ufusa, kutumikisa jinjimbu ja ufusa ni kifwa kyabolo kya kudixaxata o idyandu ya ujitu phala kudivwa kala wamudijiya mba wamuzeka ni muhatu mba diyala (masturbação), ifwa yayibhila Jihova?
-
Ihi i ubanza, o kwila Jihova kamesena kwila eye ukala ni kilunji kyazele? Mukonda dyahi?
Tala kyebhi ki utena kutolola o ifwa yayibha. Tala OVIDYU.
Jezú wate kifika phala kulondekesa kwila twabhingi kusuluka mukukala ni kilunji kyazele. Tanga Matesu 5:29, 30, mukusuluka bhanga o kibhwidisu kya kayela:
-
Jezú kamesenene kuzwela kwila twatokala kukwama o mukutu wetu, maji twabhingi kubhanga kima. Ima yebhi itena kubhanga o muthu phala kutolola o ixinganeku yayibha? b
Se wamubhânga phala kutolola o ixinganeku yayibha, Jihova ubhana valolo mu nguzu iwamubhanga. Tanga Jisálamu 103:13, 14, mukusuluka bhanga o kibhwidisu kya kayela:
-
Se kwa mukubhonza kutolola o kifwa kyayibha, kyebhi o velusu yiyi itena kukuswinisa kusuluka ni kubhânga?
Kana kubhwila!
Kyoso muthu kya zoza mwene utena kubanza: ‘Eme kingafwama, kota ngalembwami kya.’ Maji Xinganeka hanji: Se o mulengi udibhuka anga ubwa, maji ubalumuka anga usuluka ni kulenga, kiki kilombolola kwila mwene wabele. Kyene kimoxi we, kyoso muthu kya zoza kikilombolola kwila mwene katena kutolola kifwa kyayibha. Kikilombolola we kwila mwene wavutuka kudimatekenu. Etwenyoso tutena kuzoza. Kana kubhwila! Ni kikwatekesu kya Jihova, eye utena kutolola o kifwa kyayibha.
ATHU AVULU AMBA: “Eme ngejidila kya. Kingandatena kweha.”
-
Ibatulu yebhi ya Bibidya iweji londekesa phala kumona kwila, ni kikwatekesu kya Jihova eye utena kutolola o kifwa kyayibha?
IHI IWADILONGO
Kyoso kitukala ni mukutu, kilunji ni ixinganeku yazele, tusangulukisa Jihova.
Kubhitulula
-
Mukonda dyahi o kukala tu athu azele kima kyabeta kota?
-
Kyebhi ki utena kukala u muthu wazele muxitu?
-
Kyebhi ki utena kukala ni ibhangelu yambote ni ixinganeku yazele?
TOKWESA DINGI
Ima yebhi i utena o kubhanga phala kukala u muthu wazele muxitu né mwene ni kitadi kyofele?
Tala o jindunge jitena kukukwatekesa kweha o kubwakula.
“Kyebhi Kingitena Kweha o Kubwakula” (Despertai!, maio de 2010)
Dilonge o ibhidi ijila mukutala o ufusa.
“Ku Tala o Ufusa Venenu Inga Kana?” (O Mulangidi, 1 wa Kakwinyi wa 2013)
Tala kyebhi diyala kyatolola o ukexilu wakutala o ufusa.
a Phala kumona o jindunge jitena kukukwatekesa kutolola o kifwa kyayibha, tanga mu mbandu Tokwesa Dingi mu milongi “Kyebhi Kingitena Kweha o Kubwakula.”
b Phala kumona kyebhi ki utena kutolola o ukexilu wakutala ufusa, tala o kibatulu “Kyebhi Kingitena Kutolola o Ukexilu Wakutala Ufusa?” Ibhwidisu Yene mu Bhanga o Minzangala—Itambwijilu Ikwatekesa Kumwenyu, Divulu dya 1, Kibatulu 25 mu Phutu.
Eye Nange Wandawabhela we o Maka Yá
IBHUIDISU IENE MU BHANGA DINGI O ATHU
Kyebhi o Jimbangi ja Jihova Kyene Mulonga o Bibidya?
Ni ukexilu ubhe yú wakulonga o Bibidya wa Jimbangi ja Jihova, eye utena we kutanga o jivelesu mu Bibidya yoso yoso iwamesena. Divwa kyambote phala kwixana muthu kumwiji wé mba kamba dyé kudibunda neye mukudilonga o Bibidya.
