KIKWATEKESU PHAL’O MWIJI | UKAZA
Kyebhi ki Utena Kulondekesa Mwanyu
“Omwanyu wamunumi ni wamuhatu ene mu ulola izuwa yoso. Kyoso ki ukala hanji udikudi nange umona kwila, omwanyu kikidifwa kyala ni valolo yadikota, maji kyoso ki ukazala phala kuditunda kyambote wandabhindamena okidifwa kiki.”—Nzwá.
Mukonda dyahi wabhingi kukala ni mwanyu?
O ukaza utena kukubhangesa kwijiya kyambote o itondalu yakaza dyé.
“Kyoso ki wijiya kyambote kaza dyé, kikubhonzo kudikwatenena mu itondalu yê. Se udikwatenena mu itondalu yakaza dyé, kiki kitena kukufidisa kulondekesa mwanyu.”—Jessena.
Okukamba mwanyu kutena kukubhangesa kuzwela ima sé kuxinganeka.
“Mukonda dya kuzwela ni lusolo kyebhi kingidivwa, sayi ithangana ngizwela ima sé kuxinganeka. Se ngejikala dingi ni mwanyu, ngejitena kuxinganeka kyambote ande dya kuzwela, ni kuzwela ngó o ima yatokala.”—Carmen.
O Bibidya yamba: “O henda i kolokota mu jihadi, i lenduka.” (1 Kolindu 13:4) Phala o athu ayadi adizolo hinu kikweji kwabhonza kudilondekesa mwanyu. Maji sayi bhabha kubhonza kulondekesa okidifwa kiki. Nzwá amutumbula kyá kudimatekenu wambe: “Kala kyene mubhita ni idifwa yamukwá, kubhinga we nguzu phala kulondekesa mwanyu. Se kitubhange nguzu kitwandatena kulondekesa okidifwa kiki.”
Kyebhi ki utena kulondekesa omwanyu?
Kyoso kikubhita kima ki ukifikile, anga kikubhonza kulondekesa mwanyu.
Kifika: Kaza dyé ukutangela kima kikuluwalesa. Eye uxinganeka we kumubhanga kima kimuluwalesa.
Ihi izwela o Bibidya: “Kana kulenguluka ku kala ni njinda mu mwenyu wé, kuma njinda ya tunga bhu homba ya mayówa.”—Ndongixi 7:9.
Kyebhi ki utena kulondekesa omwanyu: Kana kuzwela kima ni lusolo. Ande dyakutambwijila, xinganeka kwila kaza dyé kamesenene kukuluwalesa mulwelu. Sayi divulu dizwela yalungu ni ukaza, dyambe: “Avulu mudyetu tubhanga o ima kala kituxinganeka kwila, kyene kyazwela kaza dyetu. Muveji dyakubhanga o ima yamesenene kututangela mwene.”
Se kaza dyé ukutalatala kyayibha, eye utena kulungulula o ima mukumulondekesa mwanyu ni kumutalatala ni henda, muveji dyakumutalatala we kyayibha. O Bibidya yamba: “Bhwa kambe jihwinyi, túbhya tu jima.”—Jisabhu 26:20.
“Se umateka kumona omuhatwé kala nguma yé, emana hanji, xinganeka se mukonda dyahi wamuzolo, ni lusolo bhanga kima phala kumusangulukisa.”—Ethan.
Xinganeka:
Kyebhi ki utambwijila kyoso kaza dyé kyazwela mba kyabhanga kima kikuluwalesa?
Kyebhi ki utena kulondekesa dingi mwanyu mukithangana kyoso kaza dyé kyazwela mba kyabhanga kima kikuluwalesa?
Kyoso kaza dyé kyabhanga o ima ikuluwalesa ithangana yoso.
Kifika: Kaza dyé ubhixila tádidi ithangana yoso, eye umukingila muveji javulu. Kyoso ki uya ni kumukingila eye uthathamana dingi.
Ihi izwela o Bibidya: “Mu di lendukile ni kudikwatekesa mudyenu, mu di loloka.”—Kolose 3:13.
Kyebhi ki utena kulondekesa omwanyu: Muveji dyakuxinganeka ngó o ibhindamu yé, sota kuta kupholo o ukaza wé. Dibhwidise: ‘Se ngithathamana mukonda dya kima kyabhiti mba ngizoka ni kaza dyami, okwila kiki kyandakolesa o ukamba wetu?’ Lembalala kwila “etu-ene oso, twene mu tondajala mu ima yavulu.” (Tiyaku 3:2) Kiki kilombolola kwila, sayi we idifwa iwabhingi kulungulula.
“Sayi ithangana ngilondekesa dingi mwanyu kwa kamba dyami, muveji dya kulondekesa kwa munumyami. Ngixinganeka kiki, mukonda ngibhita ithangana yavulu ni munumyami, ngenemumona o itondalu yê. Maji kyoso kingikala ni mwanyu, ngilondekesa kwila ngamuzolo, ni kwila ngamumuxila.”—Nia.
Xinganeka:
Okwila ulondekesa mwanyu kyoso kaza dyé kyatondala?
Kyebhi ki utena kulondekesa dingi mwanyu kuhádya?