Ɛkliziastis 5:1-20
5 Tek tɛm ɛnitɛm we yu de go na di tru Gɔd in os. I bɛtɛ fɔ go nia fɔ lisin pas fɔ gi sakrifays lɛk aw fulman dɛn de du. Dɛn nɔ no se na bad tin dɛn de du.
2 Nɔ kwik fɔ tɔk. Nɔ alaw yu at fɔ mek yu tɔk sɔntin we yu nɔ tink bɔt we yu de bifo di tru Gɔd, bikɔs di tru Gɔd de na ɛvin bɔt yu de na di wɔl. Na dat mek yu wɔd dɛn we yu de tɔk nɔ fɔ bɔku.
3 We pɔsin gɛt bɔku tin dɛn we i de wɔri bɔt, dat kin mek i drim. Semweso, bɔku tɔk de mek fulman tɔk fulish tin dɛn.
4 Ɛnitɛm yu mek vaw to Gɔd, nɔ westɛm fɔ du am, bikɔs i nɔ de gladi wit fulman dɛn. We yu vaw, du am.
5 I bɛtɛ nɔ fɔ vaw pas fɔ vaw ɛn nɔ du wetin yu vaw.
6 Nɔ alaw yu mɔt* fɔ mek yu sin, ɛn nɔ tɔk bifo di enjɛl* se na bin mistek. Wetin mek di tru Gɔd fɔ vɛks pan yu bikɔs ɔf wetin yu se ɛn pwɛl wetin yu dɔn du?
7 Jɔs lɛk we pɔsin kin drim bikɔs i gɛt bɔku tin fɔ wɔri bɔt, na so bak bɔku tɔk na vaniti. Bɔt fred di tru Gɔd.
8 If yu si sɔmbɔdi de mek po pɔsin sɔfa ɛn if jɔstis nɔ de ɛn dɛn nɔ de du wetin rayt na yu distrikt, lɛ dat nɔ sɔprayz yu. Pɔsin we gɛt ay pozishɔn pas da bigman de de wach am, ɛn ɔda pipul dɛn de we gɛt ay pozishɔn pas dɛn.
9 Dɔn bak, dɛn ɔl de sheb di prɔfit we dɛn gɛt frɔm di land, ivin di kiŋ de bɛnifit frɔm di land.
10 Pɔsin we lɛk silva nɔ de ɛva satisfay wit silva, ɛn pɔsin we lɛk jɛntri nɔ de satisfay wit di mɔni we i de gɛt. Dis bak na vaniti.
11 We gud tin dɛn bɔku, di wan dɛn we de yuz dɛn de bɔku. Us bɛnifit di wan we gɛt dɛn go gɛt, pas fɔ luk dɛn wit in yay?
12 Savant de slip fayn, ilɛk i it smɔl ɔ bɔku, bɔt di bɔku tin dɛn we jɛntriman gɛt nɔ de mek i slip.
13 Wan bad bad tin de we a dɔn si na dis wɔl: pɔsin we gɛt jɛntri de kip am te i ambɔg insɛf.
14 Bad biznɛs go mek i lɔs dɛn jɛntri dɛn de, ɛn we i bɔn pikin, i nɔ go gɛt natin we lɛf wit am.
15 Jɔs lɛk aw pɔsin de kɔmɔt na in mama in bɛlɛ nekɛd wan, na so i go go bak nekɛd wan, ɛn i nɔ go ebul fɔ kɛr go ɛnitin fɔ ɔl di tranga wok we i du.
16 Dis bak na bad bad tin: Jɔs lɛk aw i kam, na so i go go. Us bɛnifit de fɔ di wan we de kɔntinyu fɔ wok tranga wan fɔ briz?
17 Dɔn bak, ɛvride i de it insay daknɛs, wit bɔku bɔku fɔstreshɔn, siknɛs, ɛn wamat.
18 Na dis a si se gud ɛn fayn: pɔsin fɔ it, drink, ɛn ɛnjɔy bikɔs ɔf ɔl di tranga wok we i dɔn du na di wɔl insay di shɔt tɛm we di tru Gɔd dɔn gi am fɔ liv, dis na in bɛnifit.*
19 Dɔn bak, we di tru Gɔd gi pɔsin jɛntri ɛn prɔpati dɛn ɛn mek i ebul fɔ ɛnjɔy dɛn, i fɔ tek am as in bɛnifit* ɛn gladi fɔ ɔl in tranga wok. Dis na gift frɔm Gɔd.
20 I go at fɔ lɛ i notis* se in tɛm de pas, bikɔs di tru Gɔd go mek i bizi de ɛnjɔy.
