WETIN MEK SƆM PIPUL DƐN DE DAWT? Bɔku pipul dɛn fil se Gɔd jɔs de si wi as pipul dɛn we de sin, as pipul dɛn we nɔ klin na in yay, ɛn we nɔ fit fɔ lɛ i pe atɛnshɔn to. Wan uman we nem Kɛndra, we in at bin pwɛl bad, bin de fil bad ɔltɛm bikɔs i nɔ bin ebul fɔ du wetin Gɔd want pafɛkt wan. Dis bin mek i tɔk se, i “lɛf fɔ pre to Gɔd.”

WETIN GƆD IN WƆD SE? Jiova nɔ jɔs de luk di mistek dɛn we wi de mek, bɔt i ɔndastand udat wi rili bi. Di Baybul se: “I no aw i mek wi; i nɔ de fɔgɛt se na dɔti i tek mek wi.” Apat frɔm dat, “i nɔ de pɔnish wi lɛk aw i fɔ pɔnish wi,” bɔt i de sɔri fɔ wi ɛn fɔgiv wi we wi lɛf fɔ du bad.—Sam 103:10, 14.

Lɛ wi tɔk bɔt Kiŋ Devid we wi bin tɔk bɔt insay di fɔs atikul. We Devid bin de pre to Gɔd, i bin se: “Yu bin dɔn si mi bifo a bɔn. . . . PAPA GƆD, luk mi bɛtɛ bɛtɛ wan mek yu no wetin de na mi at.” (Sam 139:16, 23) Devid bin biliv se pan ɔl we i bin de sin siriɔs wan Jiova bin ebul fɔ no se i rili sɔri fɔ di bad tin dɛn we i bin de du.

Jiova ɔndastand yu pas aw ɛni mɔtalman go ɔndastand yu. Di Baybul se: “Mɔtalman de luk wetin in de si bɔt PAPA GƆD in de luk insay pɔsin in at.” (Fɔs Samiɛl 16:7) Gɔd no di difrɛn tin dɛn we mek yu de biev di we aw yu de biev naw. I no se yu mama ɛn papa gɛt sɔntin fɔ du wit di we aw yu de biev. I no bak se di we aw dɛn mɛn yu, di say we dɛn mɛn yu, ɛn di abit dɛn we yu gɛt, ɔl gɛt sɔntin fɔ du wit di kayn pɔsin we yu bi. Jiova de si di gud tin we yu de du, ɛn i gladi fɔ di kayn pɔsin we yu de tray fɔ bi, pan ɔl we yu de mek mistek.

Dis we aw Gɔd ɔndastand yu, aw i de yuz am fɔ kɔrej yu?