1. (a) Wetin mek na naw i rili impɔtant fɔ fɛt Setan? (b) Aw wi no se i pɔsibul fɔ fɛt Setan ɛn win am?

SETAN de fɛt wɔ wit di anɔyntɛd Kristian dɛn we dɔn lɛf na dis wɔl ɛn di “ɔda ship dɛn.” (Jɔn 10:16) Di men tin we Setan want na fɔ lɛ bɔku pan Jiova in savant dɛn pwɛl dɛn padi biznɛs wit Jiova insay di shɔt tɛm we dɔn lɛf fɔ am. (Rid Rɛvɛleshɔn 12:9, 12.) Wi go ebul fɔ fɛt Setan ɛn win am? Yɛs, wi go ebul! Di Baybul se: “Una nɔ du wetin di Dɛbul want, ɛn i go rɔnawe pan una.”—Jems 4:7.

2, 3. (a) Aw di biliv we pipul dɛn nɔ biliv se Setan de, de mek am izi fɔ lɛ Setan du wetin i want? (b) Aw yu no se Setan de?

² Bɔku pipul dɛn nɔ biliv se Setan de. Dɛn fil se Setan ɛn in dɛbul dɛn na pipul dɛn na dɛn stori buk, dɛn fiaful fim dɛn, ɛn dɛn vidio gem dɛn. Dɛn kayn pipul ya de fil se ɛnibɔdi we gɛt sɛns nɔ go biliv se wikɛd spirit dɛn de. Yu tink se Setan de fil bad we pipul dɛn de fil se in ɛn in dɛbul dɛn nɔ de, dɛn na jɔs pipul dɛn na dɛn stori dɛn? Nɔ, i nɔ de fil bad atɔl! Infakt, na izi tin fɔ Setan fɔ ful di wan dɛn we de dawt if i de. (2 Kɔr. 4:4) Wan we we Setan de ful pipul  dɛn na we i de mek dɛn biliv se wikɛd spirit dɛn nɔ de.

³ Bikɔs wi na Jiova in savant dɛn, wi nɔ de pan di wan dɛn we Setan de ful. Wi no se Setan de, bikɔs na in bin yuz wan snek fɔ tɔk to Iv. (Jɛn. 3:1-5) Dɔn na Setan bin provok Jiova se Job nɔ de sav am fɔ di rayt rizin. (Job 1:9-12) Ɛn na Setan bin tray fɔ tɛmpt Jizɔs. (Mat. 4:1-10) Afta Gɔd in Kiŋdɔm bigin fɔ rul insay di ia 1914, na Setan bigin “fɔ fɛt wɔ” wit di balans anɔyntɛd Kristian dɛn. (Rɛv. 12:17) Dis wɔ stil de kɔntinyu bikɔs Setan de tray fɔ mek di 144,000 anɔyntɛd Kristian dɛn we dɔn lɛf ɛn di ɔda ship dɛn stɔp fɔ biliv pan Jiova. Fɔ win Setan pan dis fɛt, wi fɔ tinap tranga wan ɛn kɔntinyu fɔ du di tin dɛn we wi de lan. Dis atikul go tɔk bɔt tri we dɛn aw wi go du so.

4. Aw Setan dɔn sho se i rili prawd?

⁴ Setan prawd bad. Infakt, fɔ lɛ spirit pɔsin gɛt di maynd fɔ chalenj Jiova se i nɔ gɛt rayt fɔ rul ɛn mek insɛf gɔd, de sho se i rili prawd ɛn i de put insɛf usay i nɔ fit fɔ de. So wan we we wi go tinap tranga wan lɛ Setan nɔ ebul wi, na we wi nɔ mek prawd ɛn tray fɔ put wisɛf dɔŋ.—Rid Pita In Fɔs Lɛta 5:5.

5, 6. (a) I bad fɔ rɛspɛkt wisɛf? Ɛksplen. (b) Us ɛgzampul dɛn na di Baybul sho se i bad fɔ mek prawd?

⁵ I nɔ bad fɔ lɛ wi rɛspɛkt wisɛf ɛn biliv se wi kin ebul fɔ du sɔntin. Ɛn i nɔ bad fɔ fil fayn we wi ɔ pipul dɛn we wi lɛk du gud tin ɔ gɛt fayn tin. Di apɔsul Pɔl bin se: “Na dis mek wi kin gladi fɔ tɔk bɔt una na Gɔd in kɔngrigeshɔn dɛn bikɔs una de bia ɛn una gɛt fet pan ɔl we pipul dɛn de du una bad bad tin dɛn ɛn una de bia pan ɔl we prɔblɛm dɛn de mit una.” (2 Tɛsa. 1:4) So i nɔ bad fɔ fil fayn bɔt di tin dɛn we yu ɔ ɔda pipul dɛn de du. Wi nɔ fɔ shem bɔt wi famili, wi kɔlchɔ, ɔ di say we wi mɛn.—Akt 21:39.

⁶ Bɔt we pɔsin prawd, i kin ambɔg in padi biznɛs wit ɔda pɔsin ɛn i kin ivin ambɔg in padi biznɛs wit Jiova. Pɔsin we prawd kin vɛks we dɛn kɔrɛkt am ɛn i nɔ kin tek advays. (Sam 141:5) Pɔsin we prawd kin fil tu big bɔt insɛf ɛn i kin fil se i bɛtɛ pas ɔda pipul dɛn. I kin fil se i bɛtɛ pas ɔda pipul dɛn fɔ no gud rizin. Jiova et pɔsin we prawd. (Izik. 33:28; Emɔs 6:8) Bɔt Setan in lɛk we mɔtalman de falamakata am fɔ mek prawd. Setan go dɔn gladi we i si pipul dɛn lɛk Nimrɔd, Fɛro, ɛn Absalɔm de bost ɛn mek prawd! (Jɛn. 10:8, 9; Ɛks. 5:1, 2; 2 Sam. 15:4-6) Na prawd mek Ken in padi biznɛs wit Gɔd pwɛl. Na Gɔd insɛf sɛf advays am, bɔt bikɔs i bin prawd, i nɔ bin tek di advays. I mek tranga-yes ɛn nɔ du wetin Jiova tɛl am ɛn dis bin mek i sin agens Jiova.—Jɛn. 4:6-8.

7, 8. (a) Aw prawd kin mek wi et ɔda pipul dɛn? (b) Ɛksplen aw prawd kin ambɔg di wanwɔd na di kɔngrigeshɔn.

⁷ Tide, pipul dɛn kin mek prawd difrɛn difrɛn we dɛn ɛn dis kin briŋ kam siriɔs prɔblɛm dɛn. Wan we we pipul dɛn kin mek prawd na we dɛn et ɔda pipul dɛn bikɔs dɛn kɔmɔt na ɔda kɔntri ɔ dɛn gɛt difrɛn kɔlɔ. Dɛn de tink se di we aw dɛn luk ɔ usay dɛn kɔmɔt mek dɛn bɛtɛ pas ɔda pipul dɛn. Dis dɔn briŋ kam fɛt-fɛt ɛn wɔ we dɔn mek bɔku pipul dɛn de day.

⁸ Dɛn kayn tin ya nɔ fɔ apin na di  kɔngrigeshɔn. Bɔt we cham-mɔt kin de bitwin tu brɔda dɛn na di kɔngrigeshɔn bikɔs dɛn de mek prawd, i kin mek di prɔblɛm wɔs. Na dat bin apin to sɔm Kristian dɛn we bin de trade. So Jems bin rayt se: “Wetin na di rizin fɔ di wɔ ɛn fɛt we una de pan?” (Jems 4:1) If wi nɔ lɛk ɔda pipul dɛn ɛn wi de fil se wi bɛtɛ pas dɛn, wi go du ɔ se sɔntin we go mek dɛn fil bad. (Prɔv. 12:18) So wi dɔn si klia wan se prawd kin ambɔg di wanwɔd we de na di kɔngrigeshɔn.

9. Aw di Baybul de ɛp wi nɔ fɔ et ɔda pipul dɛn ɛn ɛp wi nɔ fɔ mek prawd? (Luk di pikchɔ nia dis atikul in taytul.)

⁹ If wi kin fil se wi bɛtɛ pas ɔda pipul dɛn, wi fɔ mɛmba se “Jiova et ɛnibɔdi we prawd.” (Prɔv. 16:5) Ɛn wi fɔ tray fɔ chɛk wisɛf fɔ no aw wi de si ɔda pipul dɛn we de na ɔda kɔntri, we gɛt difrɛn kɔlchɔ, ɔ kɔlɔ. If wi et pipul dɛn we de na ɔda kɔntri ɔ we gɛt difrɛn kɔlɔ, i de sho se wi nɔ gri se “na frɔm wan man [Gɔd] mek ɔl ɔda mɔtalman.” (Akt 17:26) Wi ɔl na wan bikɔs na frɔm Adam wi ɔl kɔmɔt. So i nɔ mek sɛns fɔ lɛ wi biliv se pipul dɛn na wan kɔntri bɛtɛ pas pipul dɛn na ɔda kɔntri. If wi de tink dis we, wi de alaw Setan fɔ ambɔg di wanwɔd ɛn lɔv we de na di kɔngrigeshɔn. (Jɔn 13:35) Fɔ lɛ wi go ebul fɔ fɛt Setan ɛn win am, wi fɔ lɛf fɔ mek prawd.—Prɔv. 16:18.

10, 11. (a) Wetin mek i kin izi fɔ lɛk di wɔl? (b) Aw Dimas go dɔn sho se i lɛk di wɔl?

¹⁰ Na Setan “de rul dis wɔl,” ɛn na in de kɔntrol am. (Jɔn 12:31; 1 Jɔn 5:19) Na in mek bɔku tin dɛn we pipul dɛn lɛk na di wɔl nɔ gri wit wetin de na di Baybul. Dis nɔ min se ɔltin na di wɔl bad. Bɔt wi fɔ no se Setan go yuz di tin dɛn na di wɔl fɔ mek wi sin ɔ mek wi lɛk di wɔl ɛn lɛf fɔ wɔship Jiova.—Rid Jɔn In Fɔs Lɛta 2:15, 16.

¹¹ Sɔm Kristian dɛn we bin de insay di apɔsul dɛn tɛm bin lɛk di wɔl ɛn dat bin ambɔg dɛn. Fɔ ɛgzampul, Pɔl bin rayt se: “Dimas dɔn lɛf mi bikɔs i lɛk dis wɔl.” (2 Tim. 4:10) Di Baybul nɔ tɛl wi us patikyula tin na di wɔl we Dimas bin lɛk, we mek i lɛf Pɔl. I go bi se Dimas bin bigin fɔ lɛk prɔpati pas fɔ sav Jiova. If na so i bi, Dimas lɔs di chans we i bin gɛt fɔ du sɔm spɛshal wok dɛn we i de sav Jiova. Yu tink se i mek sɛns we i du dat? Yu tink se di wɔl fɔ dɔn gi Dimas ɛnitin we go pas di blɛsin we Jiova fɔ dɔn gi am if i bin ɛp Pɔl?—Prɔv. 10:22.

12. Aw Setan kin yuz “di pawa we jɛntri gɛt fɔ ful pɔsin”?

¹² Dis sem kayn tin kin apin to wi. Bikɔs wi na Kristian, wi kin want fɔ kia fɔ wisɛf ɛn fɔ wi famili. (1 Tim. 5:8) Jiova want lɛ wi ɛnjɔy wi layf. Wi kin si dis klia wan we wi tink bɔt di fayn fayn gadin we i put Adam ɛn Iv. (Jɛn. 2:9) Bɔt Setan kin yuz “di pawa we jɛntri gɛt fɔ ful pɔsin.” (Mat. 13:22) Bɔku pipul dɛn kin tink se mɔni go mek dɛn gladi ɔ we dɛn gɛt bɔku prɔpati na in go mek dɛn go bifo na layf. If wi de tink dis kayn we, wi go de ful wisɛf ɛn lɔs di tin we valyu pas ɔl, dat na wi padi biznɛs wit Jiova. Jizɔs bin wɔn di wan dɛn we de fala am se: “Nɔbɔdi nɔ go ebul bi slev fɔ tu masta; i go et di wan ɛn lɛk di ɔda wan, ɔ i go de wit di wan ɛn nɔ rɛspɛkt di ɔda wan. Yu nɔ go ebul bi slev fɔ Gɔd ɛn fɔ Jɛntri.” (Mat. 6:24) If wi de rɔnata Jɛntri,  wi go lɛf fɔ sav Jiova ɛn na jɔs dat Setan want! Lɛ wi nɔ ɛva alaw mɔni ɔ di tin we mɔni kin bay fɔ pwɛl wi padi biznɛs wit Jiova. Fɔ lɛ wi go ebul fɔ fɛt Setan, wi fɔ de tink di rayt we bɔt prɔpati.—Rid Fɔs Lɛta To Timoti 6:6-10.

13. Aw di wɔl dɔn mek bɔku pipul dɛn nɔ de si mared ɛn mami ɛn dadi biznɛs di rayt we?

¹³ Wan ɔda trap we Setan de yuz na mami ɛn dadi biznɛs we nɔ rayt na Gɔd in yay. Tide, bɔku pipul dɛn de fil se fɔ lɛ dɛn fetful to dɛn man ɔ wɛf ɔ fɔ mared, na sɔntin we de tayt dɛn ɔ we nɔ de na stayl igen. Fɔ ɛgzampul, wan uman we de akt fim, we bɔku pipul dɛn no, tɔk se: “Fɔ lɛ man ɛn uman fetful to dɛnsɛf na sɔntin we nɔ pɔsibul. A nɔ no ɛnibɔdi we fetful ɔ we want fɔ bi fetful.” Wan man we de akt fim insɛf se: “A nɔ shɔ se Gɔd mek wi fɔ lɛ wi de wit wan pɔsin te wi day.” Setan kin gladi we di wan dɛn we bɔku pipul dɛn sabi kin tɔk bad bɔt mared, we na fayn gift we Gɔd dɔn gi wi. Setan nɔ lɛk mared ɛn i nɔ want lɛ mared go bifo. So fɔ lɛ wi go ebul fɔ fɛt Setan ɛn win am, wi fɔ de si mared di we aw Gɔd de si am.

14, 15. Aw wi go ebul fɔ avɔyd mami ɛn dadi biznɛs we nɔ rayt na Gɔd in yay?

¹⁴ Ilɛksɛf wi dɔn mared ɔ wi nɔ mared yet, wi fɔ tray tranga wan fɔ avɔyd mami ɛn dadi biznɛs we nɔ rayt na Gɔd in yay. Yu tink se na izi tin fɔ du? Nɔ, nɔto izi tin! Fɔ ɛgzampul, if yu na yɔŋ pɔsin, yu go dɔn yɛri we yu skulmet dɛn de bost se dɛn kin du mami ɛn dadi biznɛs wit ɛnibɔdi we dɛn want ɔ dɛn kin sɛn dɛn rud rud mɛsej ɛn pikchɔ to dɛnsɛf na fon. Na sɔm say dɛn na di wɔl, dis tin we dɛn kin du jɔs tan lɛk we yu de sɛn dɛn rud rud pikin pikchɔ dɛn to ɔda pɔsin. Di Baybul se: “Ɛnibɔdi we de du mami ɛn dadi biznɛs di we aw Gɔd nɔ want de sin agens in yon bɔdi.” (1 Kɔr. 6:18) Sik dɛn we pɔsin kin gɛt we i du mami ɛn dadi biznɛs dɔn mek bɔku pipul dɛn sɔfa ɛn day. Ɛn bɔku yɔŋ pipul dɛn we nɔ mared yet ɛn we nɔto vajin igen dɔn tɔk se dɛn fil am fɔ wetin dɛn du. Di bad tin dɛn we kin apin to pɔsin we de du mami ɛn dadi biznɛs di we aw Gɔd nɔ want kin difrɛn frɔm di tin dɛn we wi kin si na fim. Di fim dɛn we de na di wɔl tide kin want mek wi biliv se wi kin du mami ɛn dadi biznɛs di we aw Gɔd nɔ want ɛn natin nɔ go apin to wi. Na “di pawa we sin gɛt fɔ ful pɔsin” kin mek pipul dɛn de tink dis kayn we.—Ibru 3:13.

¹⁵ Wetin yu go du if sɔntin de tɛmpt yu fɔ du mami ɛn dadi biznɛs di we aw Gɔd nɔ want? Yu fɔ no se na yu yon prɔblɛm dis. (Rom 7:22, 23) Pre to Gɔd fɔ lɛ i ɛp yu fɔ tinap tranga wan. (Fil. 4:6, 7, 13) Avɔyd ɛnitin we go mek yu du mami ɛn dadi biznɛs di we aw Gɔd nɔ want. (Prɔv. 22:3) So we sɔntin tɛmpt yu, kɔmɔt de wantɛm wantɛm.—Jɛn. 39:12.

16. Wetin Jizɔs bin du we Setan tɛmpt am? Wetin wi lan frɔm dat?

¹⁶ Jizɔs sɛt fayn ɛgzampul we go ɛp wi if sɔmbɔdi tɛmpt wi fɔ du bad. Setan nɔ bin ebul fɔ ful am. Jizɔs nɔ bin ivin bigin tink bɔt di bɛnifit ɔ prɔblɛm dɛn we i go gɛt if i du wetin Setan tɛl am. Bifo dat, i tɛl am wantɛm wantɛm se: “Dɛn bin dɔn rayt se.” (Rid Matyu 4:4-10.) Jizɔs bin no Gɔd in Wɔd, ɛn dat bin mek i ebul fɔ du  sɔntin wantɛm wantɛm ɛn kot di Baybul we Setan tɛmpt am. Fɔ lɛ wi go ebul fɔ fɛt Setan ɛn win, wi nɔ fɔ alaw am fɔ tɛmpt wi fɔ du mami ɛn dadi biznɛs di we we nɔ rayt na Gɔd in yay.—1 Kɔr. 6:9, 10.

17, 18. (a) Us ɔda trap dɛn Setan de yuz? Wetin mek dis nɔ fɔ mek wi sɔprayz? (b) Wetin gɛt fɔ apin to Setan? Aw dis go ɛp yu fɔ bia ɛnitin we go mit yu?

¹⁷ Prawd, want want, ɛn mami ɛn dadi biznɛs di we we nɔ rayt na Gɔd in yay na jɔs tri pan di trap dɛn we Setan de yuz. I gɛt bɔku ɔda tin dɛn we i de yuz. Fɔ ɛgzampul, sɔm Kristian dɛn fambul dɛn nɔ kin want mek dɛn sav Jiova, dɛn skulmet dɛn de provok dɛn, ɛn sɔm gɔvmɛnt dɛn kin ivin stɔp wi prichin wok. Dɛn kayn prɔblɛm ya nɔ de mek wi sɔprayz, bikɔs Jizɔs bin dɔn tɛl in disaypul dɛn se: “Pipul dɛn go et una fɔseka mi nem, bɔt di wan we go bia te ɔltin dɔn na in go sev.”—Mat. 10:22.

¹⁸ Aw wi go ebul fɛt Setan ɛn win? Jizɔs bin tɛl in disaypul dɛn se: “Di bia we una de bia na in go mek una sev.” (Lyuk 21:19) Natin nɔ de we mɔtalman go du wi, we go ambɔg wi sote go, na fɔ shɔt tɛm nɔmɔ. Nɔbɔdi nɔ go ebul fɔ pwɛl wi padi biznɛs wit Gɔd, pas wi alaw dat fɔ apin. (Rom 8:38, 39) Ilɛksɛf Jiova in savant dɛn day, dat nɔ min se Setan dɔn win, bikɔs Jiova go gi dɛn layf bak! (Jɔn 5:28, 29) Bɔt Setan nɔ gɛt no op fɔ tumara bambay. Afta Jiova go dɔn dɔnawe wit Setan in wikɛd wɔl, dɛn go put Setan na wan dip dip ol we nɔ gɛt bɔtɔm, fɔ 1,000 ia. (Rɛv. 20:1-3) We Jizɔs in Wan Tawzin Ia Rul dɔn, dɛn go “pul Setan kɔmɔt na in prizin” fɔ shɔt tɛm fɔ lɛ i go gɛt wan las chans fɔ ful pafɛkt mɔtalman. Afta dat, dɛn go kil Setan. (Rɛv. 20:7-10) Setan nɔ gɛt fɔ de tumara bambay, bɔt yu go gɛt fɔ de! Tinap tranga wan fɔ fɛt Setan ɛn kɔntinyu fɔ du di tin dɛn we yu dɔn lan. If yu du dat, yu go ebul fɔ fɛt Setan ɛn win am!