Di buk we nem Mi Baybul Stori Buk we dɛn translet pan Pangasian langwej we dɛn bin gi na di 2012 kɔnvɛnshɔn, de ɛp bɔku skulpikin dɛn we de tɔk da langwej de na di Filipins. Di buk jɔs fit wetin di Philippines Department of Education bin dɔn tɔk fɔ se, dɛn fɔ de yuz di langwej we di pikin dɛn de tɔk fɔ tich dɛn na praymari skul.

I pas lɛk 100 langwej dɛn we dɛn de tɔk na di Filipins ɛn i dɔn te we dɛn de agyu bɔt us langwej dɛn fɔ yuz fɔ tich di pikin dɛn na skul. Insay 2012, di Department of Education kam si se “we dɛn yuz langwej we dɛn de tɔk na os” dat go mek di pikin dɛn “lan kwik ɛn dɛn go lan fayn.” Dat dɔn mek, dɛn bigin yuz, “Mother Tongue-Based Multi-Lingual Education” fɔ tich na skul.

Pangasian na wan pan di langwej dɛn we dɛn bin pik fɔ yuz. Bɔt prɔblɛm bin de. Wan prinsipal na wan skul bin de kɔmplen ɔltɛm se dɛn nɔ gɛt bɛtɛ buk dɛn pan Pangasian langwej we di pikin dɛn go rid. I bin jɔs fit di tɛm we Jiova Witnɛs dɛn gɛt di buk we nem Mi Baybul Stori Buk insay Pangasian langwej na di kɔnvɛnshɔn we dɛn bin gɛt insay Novɛmba 2012.

Dɛn bin print lɛk 10,000 kɔpi dɛn so fɔ sheb na di kɔnvɛnshɔn dɛn. Mama ɛn papa dɛn ɛn dɛn smɔl pikin dɛn, bin gladi fɔ gɛt dis buk insay di langwej we dɛn de tɔk. Wan maredman ɛn in wɛf bin tɔk se: “Wi pikin dɛn lɛk am bikɔs dɛn de rili ɔndastand.”

Jɔs afta di kɔnvɛnshɔn, sɔm Jiova Witnɛs dɛn we de na Dagupan Siti, bin kɛr dɛn Baybul Stori buk go na skul. Di ticha dɛn we bin de stren fɔ fɛn buk dɛn insay Pangasian langwej, bin gladi fɔ di buk. I pas 340 buk dɛn we dɛn bin sheb. Di ticha dɛn bigin fɔ yuz am wantɛm fɔ tich di pikin dɛn aw fɔ rid insay di langwej we dɛn de tɔk.

Jiova Witnɛs dɛn gladi we dis buk de ɛp smɔl pikin dɛn fɔ lan buk. Wan pan di transletɔ dɛn we bin ɛp fɔ translet di Baybul Stori Buk, bin tɔk se: “Wi no se pipul dɛn de bɛnifit mɔ we dɛn rid sɔntin insay dɛn yon langwej ɛn i de tɔch dɛn at. Na dat mek Jiova Witnɛs dɛn de tray tranga wan fɔ translet Baybul dɛn ɛn buk dɛn we de tɔk bɔt di Baybul insay bɔku bɔku langwej dɛn.”