၁. ကစၢ်အိၣ်ဒီးတၢ်သးကညီၤ,

မၤဂ့ၤတၢ်လၢဟီၣ်ခိၣ်ဖိဂီၢ်.

တမ့ၢ်မူဒါလၢကဘၣ်မၤ

မ့ၢ်လၢအဲၣ်ဘၣ်ပဝဲနၤယၤ.

ကစၢ်ယွၤန့ၣ် သးကညီၤပှၤ,

သးအိၣ်မၤပှဲၤပတၢ်လိၣ်ဘၣ်.

ပှၤတၢ်ဒဲးဘးဖိမ့ၢ်ပီၢ်ယၢ်

ကစၢ်သးခုဝဲဒၣ်ဒိၣ်မး.

၂. ပမၤကမၣ်ဘၣ်တၢ်အခါ

ပဃ့ယွၤပျၢ်ပတၢ်ကမၣ်.

ပဘၣ်ဃ့အီၤဒ်လဲၣ်ဒ်လဲၣ်

ကစၢ်ယ့ၣ်ၡူးသိၣ်လိတ့ၢ်ဝဲ

“ကစၢ်ဧၢပျၢ်ပတၢ်ကမၣ်

ဒ်ပပျၢ်ပှၤဂၤတၢ်ကမၣ်.”

ပမ့ၢ်ပျၢ်ကွံာ်ပှၤတၢ်ကမၣ်

တၢ်သူၣ်ခုသးခုကတူၢ်ဘၣ်.

၃. ပှၤသးကညီၤတၢ် ကသးခု.

တၢ်သးကညီၤကဒိးန့ၢ်က့ၤ.

ဖဲလၢနဟ့ၣ်သးကညီၤတၢ်

တကြၢးမုၢ်လၢ်ပှၤပတြၢၤနၤ.

ယွၤထံၣ်ကယဲၢ်တၢ်လၢပမၤ,

ယွၤန့ၣ်ကဟ့ၣ်ဆၢနၤသပှၢ်.

ပှၤလၢသးကညီၤပှၤအဂၤ

လၢယွၤမဲာ်ညါဖျါဃံဖျါလၤ.