၂ တၢ်ဟံးစုနဲၣ်ကျဲလၢ ပကဘှီဘၣ်ထီၣ်က့ၤ ပတၢ်ကီတၢ်ခဲတဖၣ်အဂီၢ်
တၢ်ကီတၢ်ခဲတနီၤလၢ ပထံၣ်ဘၣ်န့ၣ် ယံာ်ဝဲလၢအနံၣ်တဖၣ်န့ၣ်လီၤ. အဃိ ပကဘှီဘၣ်ထီၣ်က့ၤအီၤအဂီၢ်န့ၣ် ကကီဝဲလီၤ. ဘၣ်ဆၣ် ဒ်သိးပလဲၤခီဖျိတၢ်ကီတၢ်ခဲတဖၣ်အံၤ ကန့ၢ်ကဂီၢ် မ့ၢ်လံာ်စီဆှံအတၢ်ဟံးစုနဲၣ်ကျဲအိၣ်ဧါ. ပကဆိကမိၣ်ကွၢ် တၢ်အဒိတနီၤလီၤ.
သူၣ်ကိၢ်သးဂီၤတၢ် အါတလၢ
ရိစံၤ တဲဝဲလၢ “ယဘၣ်ယိၣ်တၢ်အါတလၢအဃိ ယတၢ်ဆိကမိၣ်န့ၣ်ပှဲၤဝဲဒီး တၢ်သူၣ်ကိၢ်သးဂီၤတုၤဒၣ်လဲာ် တၢ်လၢတဟဲကဲထီၣ်အသးဒံးဘၣ် သနာ်က့ ယသူၣ်ကိၢ်သးဂီၤဒိၣ်မးလီၤ.” ဒ်သိးအတၢ်သူၣ်ကိၢ်သးဂီၤ ကလီၤစှၤအဂီၢ် မးသဲ ၆:၃၄ ကဲထီၣ်တၢ်မၤစၢၤလၢအဂီၢ်လီၤ. လံာ်စီဆှံတဆၢအံၤ တဲဝဲလၢ– “မၤသးဒ်န့ၣ်ဒီး ဘၣ်ယိၣ်တၢ်လၢ ခဲဂီၤအဂီၢ်တဂ့ၤ. အဂ့ၢ်ဒ်အံၤ, ခဲဂီၤန့ၣ် ကဘၣ်ယိၣ်တၢ်လၢ အဂီၢ်ဒၣ်ဝဲလီၤ. မုၢ်တနံၤအတၢ်အၢတၢ်နးန့ၣ် အါလံလၢအဂီၢ်လံ.” ရိစံၤ တဲဝဲလၢ ယ့ၣ်ၡူးအတၢ်ကတိၤတဖၣ်အံၤ မၤစၢၤအီၤဒ်သိး အတသူၣ်ကိၢ်သးဂီၤ ဘၣ်ဃးဒီးတၢ်လၢ ကဟဲကဲထီၣ်အသးလၢခါဆူညါလၢၤဘၣ်. အဝဲတဲကဒီးဝဲလၢ “ယတၢ်ကိၢ်တၢ်ဂီၤလၢ တနံၤဘၣ်တနံၤအဂီၢ်န့ၣ်အါလံ. ခါဆူညါတၢ်ကဟဲကဲထီၣ်အသး ဒ်လဲၣ်ဒ်လဲၣ်န့ၣ်ပတသ့ၣ်ညါလီၤတံၢ်ဘၣ်အဃိ ပတလိၣ်သူၣ်ကိၢ်သးဂီၤအီၤဘၣ်.”
ယဲ(စ်)မ့ၤ စ့ၢ်ကီးတဲဝဲလၢ အတၢ်သူၣ်ကိၢ်သးဂီၤန့ၣ် မၤဘၣ်ဒိအီၤဒိၣ်မးလီၤ. အဝဲတဲဝဲလၢ “လၢတနွံအတီၢ်ပူၤန့ၣ် ယဘၣ်ဟီၣ်ခံသီသၢသီညါ. ဒီးတဘျီတခီၣ်န့ၣ် ယမံတန့ၢ်ဘၣ်. ယတၢ်သူၣ်ကိၢ်သးဂီၤတဖၣ်န့ၣ် မၤဘၣ်ဒိယတၢ်အိၣ်မူ သပှၢ်ကတၢၢ်လီၤ.” ဘၣ်ဆၣ် အဝဲတဲဝဲလၢ ၁ ပ့းတရူး ၅:၇ န့ၣ်ကဲထီၣ်တၢ်မၤစၢၤလၢအဂီၢ်လီၤ. လံာ်စီဆှံတဆၢအံၤတဲဝဲလၢ– “ကယဲၢ်သုတၢ်ဘၣ်ယိၣ်ဘၣ်ဘီန့ၣ်, ပာ်ထီၣ်လၢအဝဲဒၣ်အလိၤခဲလၢာ်တက့ၢ်. အဂ့ၢ်ဒ်အံၤ, အသးအိၣ်သုလီၤ.” ဒီးယဲ(စ်)မ့ၤ တဲစ့ၢ်ကီးဝဲလၢ– “ဒ်တၢ်ဆၢကတီၢ် လဲၤပူၤကွံာ်အသိး ယဆဲးဃ့ထုကဖၣ်တၢ်လၢ ယဟိဝၤယွၤအအိၣ်ထီဘိလီၤ. ဒီးယထံၣ်ဘၣ်လၢ ကစၢ်ယွၤစံးဆၢယတၢ်ထုကဖၣ်အဃိ ယတူၢ်ဘၣ်လၢ ယတၢ်ဝံတၢ်ယိးလၢအဃၢန့ၣ် ဘၣ်တၢ်ဟံးထီၣ်ကွံာ်အီၤလၢ ယဖံဘၣ်ခိၣ်န့ၣ်လီၤ. ခဲအံၤ ယတၢ်သူၣ်ကိၢ်သးဂီၤတဖၣ် မ့ၢ်ဟဲပၢၢ်ထီၣ် တဘျီတခီၣ်သနာ်က့ ယဘၣ်တြီဆၢအီၤဒ်လဲၣ်န့ၣ် ယသ့ၣ်ညါလီၤ.”
တၢ်ထုးယံာ်တၢ်ဆၢကတီၢ်
ပိာ်မုၣ်သးစၢ်တဂၤလၢ အမံၤလၢ အံၤစဘဲလၤ န့ၣ်တဲဝဲလၢ– “ယထုးယံာ်တၢ်ဆၢကတီၢ်ထီဘိလီၤ. တၢ်မၤလၢအရ့ဒိၣ်လၢ ယဘၣ်မၤဝံၤအီၤန့ၣ် ယတမၤဝံၤအီၤတဘျီဃီဘၣ်. ယဆ့ၣ်နီၤကွၢ် တၢ်ဂီၤမူ အ့အ့ဆ့ဆ့လီၤ. ယဆိကမိၣ် ယလုၢ်လၢ်တခါအံၤ ဟဲလီၤစၢၤလၢယပါအအိၣ်လီၤ. ခီဖျိယပါနာ်က့ ကဲပှၤဒ်န့ၣ်လီၤ. ဘၣ်ဆၣ် ပမ့ၢ်ထုးယံာ်တၢ်ဆၢကတီၢ် ဒီးပမ့ၢ်တမၤဝံၤပတၢ်မၤ တဘျီဃီန့ၣ် ဖဲတၢ်ဆၢကတီၢ်ဘူးထီၣ်အခါ ပကဘၣ်မၤတၢ်ကရီကဒး ဒီးကဲထီၣ်တၢ်သူၣ်ကိၢ်သးဂီၤ လၢပဂီၢ်လီၤ.” လံာ်စီဆှံအတၢ်ဟံးစုနဲၣ်ကျဲ လၢအကဲထီၣ်တၢ်မၤစၢၤလၢအဂီၢ်န့ၣ် မ့ၢ်ဝဲ ၂ တံၤမသ့း ၂:၁၅ လၢတဲဝဲလၢ– “ကျဲးစၢးကဲထီၣ်လၢ ပှၤဘၣ်ယွၤအသး, ပှၤမၤတၢ်ဖိလၢအမဲာ်ဆှးအလီၢ်တအိၣ်ဘၣ်.” ဒီးအံၤစဘဲလၤ တဲဝဲလၢ “ယတအဲၣ်ဒိးလၢယဟိဝၤယွၤ အသးဘၣ်ဒိလၢယဃိ ခီဖျိလၢယထုးယံာ်တၢ်ဆၢကတီၢ် ဒီးမၤဝံၤတၢ်မံၤဘၣ်.” အဃိ အံၤစဘဲလၤ ဆီတလဲကွံာ်အတၢ်အိၣ်မူန့ၣ်လီၤ.
ခဲစံၤ စ့ၢ်ကီးတဲဝဲလၢ– “ခီဖျိယတမၤဝံၤယတၢ်မၤတဘျီဃီဘၣ်အဃိ မၤဘၣ်ဒိယၤဒိၣ်မးလီၤ. ဖဲတၢ်ဆၢကတီၢ်ဘူးထီၣ်အခါ တၢ်ကိၢ်တၢ်ဂီၤဘၣ်ယၤ, ယမံတန့ၢ်ဘၣ် ဒီးယဘၣ်ဟီၣ်လီၤ.” လံာ်စီဆှံတဆၢ လၢကဲထီၣ်တၢ်မၤစၢၤလၢ ခဲစံၤ အဂီၢ်န့ၣ်မ့ၢ်ဝဲ ကတိၤဒိ ၁၃:၁၆ လၢတဲဝဲလၢ– “ကယဲၢ်ပှၤလၢအကူၣ်တၢ်ဘၣ်န့ၣ် မၤဝဲဒီးတၢ်သ့ၣ်ညါလီၤ. မ့မ့ၢ်ပှၤဟးဂီၤဖိန့ၣ် သလၣ်ထီၣ်ပှၤဟးဂီၤဖိအတၢ်န့ၣ်လီၤ.” ခီဖျိလၢ အဝဲဆိကမိၣ်ထံ လံာ်စီဆှံတဆၢအံၤအဃိ အဝဲနၢ်ပၢၢ်ထီၣ်ဝဲလၢ– “ပမ့ၢ်ရဲၣ်လီၤကျဲၤလီၤ ဆိပာ်စၢၤပတၢ်မၤဂ့ၤဂ့ၤန့ၣ် မ့ၢ်ကျဲလၢအဂ့ၤလီၤ. အဃိ ခဲအံၤ ယကွဲးနီၣ်ဃာ်တၢ်လၢ ယဘၣ်မၤအီၤတဖၣ်လၢလံာ်ပူၤလီၤ. ခီဖျိလၢယမၤဒ်န့ၣ်အဃိ ယမၤဝံၤယတၢ်မၤ ဘၣ်ဆၢဘၣ်ကတီၢ်လီၤ.”
တူၢ်ဘၣ်တၢ်အိၣ်သယုၢ်သညိ
ခၢၣ်စတ့ၤ တဲဝဲလၢ “ယဝၤပာ်တ့ၢ်ယၤဒီး ယဖိလွံၢ်ဂၤန့ၣ်လီၤ.” ဒ်သိး အဝဲလဲၤခီဖျိတၢ်ကီတၢ်ခဲအံၤကန့ၢ်အဂီၢ် ကတိၤဒိ ၁၇:၁၇ ကဲထီၣ်တၢ်မၤစၢၤလၢအဂီၢ်န့ၣ်လီၤ. လံာ်စီဆှံတဆၢအံၤ တဲဝဲလၢ–“ပှၤအတံၤအသကိးအဲၣ်တၢ်ကိးအဆၢအကတီၢ်ဒဲး, ဒီးပှၤဒီပုၢ်ဝဲၢ်အိၣ်ဖျဲၣ်ဝဲလၢ တၢ်မၤကိၢ်မၤဂီၤအဂီၢ်လီၤ.” ခၢၣ်စတ့ၤ လူၤပိာ်ထွဲဝဲလံာ်စီဆှံတဆၢအံၤ အတၢ်ဟံးစုနဲၣ်ကျဲ ဒီးဂုာ်ကျဲးစၢးရ့လိာ်သးဒီးဒီပုၢ်ဝဲၢ်လၢတၢ်အိၣ်ဖှိၣ်အပူၤန့ၣ်လီၤ. ခီဖျိမၤဝဲဒ်န့ၣ်အဃိ အတဲဝဲလၢ “ဒီပုၢ်ဝဲၢ်တဖၣ် မၤစၢၤယၤလၢကျဲအါဘိလီၤ. တနီၤ ဟဲပာ်တ့ၢ်န့ၢ်ယၤ တၢ်အီၣ်တၢ်အီ ဒီးဖီတဖၣ် လၢယဟံၣ်န့ၣ်လီၤ. ဒီးဖဲယဘၣ်သုးဟံၣ်သၢဘျီအခါန့ၣ် အဝဲသ့ၣ်ဟဲမၤစၢၤယၤထီဘိလီၤ. မ့မ့ၢ်ဒီပုၢ်ဝဲၢ်အဂၤတဂၤ ဃုစၢၤယၤတၢ်မၤန့ၣ်လီၤ. ဖဲယလိၣ်ဘၣ်တၢ်မၤစၢၤအခါ ဒီပုၢ်ဝဲၢ်တဖၣ်ဟဲမၤစၢၤယၤထီဘိလီၤ.”
ဒဲ(လ်)ဖံ လၢပတဲဖျါထီၣ်အဂ့ၢ်လၢအခီၣ်ထံးန့ၣ် တူၢ်ဘၣ်ဝဲတၢ်အိၣ်သယုၢ်သညိစ့ၢ်ကီးလီၤ. အတဲဝဲလၢ– “ယထံၣ်ဘၣ်ပှၤဂၤသ့ၣ်တဖၣ် အိၣ်ဘၣ်တပူၤဃီ မ့မ့ၢ်ယၤန့ၣ် ယဘၣ်အိၣ်ထဲတဂၤဧိၤအဃိ ယသးသယုၢ်သညိဒိၣ်မး.” လံာ်စီဆှံတဆၢလၢ ကဲထီၣ်တၢ်မၤစၢၤလၢအဂီၢ်န့ၣ် မ့ၢ်ဝဲ စံးထီၣ်ပတြၢၤ ၆၈:၆ လၢတဲဝဲလၢ– “ပှၤလၢအအိၣ်သယုၢ်တဂၤဧိၤန့ၣ် ယွၤပာ်ဝဲလၢဟံၣ်ပူၤလီၤ.” ဒီးအဝဲတဲဝဲလၢ– “ယသ့ၣ်ညါလၢ လံာ်စီဆှံတဆၢအံၤ တအဲၣ်ဒိးတဲဝဲ ထဲဟံၣ်အနီၢ်ကီၢ်ဘၣ်. လၢခံ ယနၢ်ပၢၢ်ထီၣ်က့ၤလၢ လံာ်စီဆှံတဆၢအံၤ အဲၣ်ဒိးတဲဝဲလၢ ကစၢ်ယွၤကဟ့ၣ်လီၤစ့ၢ်ကီးပှၤ ဟံၣ်လၢနီၢ်သးတခီလီၤ. ဟံၣ်အံၤ ဟ့ၣ်ယၤတၢ်ဘံၣ်တၢ်ဘၢနီၢ်နီၢ် ဒီးယရ့ဘၣ်လိာ်သးဒီး ပှၤလၢ အအဲၣ်ယဟိဝၤယွၤန့ၣ်လီၤ. ဘၣ်ဆၣ် ယသ့ၣ်ညါလီၤယသးလၢ ဒ်သိးယရ့လိာ်သးဒီးပှၤဂၤ ဘူးဘူးတံၢ်တံၢ်ကန့ၢ်အဂီၢ်န့ၣ် ယဘၣ်သုးဘူးဆိယသးဆူ ယဟိဝၤယွၤအအိၣ်န့ၣ်လီၤ. ယမၤဒ်အံၤကန့ၢ်အဂီၢ် စံးထီၣ်ပတြၢၤ ၃၇:၄ ကဲထီၣ်တၢ်မၤစၢၤလၢယဂီၢ်လီၤ. လံာ်စီဆှံတဆၢအံၤတဲဝဲလၢ– ‘မုာ်လၤစ့ၢ်ကီးတၢ်လၢ ယွၤအပူၤတက့ၢ်. ဒီးကဟ့ၣ်လီၤနၤလၢ နသးအတၢ်ဃ့တဖၣ်လၢနသးလီၤ.’”
ဒဲ(လ်)ဖံ တဲကျၢၢ်တံၢ်က့ၤ အတၢ်ကတိၤလၢ– “ယသ့ၣ်ညါလီၤယသးလၢ ယဘၣ်ဂုာ်ကျဲးစၢး ရ့လိာ်သးဒီးယဟိဝၤယွၤ ဘူးဘူးတံၢ်တံၢ်လီၤ. ဒီးယရဲၣ်လီၤကျဲၤလီၤ ဒ်သိးယရ့လိာ်သးဒီး ဒီပုၢ်ဝဲၢ်တဖၣ်လၢ တၢ်အိၣ်ဖှိၣ်ပူၤကန့ၢ်အဂီၢ်လီၤ. ခီဖျိလၢ ယရ့လိာ်သးဒီး ပှၤဂၤအါထီၣ်အဃိ ယတၢ်ထံၣ်လၢပှၤဂၤအဖီခိၣ်န့ၣ် ဂ့ၤထီၣ်ဒီး ညီလၢယကကွၢ်ကပၤကွံာ် ပှၤဂၤအတၢ်ဂံၢ်စၢ်ဘါစၢ်တဖၣ်န့ၣ်လီၤ.”
ဒ်ပှၤဂၤအသိး ယဟိဝၤပှၤအုၣ်အသးတဖၣ် မ့ၢ်ပှၤလၢအတလၢတပှဲၤဘၣ် ဒီးထံၣ်ဘၣ်ဝဲတၢ်ကီတၢ်ခဲတဖၣ်စ့ၢ်ကီးလီၤ. ဘၣ်ဆၣ် ပမ့ၢ်သ့ၣ်ညါ လံာ်စီဆှံတၢ်မ့ၢ်တၢ်တီန့ၣ် ပကသးအိၣ်မၤစၢၤပှၤဂၤလီၤ. အဃိ နမ့ၢ်ဃုထၢအဝဲသ့ၣ်လၢ နတံၤသကိးန့ၣ် မ့ၢ်ကျဲလၢအဂ့ၤကတၢၢ်လီၤ. ဘၣ်ဆၣ် ဘၣ်ဃးဒီးတၢ်ကီတၢ်ခဲတနီၤလၢ ပှၤဘှီဘၣ်ထီၣ်က့ၤအီၤလၢ မုၢ်မဆါတနံၤအံၤတန့ၢ်ဘၣ်, ဒ်သိးဒီး တၢ်ဆါယံာ်ယံာ်ထၢထၢ ဒီးတၢ်သူၣ်အုးသးအုးန့ၣ် လံာ်စီဆှံအတၢ်ဟံးစုနဲၣ်ကျဲတဖၣ် မၤစၢၤပှၤကသ့ဒံးဧါ.
နမ့ၢ်မၤထွဲ လံာ်စီဆှံအတၢ်ဟံးစုနဲၣ်ကျဲန့ၣ် ကမၤစၢၤနၤဒ်သိး နကထံၣ်န့ၢ် တံၤသကိးလၢအဂ့ၤတဖၣ်အဂီၢ်
You May Also Like
တၢးထီခိးတၢ်—လံာ်လၢတၢ်မၤလိအဂီၢ်
တဘၣ်သူၣ်ကိၢ်သးဂီၤ တၢ်အါတလၢတဂ့ၤ
ယ့ၣ်ၡူးတစံးဝဲထဲလၢ ပတဘၣ်သူၣ်ကိၢ်သးဂီၤ လၢၤတၢ်န့ၣ်ဘၣ် စံးစ့ၢ်ကီးဝဲလၢ ပကဘၣ်မၤဒ်လဲၣ် အဂ့ၢ်န့ၣ်လီၤ.
