ဖဲ​န​အဲၣ်ဒိး​သ့ၣ်ညါ​ပှၤ​တဂၤ​အခါ အဆိ​ကတၢၢ်​န​သံကွၢ်​အီၤ​လၢ “န​မံၤ​ဒ်လဲၣ်” န​မ့ၢ်​သံကွၢ်​ကစၢ်​ယွၤ လၢ​တၢ်​သံကွၢ်​တဖျၢၣ်​အံၤန့ၣ်​ အဝဲ​က​စံးဆၢ​နၤ​ဒ်လဲၣ်.

“ယဲဒၣ်အံၤ​ယ​မ့ၢ်​ယွၤ [“ယဟိဝၤ,” NWT] လီၤ. အဝဲ​န့ၣ်​မ့ၢ်​ယ​မံၤ​လီၤ.” —ယၡါယၤ ၄၂:၈.

လၢ​ကစၢ်​ယွၤ​အဂီၢ်​န့ၣ်​ အ​မံၤ​မ့ၢ်​တၢ်​လၢ​အရ့ဒိၣ်. ကစၢ်​ယွၤ​န့ၣ်​ ပှၤ​တ​ယုၢ်​န့ၢ်​အ​မံၤ​နီ​တဂၤ​ဘၣ်. အ​နီၢ်ကစၢ်​ဒၣ်ဝဲ ယုၢ်န့ၢ်ဝဲ​လီၤ. ယဟိဝၤ​ယွၤ​တဲဝဲ “အန့ၣ်​မ့ၢ် ယ​မံၤ​လီၤထူ​လီၤယိာ်, ဒီး​အန့ၣ်​ မ့ၢ်​တၢ်ဒုး​သ့ၣ်နီၣ်​ထီၣ်​ယၤ အစိၤစိၤ​အ​ဃၣ်ဃၣ်​လီၤ.” (၂ မိၤၡ့ ၃:၁၅) လၢ​လံာ်စီဆှံ​ပူၤ ကစၢ်​ယွၤ​အ​မံၤ​န့ၣ်​ အိၣ်ဝဲ​အဘျီ​အါန့ၢ်ဒံး အ​မံၤလၤ​သၣ်ကပီၤ ဒ်သိး​ဒီး သ့တၢ်လၢာ်​ကစၢ်, ပၢ်, ကစၢ် မ့တမ့ၢ် ယွၤ​န့ၣ်​လီၤ. တကးဒံးဘၣ်​ ကစၢ်​ယွၤ​အ​မံၤ​န့ၣ်​ ဘၣ်​တၢ်​ယၢၤထီၣ်​အီၤ အဘျီ​အါန့ၢ်ဒံး ပှၤ​မံၤ​အဂၤ​ဒ်သိး​ဒီး စီၤ​အၤဘြၤဟၣ်, စီၤ​မိၤၡ့, စီၤ​ဒၤဝံး ဒီး​ယ့ၣ်ၡူး​န့ၣ်​လီၤ. လၢ​တၢ်​န့ၢ်​အဃိ ပ​သ့ၣ်ညါ​ဘၣ်​လၢ ယဟိဝၤ​ယွၤ​အဲၣ်ဒိး​လၢ ပ​က​သ့ၣ်ညါ​အ​မံၤ​လီၤ. လံာ်စီဆှံ​ပာ်ဖျါ​ထီၣ်ဝဲ​လၢ “ဒီး​က​သ့ၣ်ညါ​လၢ နဲ​ဒၣ်​တဂၤဃီ​လၢ​န​မံၤ​မ့ၢ်​ယဟိဝၤ​န့ၣ်​ မ့ၢ်​တၢ်​ထီကတၢၢ်​တဂၤ​လၢ ဟီၣ်ခိၣ်​ဒီဘ့ၣ်​ညါ​အ​ဖီခိၣ်​လီၤ.”—စံးထီၣ်​ပတြၢၤ ၈၃:၁၈.

လၢ​ယ့ၣ်ၡူး​အဂီၢ်​န့ၣ်​ ကစၢ်​ယွၤ​အ​မံၤ မ့ၢ်​တၢ်​လၢ​အရ့ဒိၣ်. ယ့ၣ်ၡူး​သိၣ်လိ​အပျဲၢ်​အဘီၣ်​လၢ က​ဃ့​ထုကဖၣ်​ဒ်အံၤ “မ်​န​မံၤ​ဘၣ်​တၢ်​ပာ်စီဆှံ​တက့ၢ်.” တၢ်​ထုကဖၣ်​အံၤန့ၣ်​ ဘၣ်​တၢ်​ကိး​အီၤ​လၢ ခရံာ်​အ​တၢ်​ထုကဖၣ်​န့ၣ်​လီၤ. (မးသဲ ၆:၉) ယ့ၣ်ၡူး​အ​နီၢ်ကစၢ်​ဒၣ်ဝဲ ဃ့​ဘါ​ထုကဖၣ်​လၢ ကစၢ်​ယွၤ​အ​အိၣ်​ ဒီး​တဲဝဲ​လၢ “ပၢ်ဧၢ, ဒုး​လၤကပီၤ န​မံၤ​တက့ၢ်.” (ယိၤဟၣ်​ ၁၂:၂၇) လၢ​ယ့ၣ်ၡူး​အ​တၢ်အိၣ်မူ​ပူၤ တၢ်​လၢ​အရ့ဒိၣ်​ကတၢၢ်​န့ၣ်​မ့ၢ်ဝဲ တၢ်မၤ​လၤကပီၤ အ​ပၢ်​မံၤ​လီၤ. လၢတၢ်န့ၣ်​အဃိ အဝဲ​ဃ့​ဘါ​ထုကဖၣ်​လၢ “ယ​ဘိးဘၣ်​သ့ၣ်ညါ​လံ​အီၤ​လၢ​န​မံၤ, ဒီး​ယ​က​ဘိးဘၣ်​သ့ၣ်ညါ​လီၤ.”—ယိၤဟၣ်​ ၁၇:၂၆.

 ကစၢ်​ယွၤ​အ​မံၤ​န့ၣ်​ မ့ၢ်​တၢ်​လၢ​အရ့ဒိၣ်​လၢ ပှၤလၢ​အ​သ့ၣ်ညါ​အီၤ​တဖၣ်​အဂီၢ်. လၢပျၢၤ​ယွၤ​အခ့အပှၤ​တဖၣ်​ နၢ်ပၢၢ်​ဝဲ​လၢ တၢ်​ဒီသဒၢ ဒီး​တၢ်မၤ​ပူၤဖျဲး​န့ၣ်​ ဘၣ်ထွဲ​လိာ်အသး​ဒီး ကစၢ်​ယွၤ​အ​မံၤ​လီၤ. “ယွၤ​အ​မံၤ​မ့ၢ်​တၢးထီ​ခၢၣ်သနၢၢ်​လီၤ. ပှၤတီ​ပှၤလိၤ​န့ၣ် ဃ့ၢ်​နုာ်​ဆူ​အ​ပူၤ, ဒီး​အိၣ်​ပူၤဖျဲးဝဲ​လီၤ.” (ကတိၤဒိ ၁၈:၁၀) “ဖဲဒၣ်​ပှၤလၢ​အ​ကိးထီၣ်​ ကစၢ် [“ယဟိဝၤ,” NWT] အ​မံၤ​တဂၤ​လၢ်လၢ်​န့ၣ် က​ပူၤဖျဲးဝဲ​လီၤ.” (ယိၤအ့လး ၂:၃၂) လံာ်စီဆှံ​ပာ်ဖျါ​ထီၣ်ဝဲ​လၢ ကစၢ်​ယွၤ​အ​မံၤ​န့ၣ်​ ပာ်ဖျါ​လီၤဆီ​ဝဲ ပှၤလၢ​အ​ဘူၣ်ထီၣ်​ဘါထီၣ်​အီၤ​တဖၣ်​လီၤ. “ပှၤ​ဂီၢ်မုၢ်​ခဲလၢာ် လဲၤတၢ်​တဂၤ​လၢ အ​ကစၢ်​အ​မံၤ​ပူၤ​စုာ်စုာ်, ဒီး​ပ​က​လဲၤတၢ်​ပဝဲ​လၢ ယွၤ​ပ​ကစၢ်​အ​မံၤ​ပူၤ လီၤထူ​လီၤယိာ်​လီၤ.”—မံကၤ ၄:၅; မၤတၢ် ၁၅:၁၄.

မံၤ​အံၤ​ကြၢး​ဝဲ ထဲ​ယဟိဝၤ​ယွၤ​တဂၤဧိၤ​လီၤ. ပှၤ​ကူၣ်ဘၣ်​ကူၣ်သ့​အါဂၤ လၢ​အ​ဘၣ်ဃး​ဒီး​လံာ်စီဆှံ​န့ၣ်​ တဲဝဲ​လၢ ယွၤ​အ​မံၤ​ယဟိဝၤ​န့ၣ်​ အခီပညီ​မ့ၢ်ဝဲ “အဝဲ​ဒုး​ကဲထီၣ်​တၢ်” လီၤ. ယဟိဝၤ​ယွၤ​ပာ်ဖျါ​ထီၣ်​ အ​မံၤ​အခီပညီ​ဖဲ အဝဲ​ကတိၤ​တၢ်​ဒီး​စီၤ​မိၤၡ့​အခါ​န့ၣ်​လီၤ. အဝဲ​တဲဝဲ​လၢ “ယ​က​ကဲထီၣ်​ တၢ်​လၢ​ယ​အဲၣ်ဒိး​ကဲထီၣ်.” (၂ မိၤၡ့ ၃:၁၄, NWT) ကစၢ်​ယွၤ​အ​မံၤ​အခီပညီ​န့ၣ်​ တမ့ၢ်​ထဲ အဝဲ​မ့ၢ်​တၢ်ဘၣ်တ့​ကစၢ် လၢ​အ​တ့လီၤ​တၢ်​ခဲလၢာ်​န့ၣ်​ဘၣ်. ဒ်သိး​အ​တၢ်တိာ်ပာ် က​လၢထီၣ်​ပှဲၤထီၣ်​အဂီၢ် အဝဲ​အိၣ်ဒီး​တၢ်​သ့​တၢ်ဘၣ်​လၢ အ​က​ဒုး​ကဲထီၣ်​ အ​နီၢ်ကစၢ် မ့တမ့ၢ် အ​တၢ်ဘၣ်တ့​တဖၣ်​ ဒ်​အ​အဲၣ်ဒိး​ဒုး​ကဲထီၣ်​ဝဲ​အသိး​သ့​လီၤ. မ့မ့ၢ်​အ​မံၤလၤ​သၣ်ကပီၤ​တဖၣ်​န့ၣ်​ ပာ်ဖျါ​ထီၣ်ဝဲ ကစၢ်​ယွၤ​အလီၢ်​အလၤ, အ​တၢ်​န့ၢ်စိ​န့ၢ်ကမီၤ မ့တမ့ၢ် အ​တၢ်စိ​တၢ်ကမီၤ​လီၤ. ထဲဒၣ်​အ​မံၤ ယဟိဝၤ န့ၣ်​ပာ်ဖျါ​ထီၣ်ဝဲ​လၢ​အမ့ၢ်​ယွၤ ဒ်လဲၣ်​တဂၤ​လဲၣ်​ ဒီး​အဝဲ​ဒုး​ကဲထီၣ်​ဝဲ တၢ်မနုၤ​တဖၣ်​သ့​လဲၣ်န့ၣ်​လီၤ.

ကစၢ်​ယွၤ​အ​မံၤ​န့ၣ်​ ပာ်ဖျါ​ထီၣ်ဝဲ​လၢ အ​သူၣ်အိၣ်​သးအိၣ်​ပှၤ. ကစၢ်​ယွၤ​အ​မံၤ​အခီပညီ​န့ၣ်​ ပာ်ဖျါ​ထီၣ်​လၢ အဝဲ​သူၣ်အိၣ်​သးအိၣ်​ အ​တၢ်ဘၣ်တ့ ဃုာ်ဒီး​ပဝဲ​ခဲလၢာ်​လီၤ. တကးဒံးဘၣ်​ မ့ၢ်​လၢ​အဝဲ​အဲၣ်ဒိး​လၢ ပ​က​သ့ၣ်ညါ​အီၤ​အဃိ အ​ဒုး​သ့ၣ်ညါ​ပှၤလၢ​အ​မံၤ​လီၤ. တချုး​လၢ ပ​သံကွၢ်​အ​မံၤ​ဒံး​ဘၣ်​န့ၣ်​ အဝဲ​ဒုး​သ့ၣ်ညါ​ဆိ​ပှၤ​လံ. ကစၢ်​ယွၤ​တ​အဲၣ်ဒိး​လၢ ပ​က​သ့ၣ်ညါ​အီၤ​ဒ်​အမ့ၢ် ပှၤ​နီၢ်သး​ဖိ​လၢ​အ​အိၣ်ယံၤ​ဒီး​ပှၤ​န့ၣ်​ဘၣ်. လၢ​တၢ်​န့ၢ်​အလီၢ် အဝဲ​အဲၣ်ဒိး​လၢ ပ​က​သ့ၣ်ညါ​အီၤ​ဒ်​ပှၤ​နီၢ်နီၢ်​တဂၤ လၢ​ပ​သုးဘူး​ပ​သး​ဆူ​အ​အိၣ်​သ့​န့ၣ်​လီၤ.—စံးထီၣ်​ပတြၢၤ ၇၃:၂၈.

ပ​မ့ၢ်​သူ​ကစၢ်​ယွၤ​အ​မံၤ​န့ၣ်​ မ့ၢ်ဒၣ်​ပ​ပာ်ဖျါ​ထီၣ်​လၢ ပ​သးအိၣ်​အီၤ. အဒိ, န​မ့ၢ်​အဲၣ်ဒိး​လၢ ပှၤ​တဂၤ​ကဲထီၣ်​န​တံၤသကိး​န့ၣ်​ န​ကမၢ​အဝဲ​ကိးနၤ​လၢ​န​မံၤ​လီၤ. ဘၣ်ဆၣ်​ ပှၤ​တဂၤ​အံၤ​မ့ၢ်​တ​အဲၣ်ဒိး ကိး​န​မံၤ​နီ​တစဲး​ဘၣ်​န့ၣ်​ န​က​တူၢ်ဘၣ်​ဒ်လဲၣ်. န​က​တူၢ်ဘၣ်​လၢ မ့ၢ်​ပှၤ​တဂၤ​အံၤ အဲၣ်ဒိး​ရ့​ဒီး​နၤ​အ​နီၢ်ကီၢ်​ဧါ. ကစၢ်​ယွၤ​စ့ၢ်ကီး ဒ်​န့ၣ်​အသိး​လီၤ. ယဟိဝၤ​ယွၤ​ဒုး​သ့ၣ်ညါ ပှၤ​ဟီၣ်ခိၣ်​ဖိ​တဖၣ်​လၢ​အ​မံၤ ဒီး​ဟ့ၣ်ဂံၢ်​ဟ့ၣ်ဘါ​ဝဲ​လၢ ပ​ကသူ​အ​မံၤ​လီၤ. ဖဲ​ပ​သူ​အ​မံၤ​အခါ မ့ၢ်ဒၣ်​ပ​ပာ်ဖျါ​ထီၣ်​လၢ ပ​အဲၣ်ဒိး​သုးဘူး​ပ​သး​ဆူ​အ​အိၣ်​န့ၣ်​လီၤ. ဘၣ်​မနုၤ​ဃိ​လဲၣ်န့ၣ်​ မ့ၢ်​လၢ​ကစၢ်​ယွၤ​အသး​အိၣ်​ပှၤ​တဖၣ်​လၢ​အ “ဆိကမိၣ်​တၢ်​လၢ အ​မံၤ​အဂ့ၢ်​အကျိၤ” န့ၣ်​လီၤ.—မၤလကံ ၃:၁၆.

ပ​သ့ၣ်ညါ​ထီၣ်​ ကစၢ်​ယွၤ​အ​မံၤ​န့ၣ်​ မ့ၢ်​ကျဲ​အဆိ​ကတၢၢ်​တဘိ​လၢ ပ​က​သ့ၣ်ညါ​အါထီၣ်​ အဂ့ၢ်​အကျိၤ ဘၣ်ဆၣ်​ ပ​ပာ်ပတုာ်ကွံာ်​အီၤ တ​သ့ဒံး​ဘၣ်. အဃိ ပ​က​ဘၣ်​ဆဲး​ဃု​သ့ၣ်ညါ​အါထီၣ်​အဂ့ၢ်​အကျိၤ ဒီး​အဝဲ​မ့ၢ်​ပှၤ​ဒ်လဲၣ်​တဂၤ​လဲၣ်န့ၣ်​လီၤ.