ကလီးစဲ ၃:၁-၂၅
၃ ဘၣ်ဆၣ် သုမ့မ့ၢ်ပှၤလၢအဘၣ် တၢ်မၤဂဲၤဆၢထၢၣ်အီၤ ဃုာ်ဒီးခရံာ်န့ၣ်+ ဆဲးသးစၢၢ်ဆၢ တၢ်အိၣ်လၢထးတက့ၢ်. ဖဲန့ၣ်န့ၣ် ခရံာ်ဆ့ၣ်နီၤလၢ ကစၢ်ယွၤ အစုထွဲလီၤ.+
၂ တဘၣ်သးစၢၢ်ဆၢ တၢ်အိၣ်လၢ ဟီၣ်ခိၣ်ချၢတဂ့ၤ.+ လၢတၢ်န့ၣ်အလီၢ် သးစၢၢ်ဆၢ တၢ်အိၣ်လၢထးတက့ၢ်.+
၃ သုသံတ့ၢ် ဒီးသုသးသမူ ဘၣ်တၢ်ပာ်ခူသူၣ်အီၤ ဃုာ်ဒီးခရံာ်လၢ ကစၢ်ယွၤအပူၤလီၤ.
၄ ဖဲခရံာ်လၢအမ့ၢ် ပတၢ်မူန့ၣ်+ ပာ်ဖျါထီၣ်အသးအခါ သုဝဲစ့ၢ်ကီး တၢ်ကပာ်ဖျါထီၣ်သုဃုာ်ဒီးအီၤ လၢတၢ်လၤကပီၤအပူၤလီၤ.+
၅ အဃိ မၤသံကွံာ် သုတၢ်သူၣ်လီသးကွံလၢ အအိၣ်လၢ သုနီၢ်ခိက့ၢ်ဂီၤတဖၣ်အပူၤ+ လၢအဘၣ်ဃးဒီး တၢ်မၤကမၣ်မုၣ်ကမၣ်ခွါ,* တၢ်တကဆှီဘၣ်တဖၣ်, တၢ်သးကတၢလၢ တၢ်ပၢၤသူၣ်ပၢၤသး တအိၣ်ဘၣ်,+ တၢ်မိၣ်န့ၢ်သးလီလၢအအၢ ဒီးတၢ်သးကွံတၢ် လၢအမ့ၢ် တၢ်ဘါတၢ်ဂီၤတၢ်ဖှီၣ်တကလုာ် န့ၣ်တက့ၢ်.
၆ ပှၤလၢ အမၤတၢ်သ့ၣ်တဖၣ်အံၤန့ၣ် ကစၢ်ယွၤ အတၢ်သးဒိၣ်ထီၣ် ကဟဲလီၤဘၣ် အဝဲသ့ၣ်လီၤ.
၇ သုဝဲစ့ၢ်ကီး လၢအပူၤကွံာ်န့ၣ် သုအိၣ်မူဒ်န့ၣ်လီၤ.+
၈ ဘၣ်ဆၣ် ခဲအံၤန့ၣ် သုကဘၣ်ပာ်တ့ၢ်ကွံာ် တၢ်သူၣ်ဒိၣ်သးဖျိး, တၢ်သးထီၣ်, တၢ်အၢတၢ်သီ,+ တၢ်ဒုၣ်ဒွဲၣ်စံးအၢ+ ဒီးတၢ်ကတိၤလၢ အဘၣ်အၢဘၣ်သီလၢ+ အဟဲထီၣ်လၢ သုကိာ်ပူၤလီၤ.
၉ တဘၣ် လံၣ်အီၣ်လီအီၣ်လိာ်သး တဂၤဒီးတဂၤတဂ့ၤ.+ ပတုာ်ကွံာ်* လုၢ်လၢ်သကဲာ်ပဝး လၢအပူၤကွံာ်+ ဒီးတၢ်လၢသုမၤတ့ၢ်လၢညါတဖၣ် န့ၣ်တက့ၢ်.
၁၀ ဒီးဒုးအိၣ်ထီၣ်* လုၢ်လၢ်သကဲာ်ပဝးအသီလၢ+ ကစၢ်ယွၤ ဟ့ၣ်လီၤဝဲတက့ၢ်. ခီဖျိ တၢ်သ့ၣ်ညါ လီၤတံၢ်လီၤဆဲးအဃိ ပလုၢ်လၢ်သကဲာ်ပဝး ဘၣ်တၢ်ဆီတလဲအီၤထီဘိ ဒီးကဲထီၣ်တၢ်အသီလၢ အလီၤဂာ်ဒ် ကစၢ်ယွၤ အတၢ်ဂ့ၤတၢ်ဝါတဖၣ်အသိးလီၤ.+
၁၁ ပမ့ၢ်မၤဒ်န့ၣ်န့ၣ် ပှၤကြံးဖိမ့ၢ်ဂ့ၤ, ပှၤယူဒၤဖိမ့ၢ်ဂ့ၤ, ပှၤဒိးတၢ်ကူးတရံးမ့ၢ်ဂ့ၤ, ပှၤတဒိးတၢ်ကူးတရံးဘၣ်မ့ၢ်ဂ့ၤ, ပှၤထံဂၤကီၢ်ဂၤဖိမ့ၢ်ဂ့ၤ, ပှၤစကူသ့ၤဖိမ့ၢ်ဂ့ၤ, ကုၢ်မ့ၢ်ဂ့ၤ, ပှၤလၢအိၣ်ဒီး တၢ်သဘျ့မ့ၢ်ဂ့ၤ တအိၣ်လၢၤဘၣ်. ဘၣ်ဆၣ် ခရံာ်ဘၣ်ထွဲဒီးပဝဲခဲလၢာ် ဒီးပအိၣ်လၢ အဖီလာ်လီၤ.+
၁၂ သုမ့ၢ် ပှၤလၢ ကစၢ်ယွၤဃုထၢထီၣ်ဝဲ+ ဒီးပှၤစီဆှံလၢအအဲၣ်ဘၣ်ဝဲတဖၣ်အဃိ ပာ်ဖျါထီၣ်* တၢ်သးကညီၤလၢ အအိၣ်ဒီး တၢ်အဲၣ်ဒီးတၢ်ကဟုကယာ်,+ တၢ်သူၣ်ဂ့ၤသးဝါ, တၢ်ဆီၣ်လီၤသး,+ တၢ်သူၣ်စူၤသးစူၤ+ ဒီးတၢ်ဝံသးစူၤတက့ၢ်.+
၁၃ တၢ်ပာ်ဒ့ၣ်ပာ်ကမၣ် အလီၢ်မ့ၢ်အိၣ်ဒၣ်လဲာ် ဆဲးဝံသးစူၤလိာ်သုသး+ ဒီးပျၢ်လိာ်သးတၢ်ကမၣ် တဂၤဒီးတဂၤ လၢာ်လၢာ်ဆ့ဆ့တက့ၢ်.+ ဒ်ယဟိဝၤယွၤ* ပျၢ်သုတၢ်ကမၣ် လၢာ်လၢာ်ဆ့ဆ့အသိးန့ၣ် သုကဘၣ်မၤ ဒ်န့ၣ်အသိး စ့ၢ်ကီးလီၤ.+
၁၄ တကးဒံးဘၣ် ပာ်ဖျါထီၣ်* တၢ်အဲၣ်တၢ်ကွံတက့ၢ်.+ တၢ်အဲၣ်တၢ်ကွံန့ၣ် မ့ၢ်ဝဲတၢ်စၢဃာ်လၢ အဒုးအိၣ်ဃူအိၣ်ဖိးတၢ် လၢလၢပှဲၤပှဲၤလီၤ.+
၁၅ မ်တၢ်သူၣ်မံသးမုာ်လၢ အဟဲလၢခရံာ်အအိၣ်န့ၣ် ပၢတၢ်လၢသုသးပူၤတက့ၢ်.+ ကစၢ်ယွၤ ကိးန့ၢ်သု ဒ်သိး သုကကဲထီၣ် နီၢ်ခိတဂၤဃီ ဒီးအိၣ်ဒီးတၢ်သူၣ်မံသးမုာ်လီၤ. ဒီးပာ်ဖျါထီၣ် တၢ်စံးဘျုးစံးဖှိၣ် ထီဘိတက့ၢ်.
၁၆ မ်ခရံာ်အတၢ်သိၣ်လိ အိၣ်ဝဲဆိးဝဲလၢသုသးပူၤ လၢလၢပှဲၤပှဲၤ ဒီးသုကကဲထီၣ် ပှၤကူၣ်တၢ်သ့လီၤ. ဆဲးသိၣ်လိလိာ်သုသး ဒီးဟ့ၣ်ဂံၢ်ဟ့ၣ်ဘါလိာ်သးလၢ ထါစံးထီၣ်ပတြၢၤ,+ တၢ်စံးထီၣ်ပတြၢၤယွၤ, တၢ်ဘူၣ်ထီၣ်ဘါထီၣ်အတၢ်သးဝံၣ်* လၢအဘၣ် တၢ်သးဝံၣ်အီၤလၢ တၢ်စံးဘျုးစံးဖှိၣ် အပူၤတက့ၢ်. ဒီးသးဝံၣ်စံးထီၣ်ပတြၢၤ ယဟိဝၤယွၤ လၢသူၣ်ဒီဖျၢၣ်သးဒီဖျၢၣ်တက့ၢ်.*+
၁၇ လၢတၢ်ကတိၤမ့ၢ်ဂ့ၤ, လၢတၢ်မၤမ့ၢ်ဂ့ၤ တၢ်လၢသုမၤ တမံၤဂ့ၤတမံၤဂ့ၤန့ၣ် မၤအီၤခဲလၢာ်လၢ ကစၢ်ယ့ၣ်ၡူးအမံၤအပူၤတက့ၢ်. ဒီးစံးဘျုး ပၢ်ကစၢ်ယွၤ ခီဖျိလၢအီၤတက့ၢ်.+
၁၈ မါသ့ၣ်ဧၢ, ဒိးပၢသုသးလၢ သုဝၤအဖီလာ်+ ဒ်ကစၢ်အပျဲၢ်အဘီၣ် ကြၢးမၤဝဲအသိး န့ၣ်တက့ၢ်.
၁၉ ဝၤသ့ၣ်ဧၢ, ဆဲးအဲၣ်သုမါ+ ဒီးတဘၣ်သးဒိၣ်ထီၣ် အဝဲသ့ၣ်တဂ့ၤ.*+
၂၀ ဖိသၣ်သ့ၣ်ဧၢ, ဒိကနၣ် သုမိၢ်သုပၢ်လၢ တၢ်ကိးမံၤဒဲး အပူၤတက့ၢ်.+ သုမ့ၢ်မၤဒ်န့ၣ်န့ၣ် မ့ၢ်တၢ်လၢ အဘၣ်ကစၢ်အသးလီၤ.
၂၁ ပၢ်သ့ၣ်ဧၢ, ဒ်သိး သုဖိတဖၣ်အသး သုတလီၤစၢ်တဂ့ၤအဂီၢ် တဘၣ်မၤအ့န့ အဝဲသ့ၣ်အသးတဂ့ၤ.+
၂၂ ကုၢ်သ့ၣ်ဧၢ, ပှၤလၢအမ့ၢ် သုကစၢ်တဖၣ်လၢ ဟီၣ်ခိၣ်ချၢန့ၣ် ဒိကနၣ် အဝဲသ့ၣ်အကလုၢ် လၢတၢ်ကိးမံၤဒဲးအပူၤတက့ၢ်.+ ဒီးတမ့ၢ်ထဲဖဲအဝဲသ့ၣ် ကွၢ်သုအဆၢကတီၢ် ဒ်သိး သုကလူၤဘၣ် ပှၤကညီအသးအဂီၢ်ဘၣ်. မၤအီၤလၢ တၢ်သူၣ်ဘျၢသးဘျၢအပူၤ ဒီးလၢတၢ်ပျံၤ ယဟိဝၤယွၤ အဃိတက့ၢ်.
၂၃ တၢ်လၢသုမၤ တမံၤဂ့ၤတမံၤဂ့ၤန့ၣ် မၤအီၤလၢ သူၣ်ဒီဖျၢၣ်သးဒီဖျၢၣ် ဒ်သုမၤလၢ ယဟိဝၤယွၤ အဂီၢ်အသိးတက့ၢ်.+ ဒီးတဘၣ်မၤအီၤ ဒ်သိးသုမၤအီၤလၢ ပှၤဟီၣ်ခိၣ်ဖိအဂီၢ် အသိးတဂ့ၤ.
၂၄ ဒီးသုသ့ၣ်ညါလၢ သုကန့ၢ်ဘၣ် တၢ်န့ၢ်သါ ဒ်ခိၣ်ဖးအသိးလၢ ယဟိဝၤယွၤ အအိၣ်လီၤ.+ မၤတၢ်ဒ်ကုၢ်အသိးလၢ သုကစၢ်လၢအမ့ၢ် ခရံာ်အဂီၢ်တက့ၢ်.
၂၅ ပှၤလၢ အမၤကမၣ်တၢ်န့ၣ် ကဘၣ်တၢ်ဟ့ၣ်ကၣ်က့ၤအီၤလၢ တၢ်ကမၣ်လၢ အမၤတ့ၢ်ဝဲအဃိ သပှၢ်ကတၢၢ်လီၤ.+ ကစၢ်ယွၤတကွၢ်မဲာ် ပှၤနီတဂၤဘၣ်.+
တၢ်ဂ့ၢ်အဘျဲၣ်တဖၣ်
^ ကြံးကျိာ် မ့ၢ်ဝဲ ဖီနံယၤ. ကွၢ် တၢ်ကတိၤအခီပညီ.
^ အခီပညီလိၤလိၤ “ဘ့ၣ်လီၤကွံာ်.”
^ အခီပညီလိၤလိၤ “ကူထီၣ်သိးထီၣ်.”
^ မ့ၢ်စ့ၢ်ကီး “ကူထီၣ်သိးထီၣ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “ကူထီၣ်သိးထီၣ်.”
^ အခီပညီလိၤလိၤ “နီၢ်သးတၢ်သးဝံၣ်.”
^ မ့ၢ်စ့ၢ်ကီး “လၢသုသးပူၤ.”
^ မ့ၢ်စ့ၢ်ကီး “တဘၣ်ရ့ဒီးအဝဲသ့ၣ် ဆူၣ်ဆူၣ်ကိၤကိၤတဂ့ၤ.”
