Na kilumbu ya 5 juin 2022, mpangi Edward Bunn, yina kele mpangi ya komite ya filiale ya Amérique centrale, tubilaka kubimisama ya Biblia Mbangudulu ya Yinza ya Yimpa ya Masonukua ya Greki ya Buklisto na ndinga ya Nahuatl (ya nord ya Puebla) na mutindu ya kutanga na apareyi. Bantu kuluta 1 500 talaka anrejistrema ya programe yango.

Bantu ketubaka ndinga ya Nahuatl (ya nord ya Puebla) bakevuandaka mingimingi na kizunga ya Puebla mpe ya Veracruz na Mexique. Kimvuka ya ntete na ndinga ya Nahuatl (ya nord ya Puebla) salamaka na 2002. Bansamuni yina ketubaka ndinga ya Nahuatl (ya nord ya Puebla) vuandaka sadila mbangudulu ya Biblia ya ndinga yango yina katulaka nkumbu Yehova mpe na kisika na yau batulaka batitre lokola Mfumu mpe Nzambi.

Ntangu mpangi Bunn vuandaka sala diskur na yandi, yandi tubaka: “Beto mekindisa beno beno tanga mbangudulu yayi ya Masonukua ya Greki ya Buklisto kondua kuvingila. Beno sala yau na kutulaka kivuvu ti yakena kumonisa nsangu ya Nzambi na ndinga na beno na mutindu ya kukuikama.”

Beto kele na kivuvu ti mbangudulu yayi kekindisa bampangi na beto yina ketubaka ndinga ya Nahuatl (ya nord ya Puebla) mpe yakesadisa bau samu basamuna nsangu ya mbote ya Kimfumu ya Nzambi.—Marko 13:10.