Avo nkundi eto kimbevo kia ntelamw’a moyo keyelanga, nanga tulenda mona vo ke tuna ye una tulenda kunsadisila ko. Kansi, tulenda songa vo mfunu kikilu tukuvuanga muna kunsadisa kazizidila e kimbevo kiandi. Aweyi tulenda kunsadisila?

‘Kala ye Nzaki za Wá.’—YAKOBO 1:19.

Imosi muna mpila isundidi ina olenda sadisila o nkundi aku, i toma winikinanga vava kevovanga. Kuvavi vana mvutu ko muna konso diambu kevova. Unsonga kaka vo ongeye mu wá wina, ye wete diandi otokanenanga. Vava bakula una kemonanga emvimba, venga e fu kia kumbakila e nzengo yovo kumfundisa. Sungamena vo o nkundi aku olenda vova diambu dina kakanini vova ko ye olenda kuyibanza kuna kulanda.—Yobi 6:2, 3.

‘Fiaulwisanga’ akaka.—1 TESALONIKA 5:14.

Dilenda kala vo nkundi aku diambu dina kuntokanesa, yovo okuyimwenanga vo kena kwandi mfunu ko. Avo osongele vo mfunu kikilu okumvuanga, muna mpila yayi okumfiaulwisa yo kunkasakesa, kana nkutu vo kuzeye ko dina olenda kumvovesa.

“Nkundi akieleka ozolanga e ntangwa zawonso.”—NGANA 17:17.

Vana lusadisu luna nkundi aku kavuidi o mfunu. Vana fulu kia yindula e diambu kavuidi o mfunu, yuvula kwa yandi kibeni kana adieyi olenda vanga muna kunsadisa. Avo kazeye ko dina kikilu kavuidi o mfunu, teze kunzayisa maka mambu nulenda  vanga kumosi nze kwenda kangadi. Olenda mpe kuyivana muna kunsumbila madia, velelesa e nzo yovo sala salu kiankaka.—Ngalatia 6:2.

‘Songa luzindalalu.’—1 TESALONIKA 5:14.

O nkundi aku ke ntangwa zawonso ko kekala yo luzolo lwa mokena. Unsonga vo wakubama wina muna kunwá konso ntangwa kezola mokena. Mu kuma kia kimbevo kiandi, o nkundi aku olenda vova yovo vanga diambu dikumwesa e mpasi. Nanga olenda vunzanesa mana nukubikidi mu vanga yovo olenda kituka se nkwa nganzi-nganzi vana vau. Avo iwau, songa luzindalalu yo vava kumbakula ekolo okunsadisanga.—Ngana 18:24.

“Ivanganga mawonso mpasi kazaya wo vo mono i nkundi ona kalenda bunda e vuvu. Kana nkutu vo kizeye ko una ndenda kunsadisila, itambanga o matu mu wá dina kevova. Ezak’e ntangwa, e diambu kaka kavuidi o mfunu i kala yo muntu ona okunwá ye sungididi kiawonso, i bosi kevuvamanga.”—Farrah, a ona wina yo nkundi oyelanga kimbevo kia transtornos alimentares e de ansiedade e depressão clínica.

“Mosi muna akundi ame nkwa ngemba ye wankasakesanga. Wambokelanga kuna nzo andi twadila vamosi. O zola kansonganga muna ntangwa yoyo kwamfilanga mu ziula o ntima yo kunzayisa una yamonanga. Ediadi diatoma kunkasakesanga!”—Ha-eun, ona oyelanga kimbevo kia lukendalau lwasaka (depressão clínica).

“O luzindalalu mfunu kikilu lwina. Vava o nkento ame kevanganga diambu dikumfungisanga makasi, isungamenanga vo ke mu luzolo lwandi ko kavangi wo, kansi i mu kuma kia kimbevo kiandi. Ediadi dikunsadisanga mu lembi kumfungila makasi.”—Jacob, ona wina yo nkento oyelanga kimbevo kia lukendalau lwasaka (depressão clínica).

“O nkento ame otoma kunsadisanga yo kumfiaulwisa. Vava e ntokani zame ziwokelanga, oyandi ke kunkomekenanga ko yavanga dina kizolele ko. Ezak’e ntangwa divavanga vo oyandi mpe kayambula vanga e diambu dina kikilu kazolele vanga ko. O ntima mvevo kesonganga ukumfilanga mu toma kunzola.”—Enrico, ona oyelanga kimbevo kia ntokani zasaka (transtorno de ansiedade).