KONSO mvu, vioka wantu 6.000.000 bevanganga nkangalu mu kwenda kuna mfinda ina kuna zunga kia Shima kuna Japão. Bekwendanga kuna Nzo Avauka ya Ise kuna kusambilwanga Amaterasu Omikami wa nzambi a muini a dibundu dia xintoísmo, e nzambi yayi isambilwanga se vioka mafunda mole ma mvu. Entete, asambidi besukulanga moko ye nua muna kuyivelelesa. I bosi, bekotanga muna nzo avauka, befukamanga, sika makonzo yo samba kwa nzambi au. * Awana besambilanga muna dibundu dia xintoísmo bena yo nswa wa sambila mpe nzambi zakaka. Akaka muna akwa dibundu dia Buda bekwendanga mpe muna mabundu ma Kikristu, akaka bekwikilanga vo ke diambi ko mu sambila kuna nzo avauka ya dibundu dia xintoísmo.

Mabundu mayingi mu nza mena ye nzo avauka, mafunda ye mafunda ma wantu bekingulanga e fulu yayi. Muna nsi zina ye nsambila ya Kikristu, muna ye nzo za nzambi ye nzo zavauka zatungwa mu kuma kia Yesu, Maria ye Asantu akaka. Nzo zavauka zankaka zitungilwanga vana fulu yavangamena mambu meyikwanga mu Nkand’a Nzambi yovo fulu kiavangamene “masivi.” Wantu ayingi bekwendanga muna nzo zavauka bekwikilanga vo e sambu yau iwakana avo bavangidi yo va fulu kiavauka. Akaka bekwikilanga vo e mpila yambote yasongela e kwikizi muna dibundu i kwenda kingula nzo avauka ya dibundu diau.

Nga e sambu itoma wakana avo ivangilu muna nzo avauka? Nga Nzambi oyangalala avo wantu bavenge nkangalu a ndá mu kwenda kuna nzo avauka? Nga Akristu bafwete sambilanga Nzambi muna nzo avauka? E mvutu za yuvu yayi zikutusonga una tufwete badikilanga e fu kia sambila muna nzo avauka, zikutusadisa mpe mu zaya e mpila nsambila iyangidikanga Nzambi.

E moko kakala kiau o Yesu yo nkento mosi wa musi Samaria kisonganga una Nzambi kebadikilanga e fu kia sambila va ‘fulu kiavauka’ yovo nzo avauka. * Yesu mu nkangalu kakala muna zunga kia Samaria, wavunda vana sima kiakala lukufi ye mbanz’a Sika. Wayantika mokena yo nkento mosi wayiza teka maza kuna sima. Ekolo bamokenanga, nkento ndioyo wayika e nswaswani yakala vana vena nsambila ya esi Samaria ye nsambila Ayuda. Wavova vo: “Mase meto vana mongo wau basambilanga, kansi oyeno nuvovele vo o wantu  kuna Yerusaleme bafwete sambidilanga.”—Yoane 4:5-9, 20.

Nkento ndiona mongo a Ngerezime kayikanga, mongo wau ku node ya Yerusaleme wakala, tezo kia 50 ma kilometa ye mbanza yayi. Kuna mongo wauna i kwakala e tempelo ya esi Samaria, i kuna bakembelelanga nkinzi a Nduta. Vana fulu kia sia e sungididi muna mvovo mia nkento, Yesu wamvovesa vo: “E nkento, unkwikila, e ntangwa ikwiza, ke nusambila Se vana mongo wau ko ngatu kuna Yerusaleme.” (Yoane 4:21) Ekwe mvovo mialukasakeso miatuka kwa muntu ndioyo wakala vo Nyuda! Ekuma wantu ke badi sambila diaka Nzambi ko mu tempelo kuna Yerusaleme?

Yesu wakwamanana vova vo: “E ntangwa ikwiza, i yau yiyi, ina vo asambidi aludi besambila o Se muna mwanda ye ludi, kadi o Se, wantu a mpila yayi kevavanga bansambila.” (Yoane 4:23) Tuka mvu miayingi, Ayuda babadikilanga e tempelo kuna Yerusaleme vo fulu kia nsambil’au. Konso mvu, nkumbu tatu bayendanga kuna Yerusaleme muna tambika yimenga kwa Yave wa Nzambi. (Luvaiku 23:14-17) Kansi Yesu wavova vo mawonso mama mesoba, kadi “asambidi aludi” besambila “muna mwanda ye ludi.”

E tempelo nzo yatungwa yakala, va fulu kiasikididi mpe yakala. Kansi, e ludi yo mwanda ke lekwa ko ilenda simbwa, ke ina mpe va fulu kiasikididi ko. Ozevo, Yesu Kristu wasonga vo ke diadi kala diaka mfunu ko vo wantu basambila kuna mongo a Ngerezime yovo kuna Yerusaleme.

Muna moko kiandi yo nkento ndioyo, Yesu wavova mpe vo e “ntangwa ikwiza” e mpila ya sambidila Nzambi isoba. Nkia ntangwa yadi soba? E ntangwa yayi yaluaka vava Yesu kafwa yo fokola e nsambila ya Ayuda yasikidisilwa muna Nsiku a Mose. (Roma 10:4) Kansi, Yesu wavova mpe vo: “E ntangwa . . . i yau yiyi.” Ekuma? E kuma kadi muna ntangwa yayina Yesu una vo i Masia wayantika kutika alongoki ana badi lemvokela nkanikinu owu: “Nzambi i Mwanda, awana bekunsambilanga bafwete kunsambila muna mwanda ye ludi.” (Yoane 4:24) O sambila Nzambi muna mwanda ye ludi aweyi disongele?

Yesu wasonga vo tufwete yambula mwand’a Nzambi watufila, kadi mwanda wau ukutusadisa mu bakula Diambu dia Nzambi. (1 Korinto 2:9-12) E ludi kavovela Yesu i zayi wakieleka wa Diambu dia Nzambi. E nsambila eto muna tondakana kwa Nzambi ifwete kala e ngwizani yo Nkand’a Nzambi  yo filwa kwa mwanda avelela, ke kwenda sambila muna nzo avauka ko.

Ozevo, aweyi Akristu bafwete badikila e fu kia vanga nkangalu mu kwenda sambila muna nzo avauka? Landila e mvovo mia Yesu vo asambidi akieleka bafwete sambilanga Nzambi muna mwanda ye ludi, tubakwidi vo o sambila Nzambi muna nzo avauka yovo va fulu kiakaka kiavauka ke dina mfunu ko kwa Se dieto kuna zulu. Vana ntandu, Nkand’a Nzambi ukutuzayisanga una Nzambi kebadikilanga e nsambila za teke. Uvovanga vo: “Nutina nsambila za teke,” “nuyikenga muna teke.” (1 Korinto 10:14; 1 Yoane 5:21) Ozevo, o Nkristu akieleka kafwete kwenda sambila kuna nzo avauka ko yovo va fulu kisambilwanga teke. Mu kuma kia mambu mevangamanga mu fulu yayi, Akristu akieleka ke besambilanga Nzambi mu fulu yayi ko.

Kansi, ediadi kadisongele ko vo Diambu dia Nzambi disimanga o wantu mu kala ye fulu kia sambila Nzambi, longoka yo yindula oma ma Nkand’a Nzambi. E fulu kia lukutakanu kiatoma kubikwa kisadisanga muna longoka yo fimpa mambu ma Nzambi. Ke diambi mpe ko mu tunga ziami yovo nkala mu kuma kia muntu ofwidi. Kadi sinsu kia nzola yo sungamena muntu ofwidi. Kansi, obadikila e fulu yayi vo yavauka yovo sadila yo muna sambila teke, ke dina ngwizani ko ye mvovo mia Yesu.

Vana ntandu, kufwete yindula ko vo avo wele samba kuna nzo avauka, Nzambi owá sambu yaku. Kuyindula mpe ko vo Nzambi oyangalala yo kusambula avo odiatidi mamfukama muna nzo avauka. Nkand’a Nzambi ukutuzayisanga vo Yave wa Nzambi wa “Mfumu a zulu ye nza, ke kalanga muna tempelo yatungilwa mu moko ko.” Kansi, ke disongele ko vo Nzambi wavavuka wantu. Avo tusambidi kwa yandi wá kekutuwá kadi “kavavukidi konso muntu omu yeto ko.”—Mavangu 17:24-27.