Nzambi wavovesa Adami vo: “Kadi muna lumbu odia [o nti wau], fw’ofwa.” (Etuku 2:17) O nkanikinu wau ke wadi kala mfunu ko kele vo Nzambi wavanga Adami kimana kanuna yo fwa. Adami wazaya wo vo kele vo kadidi bundu kia nti wauna ko, kadi fwa ko.

Adami yo Eva ke bakala ye kuma ko kia dia e bundu kia nti wau muna kwamanana zinga kadi nti miayingi miakala muna mpatu a Edene miayimanga e bundu. (Etuku 2:9) Kele vo ke badie bundu kia nti wauna ko, Adami yo Eva badi songa vo balemvokelanga Ndiona wabavana o moyo. Badi songa mpe vo batambulwilanga vo Nzambi wakala ye wisa kia kubazayisa dina bafwete vanga.

Muna bakula e kuma Adami yo Eva bafwila, tufwete fimpa moko kimosi kiatwasa e mfwilu kwa yeto awonso. Satana wa Nkadi ampemba wasadila e nioka muna vuna Eva. Nkand’a Nzambi uvovanga vo: ‘O nioka osundidi o lungalala muna bulu yawonso ya futa, ina kavang’o Yave wa Nzambi. Ovovese o nkento vo, I kieleka kina vo, o Nzambi, nana kavova, Ke nudie nti miawonso mia mpatu ko e?’—Etuku 3:1.

Eva wavutula vo: “E bundu ya nti mia mpatu tudia kweto: kansi e bundu kia nti wina vana kati kwa mpatu, i Nzambi wau, ke nudie kio ko, ngatu viakana kio, ke nwafwa.” I bosi, o nioka wamvovesa vo: “Ke nwafwa kweno ko: kadi o Nzambi ozeye wo vo, e lumbu nudia kio, o meso meno matemokene, nukala nze Nzambi, nwazaya wete yo bi.” Muna mpila yayi, Satana wavova vo Yave nkwa luvunu ona waswekelanga Adami yo Eva e lekwa yambote.—Etuku 3:2-5.

Eva wakwikila muna mvovo miami. Watala e bundu kia nti yo mona vo kiambote muna meso, wavela e bundu yo yantika kio dia. Nkand’a Nzambi uvovanga vo: ‘I bosi, ovene mpe kwa yakala diandi vava bakala vamosi, oyandi mpe odidi.’—Etuku 3:6.

Nzambi wakendalala kikilu vava kamona wan’andi ana katoma zolanga bankolamene kuna lukanu. Adieyi kavanga? Yave wavovesa Adami vo: “Muna kiufuta kia ndose aku odil’o dia, yavan’ovutuka muna ntoto, kadi mûna wabongwa. Kadi u ntoto wina, mu ntoto ovutuka.” (Etuku 3:17-19) Muna kuma kiaki, “e mvu miawonso mia Adami nkama vwa yo makumatatu: ofwidi.” (Etuku 5:5) Adami kayenda ku zulu ko ngatu kwenda zingila ku fulu kiankaka. Adami kakala ko vitila Yave kansema tuka muna mbundukutu a ntoto. Muna kuma kiaki, vava kafwa, wavidisa o moyo, e nitu  andi yakituka diaka se ntoto. Kakala diaka moyo ko. Ekwe mfwilu diatwasa!

Muna kuma kia ukolami wau, Adami yo Eva bavidisa kimuntu kialunga ye lau dia zinga yakwele mvu. E nitu zau zayantika soba, bakituka wantu alembi lunga ye asumuki. Kansi, o ukolami wau ke watwasa kaka mfwilu kwa yau ko. Basambukisa e sumu kwa wan’au. Muna Roma 5:12 tutanganga vo: “I kuma vo, wauna e sumu diakotela ova nza muna muntu mosi, o lufwa mpe muna sumu, i nsayana lwasayana o lufwa kwa wantu awonso, e kuma kadi awonso basumuka.”

Nkand’a Nzambi uyikilanga e sumu yo lufwa vo ‘fukwa kifukanga nkangu miawonso, yo nlele wayalumuka muna zula yawonso.’ (Yesaya 25:7) E fukwa kiaki kina nze tembwa kia mvondi kina o wantu ke balendi tina ko. Kieleka, “wantu awonso befwilanga muna Adami.” (1 Korinto 15:22) Tulenda kukiyuvula e kiuvu nze kina Paulu wa ntumwa kayuvula: “Nani okumpuluza muna nitu yayi ikumfilanga muna lufwa?” Nga vena yo muntu olenda kutuvuluza?—Roma 7:24.