NTU A DIAMBU WA FUKWA | AWEYI TULENDA SUNDILA O NTELAMW’A MOYO?
Wantu Awonso mu Nza Betelamwanga o Moyo
“Madia yayenda sumba, kansi sikiti kaka yawana. E ntalu a sikiti yawokela nkumbu 10.000. Muna lumbu kialanda, maloja ke makala diaka ye madia ko.”—Paul, Zimbabwe.
“Nkaz’ame wampovesa vo kizinga diaka yo yeno ko kadi yabakidi nkento akaka. Aweyi yadi zizidila e diambu diadi? Adieyi diadi bwila o wan’ame?”—Janet, Estados Unidos.
“Vava yawá mazu ma ngung’a lulukisu, yatikuna yo swama, yalavalala vana ntoto vava e bomba yabuka. Vioka ola zayingi, moko mame makwamanana zakama.”—Alona, Israel.
Mu lumbu ya ‘mpasi’ yo ntelamw’a moyo tuzingilanga. (2 Timoteo 3:1) Wantu ayingi betungiananga mu kuma kia kondwa nzimbu, mpambani muna nzo, vita, yimbevo, sumbula yovo mavangu mambi ma wantu. Katula mama, ayingi betokananga yo kukiyuvula: ‘E ndunzi zazi imonanga nga ke zikuntwasila câncer ko? Aweyi e zingu kia atekolo ame kikala kuna sentu?’
Ke ntokani zawonso ko zikalanga zambi. Muna bonga e nona, muntu olenda tokana vitila kavanga kizame kuna sikola yovo vitila kamokena yo mfumu a salu mu zaya kana vo wafwana mu kota mu kompani. Vana ntandu, o tokana kulenda kutusadisa mu venga e mpasi. Kansi, o tokana kwayingi kulenda kututwasila vonza. Lufimpu lwavangwa kwa 68.000 ma wantu bena vo ambuta lwasonga vo telamwa o moyo zingu kia muntu dikufikanga. Ekiaki i kuma o Yesu kayuvulwila: “Nani vovo nwina, ovo otelekele o moyo, olenda kudikila lutama muna ntel’andi?” Kieleka, o tokana ke kusadisanga ko muna zinga kwayingi. Muna kuma kiaki, Yesu walukisa vo: ‘Ke nutelamwa ntima ko.’ (Matai 6:25, 27) Aweyi muntu kalenda zingila lembi tokana kwayingi?
Muntu olenda zinga lembi tokana kwayingi muna sadilanga ngangu za Nzambi, kala yo lukwikilu lwasikila muna Nzambi yo kala ye vuvu kia kusentu. Kana nkutu vo ke tunwananga ye mambu ma mpasi ko, kuna ntwala malenda kutubwila. Muna kuma kiaki, yambula twafimpa una Paul, Janet yo Alona basundila ntelamw’a moyo muna sadila mambu mayikilu ova ntandu.
Nanga Oyangalela Mpe Malongi Mama
SIKAMA!
Nga Vena ye Diambu Dikutokanesanga?
Vena ye mambu mayingu olenda vanga kimana e ntokani zalembi kuyoyesa.
