Dumbelele kimosi omwene mwisi uvaikanga muna mvumba mia kompani dimosi yo kituka nga matuti. Ovovele vo: “Nutala kompani divanganga matuti!” Tulenda kunseva wau kalembele zaya e ziku kia diambu. Kansi olembi zaya e ziku kia diambu dilenda sia e zingu kieto mu vonza. Kasikil’owu, avo muntu onwini nlongo miangolo kinue-kinue, moyo andi kasidi mu vonza.

O bakula e mambu ma Nzambi mu mpila yambi i vonza kisundidi. O unu, vena ye wantu ayingi bebakulanga malongi ma Yesu mu mpila yambi. (Yoane 6:48-68) Vana fulu kia longoka diaka mayingi, bevezanga nkutu malongi ma Yesu. Ekwe mfwilu bebakanga!

Nga una ye fu kia tanga Nkand’a Nzambi muna vua ngangu? Diambote mu vanga wo. Nga olenda bwa mu vonza kia bakula mu mpila yambi o mambu otanganga muna Nkand’a Nzambi? Ditoma vangamanga kwa wantu ayingi. Yambula twavovela mambu matatu o wantu bebakulwilanga mu mpila yambi.

• Ankaka bebakulanga mu mpila yambi o nkanikinu wa Nkand’a Nzambi “vumina Nzambi aludi.” Beyindulanga vo tufwete mwena Nzambi wonga. (Kimpovi 12:13) Kansi Nzambi ke zolanga ko vo asambidi andi bamwena o wonga. Muna Yesaya 41:10, Nzambi wavova vo: “Kumoni wonga ko, kadi ngina yaku; kuvengozioka ko, kadi omono i Nzambi aku; ikuvamisa; elo, ikusadisa.” Ozevo, vumina Nzambi disongele vo kunzitisa una ufwene.

• Ndonga bebakulanga mu mpila yambi e mvovo mia Nkand’a Nzambi: “E ma yawonso ivuidi ntangw’andi, . . . Ntangw’a wutuka ye ntangw’a fwa.” Bebakulanga vo Nzambi wasikidisa kala e ntangwa ina konso muntu mu yeto kefwa. (Kimpovi 3:1, 2) Kinga e sono kiaki kisasilanga e mpila zingu tuna kiau yo kiesesa vo yeto awonso fwa tufwanga. E Diambu dia Nzambi dikutulonganga mpe vo e nzengo tubakanga zilenda kufika yovo lambula e zingu kieto. Kasikil’owu, muna Nkand’a Nzambi tutanganga vo: “O vumi wa Yave ukudikila lumbu.” (Ngana 10:27; Nkunga 90:10; Yesaya 55:3) Mu nkia mpila? Avo Diambu dia Nzambi tulemvokelanga dilenda kutusadisa mu yambula mavangu mawonso mambi nze kolwa malavu ye zumba.—1 Korinto 6:9, 10.

• Ndonga bebakulanga mu mpila yambi e mvovo miasonama muna 2 Petelo 3:7: ‘e zulu yo ntoto walundilwa muna tiya.’ Bebakulanga vo Nzambi osinga fwasa o ntoto. Kansi Nzambi wasia nsilu vo kalendi fwasa o ntoto ko. O Nzambi “Ona wakuba nkubilwa mia nza, ke yanikunwa yakwele mvu.” (Nkunga 104:5; Yesaya 45:18) E nza yayi yambi yau isinga fwaswa, kansi ke ntoto ko. Muna Nkand’a Nzambi, o mvovo zulu ke una kaka ye nsasa imosi ko. Ulenda yika e zulu dia ntandu, nsema wawonso yovo e fulu kina Nzambi kezingilanga. E fulu yayi ke ilendi fwaswa nkutu ko.

E nona tuvovele isongele vo nkumbu miayingi wantu bebakulanga mu mpila yambi o mambu betanganga muna Nkand’a Nzambi. Kansi ekuma Nzambi keyambulwilanga vo diavangama? Akaka balenda yindula vo: ‘Avo Nzambi i nkwa ngangu zawonso ye ozeye mawonso, wadi sonekesa Nkand’a Nzambi mu mpila yaleboka kimana yeto awonso twabakulanga wo. Ekuma kalembi wo vangila? Yambula twavovela mambu matatu mefilanga wantu mu bakula Nkand’a Nzambi mu mpila yambi.

1. Nkand’a Nzambi wasonekwa kimana wabakulwa kwa alembami ye awana bena yo luzolo lwa longoka. Yesu wavovesa Se diandi vo: “Ikembelele va meso ma ndonga, e Tata, Mfumu a zulu ye nza, kadi watoma sweka mambu mama kwa akwa ngangu ye alungaladi yo sengomona mo kwa yingiana-ngiana.” (Luka 10:21) Nkand’a Nzambi wasonekenwa muna mpila ina vo, awana kaka  bena ye kani dia sikila balenda bakula o mambu mena mo. Akwa lulendo ye “akwa ngangu ye alungaladi” mu mpila yambi bebakulwilanga Nkand’a Nzambi. Kansi awana betanganga Nkand’a Nzambi kuna lulembamu yo luzolo lwa longoka diambu nze “yingiana-ngiana,” betoma bakulanga e nsangu za Nzambi. Ekwe ndekwa zambote kasadila o Yave muna sonekesa Nkand’a Nzambi!

2. Nkand’a Nzambi wasonekwa mu kuma kia wantu bavuidi lusadisu lwa Nzambi o mfunu. Yesu wavova vo wantu lusadisu bevua o mfunu muna bakula malongi mandi. Aweyi besadisilwa? Yesu wavova vo: “O nsadisi, o mwand’avelela, una o Se ketuma muna nkumbu ame, ukunulonga mambu mawonso yo kunusungamesa mawonso inuvovese.” (Yoane 14:26) Nzambi ovananga mwand’andi avelela yovo nkum’andi muna sadisa wantu babakula mana betanganga muna Nkand’a Nzambi. Kansi o Nzambi ke vananga mwanda wau ko kwa wantu ke bevuanga lusadisu lwandi mfunu ko. Kuna kwa yau o Nkand’a Nzambi i nkanda wa mpimpita muna bakula. O mwand’avelela ulenda mpe fila Akristu ana bena yo zayi wayingi mu kwenda vavi awana bazolele vua o zayi wa Nzambi yo kubalonga.—Mavangu 8:26-35.

3. E sono yankaka ya Nkand’a Nzambi ilenda bakulwa kwa wantu muna ntangwa ina Nzambi kazolele. Kasikil’owu, Daniele wa ngunza wavoveswa vo kasoneka e nsangu yo lunda zo yakuna sentu. Mbasi wamvovesa vo: “E Daniele, sweka mambu yo sia nkand’e dimbu yamuna mbaninu.” Tuka tandu yayingi, ndonga batanganga o nkand’a Daniele kansi ke batoma wo bakulanga ko. Kana nkutu Daniele kabakula ko mawonso kasoneka. Kuna lulembamu lwawonso Daniele wavova vo: “Omono ngwidi ke mu bakula ko.” Omu lumbu yeto wantu betoma bakulanga ungunza wa Nzambi wasonekwa kwa Daniele, kansi muna ntangwa ina Nzambi kasikidisa. Mbasi wavova diaka vo: “Wenda kwaku, e Daniele; kadi o mambu maswekamene yo siw’e dimbu yamuna mbaninu.” Aki nani balenda bakula e nsangu za Nzambi? “Ke vekal’on’obakula ko vana ven’ayimpumbulu: alungaladi kaka bebakula.” (Daniele 12:4, 8-10) Ozevo, Nzambi osengomonanga e nsas’a ungunza wa Nkand’a Nzambi yavana kifwana e ntangwa ina kasikidisa.

Nga vena ye ntangwa ina Mbangi za Yave babakula Nkand’a Nzambi mu mpila yambi? Ingeta. Kansi vava e ntangwa ina Nzambi kasikidisa yafwana mu kiesesa o mambu, Mbangi za Yave basoba umbakuzi wau. Bekwikilanga vo ntumwa za Kristu betangininanga, kuna lulembamu lwawonso basoba e ngindu zau vava Yesu kabasingika.—Mavangu 1:6, 7.

E dumbelele kina kiayindula vo matuti mu mwisi mevangilwanga vilwa wakete kwandi kavanga. Kansi otoma bakula mana Nkand’a Nzambi ulonganga mfunu kikilu dina kwa ngeye. E nsangu za Nkand’a Nzambi mfunu kikilu zina, o muntu kalendi zo bakula yandi kibeni ko vava ketanganga e Diambu dia Nzambi. Dianu vo, vavanga lusadisu muna bakula mana otanganga. Vava lusadisu kwa wantu ana betanganga Nkand’a Nzambi yo lulembamu, awana bebakulanga o Nkand’a Nzambi muna lusadisu lwa mwand’avelela, awana bekwikilanga vo mu lumbu ya mbaninu tuzingilanga, e yayi i ntangwa ina Nzambi kazolele vo twatoma bakula o Nkand’a Nzambi ke mu tandu yavioka ko. Kumoni wonga wa mokena ye Mbangi za Yave ko, yovo lembi tanga e mambu besonekanga muna nzil’au ya internete jw.org/kwy. Nkand’a Nzambi usianga nsilu vo: “Ovo obokela umbakuzi, . . . , ozevo osolola o zayi wa Nzambi.”—Ngana 2:3-5.