Zasoneka Matai 4:1-25
4 I bosi, Yesu oneto kwa mwanda muna makanga, kuna katontelo+ kwa Nkadi ampemba.+
2 Vava kafionkonuene* mu lumbu 40, fuku yo mwini, omwene nzala.
3 Nkadi ampemba+ wizidi kuntonta, umvovese vo: “Avo ngeye u mwan’a Nzambi, vovesa o matadi mama makituka se mbolo.”
4 Kansi, Yesu umvutwidi vo: “Diasonama vo: ‘O muntu ke zingilanga kaka mu mbolo* ko,’ kansi muna konso diambu divaikanga muna nu’a Yave.’”*+
5 I bosi, Nkadi ampemba unete muna mbanz’avauka,+ untelamese vana lusangidiku lwa* tempelo,+
6 umvovese vo: “Avo ngeye u mwan’a Nzambi, uyituba vana nsi, kadi diasonama vo: ‘Okanikina e mbasi zandi mu kuma kiaku,’ ‘Bekunatina muna moko mau, kimana walembi wanda o kulu vana tadi.’”+
7 Yesu umvovese vo: “Diasonama diaka vo: ‘Kufwete tonta Yave* wa Nzambi aku ko.’”+
8 Nkadi ampemba unète diaka vana mongo wandá kikilu yo kunsonga yintinu yawonso ya nza ye nkembo au.+
9 Umvovese vo: “Yawonso yayi ikuvana yo, avo ofukamene yo kunsambila.”
10 I bosi, Yesu umvovese vo: “Katuka, e Satana! Kadi diasonama vo: ‘Yave* wa Nzambi aku kaka ofwete sambila,+ yandi kaka ofwete sadila e salu kiavauka.’”+
11 I bosi, Nkadi ampemba unyambwidi,+ ambasi bezidi kunsadila.+
12 Kansi, vava o Yesu kawidi vo Yoane osilu mu pelezo,+ wele kuna Ngalili.+
13 I bosi, okatukidi muna Nazarete, wele zingila kuna Kafanau+ vana ndambu a mbu muna mvivu mia Zebulune ye Nafetali,
14 kimana dialungana dina diasakulwa muna Yesaya wa ngunza, ona wavova vo:
15 “Ongeye nsi a Zebulune ye nsi a Nafetali, muna nzil’a mbu, kuna simu dia Yodani, Ngalili ya esi zula yankaka!
16 O nkangu uvuende muna tombe, umwene o ntemo ayingi, vo i awana bavuende muna zunga kia tombe kia lufwa, o ntemo+ ubatemene.”+
17 Tuka muna ntangwa yayina, Yesu oyantikidi longa, oku vo: “Nuviluk’o ntima, kadi e Kintinu kia zulu kifinamene.”+
18 Ekolo kekangalanga vana mbel’a Mbu a Ngalili, omwene mpangi zole, Simone ona oyikilwanga vo Petelo+ yo Andere wa mpangi andi, betubanga e konde muna mbu, kadi abaki a mbizi za maza.+
19 Ubavovese vo: “Nuiza ndandi, ikunukitula se abaki a wantu.”+
20 Vana vau, basisidi makonde mau, banlende.+
21 Vava kakatukidi vo, omwene diaka mpangi zole, Yakobo wa mwan’a Zebedayo yo mpangi andi Yoane.+ Bakedi muna nzaz’a Zebedayo wa se diau, belondanga makonde mau, ubabokele.+
22 Vana vau, basisidi e nzaza yo se diau, banlende.
23 I bosi, wele muna Ngalili+ yawonso, wele alonginge muna masambilu mau+ yo samuna e nsangu zambote za Kintinu yo wuka yimbevo ya mpila zawonso yo mayela ma mpila zawonso muna wantu.+
24 E nsangu zandi zimwangane muna Suria yawonso, bantwasidi awonso bakala ye yimbevo ya mpila mu mpila ye ndunzi,+ akwa nkuya,+ akwa niangi+ ye akwa vola, ubawukidi.
25 Muna kuma kiaki, ndong’ayingi inlende itukidi kuna Ngalili ye Dekapole* ye Yerusaleme ye Yuda ye kuna simu dia Yodani.
Mvovo vana yand'a lukaya
^ Yovo “kaminini o nsoki.” Tala Nsas’a Mvovo.
^ Yovo “madia.”
^ Yovo “nludi a.”
^ Yovo “Zunga kia Mbanza Kumi.”