Tuku 1:1-31
1 Kuna lubantiku, Nzambi wasema e zulu yo ntoto.+
2 O ntoto wankatu wakala, ke wakala ye lekwa ko, e tombe kiafukilanga maza,*+ o nkum’a Nzambi*+ wakala vana ntandu a maza.+
3 Nzambi ovovele vo: “Yambula vakala ntemo.” I bosi vakedi ntemo.+
4 Nzambi omwene vo ntemo wambote, oyantikidi vambula ntemo muna tombe.
5 Nzambi oyikidi o ntemo vo Mwini, kansi e tombe vo Fuku.+ Vakedi nkokela, vakedi mene, i lumbu kiantete.
6 I bosi, Nzambi ovovele vo: “Yambula vakala e ngambwila+ vana vena maza, yambula o maza ye maza mavambana.”+
7 Nzambi ovangidi e ngambwila yo vambula maza mekala kuna nsi a ngambwila yo maza mekala kuna ntandu a ngambwila.+ I diau diavangama.
8 Nzambi oyikidi e ngambwila vo Zulu.* Vakedi nkokela, vakedi mene, i lumbu kiazole.
9 I bosi, Nzambi ovovele vo: “Yambula maza mena ova ntoto* mawonzakana va fulu kimosi, kimana e fulu kiayuma kiamoneka.”+ I diau diavangama.
10 Nzambi oyikidi e fulu kiayuma vo Ntoto,+ kansi oyikidi e maza mawonzakana vo Kalunga.+ Nzambi omwene vo diambote.+
11 I bosi, Nzambi ovovele vo: “Yambula ntoto wamena e titi, mbundu ivaikisanga e mbongo, nti miwutanga bundu, mun’owu wa makanda mau, miawutanga e bundu ina ye mbongo.” I diau diavangama.
12 O ntoto uyantikidi mena e titi, mbundu ivaikisanga e mbongo+ ye nti miwutanga e bundu ina ye mbongo, mun’owu wa makanda mau. Nzambi omwene vo diambote.
13 Vakedi nkokela, vakedi mene, i lumbu kiatatu.
14 I bosi, Nzambi ovovele vo: “Yambula mwakala mini*+ muna ngambwil’a zulu kimana yavambanesa o mwini yo fuku,+ yakala se sinsu kia zayila nsungi, lumbu ye mvu.+
15 Yakala se mini muna ngambwil’a zulu mu vana ntemo ova ntoto.” I diau diavangama.
16 O Nzambi ovangidi ntangwa ye ngonde,* e ntangwa yavana ntemo muna mwini,*+ e ngonde yavana ntemo muna fuku,* ovangidi mpe ntetembwa.+
17 I bosi, Nzambi osidi yo muna ngambwil’a zulu kimana yatemesanga o ntoto
18 muna mwini ye muna fuku yo vambanesa o ntemo ye tombe.+ Nzambi omwene vo diambote.
19 Vakedi nkokela, vakedi mene, i lumbu kiayá.
20 I bosi, Nzambi ovovele vo: “Yambula maza mazala ye vangwa yamoyo, yambula e vangwa itilumukanga yatilumuka ova ntandu a ntoto muna ngambwil’a zulu.”*+
21 Nzambi ovangidi e mbizi zampwena za kalunga ye vangwa yawonso yamoyo izele muna maza mun’owu wa makanda mau ye vangwa yawonso ina ye nsala eyi itilumukanga mun’owu wa makanda mau. Nzambi omwene vo diambote.
22 I bosi, Nzambi ubasambwidi, ovovele vo: “Nuwutana yo wokela, nuzadisa maza ma kalunga,+ yambula vangwa itilumukanga yawokela ova ntoto.”
23 Vakedi nkokela, vakedi mene, i lumbu kiatanu.
24 I bosi, Nzambi ovovele vo: “Yambula o ntoto wawuta vangwa yamoyo mun’owu wa makanda mau, bulu ya vata, vangwa iyatatanga ye bulu ya mfuta mun’owu wa makanda mau.”+ I diau diavangama.
25 Nzambi ovangidi e bulu ya mfuta ova ntoto mun’owu wa makanda mau, ovangidi e bulu ya vata mun’owu wa makanda mau ye bulu yawonso iyatatanga mun’owu wa makanda mau. Nzambi omwene vo diambote.
26 I bosi, Nzambi ovovele vo: “Yambula twavanga+ o muntu muna fwaniswa kieto,+ mun’owu wa mpw’eto,+ kayala e mbizi za kalunga, vangwa itilumukanga muna zulu, bulu ya vata, ntoto wawonso ye bulu yawonso iyatatanga ova ntoto.”+
27 O Nzambi ovangidi muntu muna fwaniswa kiandi, muna fwaniswa kiandi i kamvangila; yakala yo nkento kabavanga.+
28 Vana ntandu, Nzambi ubasambwidi, ubavovese vo: “Nuwutana yo wokela, nuzadisa o ntoto+ yo yala wo,+ nuyala+ e mbizi za kalunga ye vangwa itilumukanga muna zulu ye vangwa yawonso yamoyo ina ova ntoto.”
29 I bosi, Nzambi ovovele vo: “Inuvene nti miawonso miwutanga e mbongo mina ova ntoto wawonso ye nti miawonso mina ye bundu ivaikisanga e mbongo. Ikala se madia meno.+
30 Mvene titi yankunzu se madia+ kwa bulu yawonso ya mfuta ye ma yawonso itilumukanga muna zulu ye vangwa yawonso yamoyo iyatatanga ova ntoto.” I diau diavangama.
31 I bosi, Nzambi otadidi yawonso kavangidi, omwene vo yambote kikilu.+ Vakedi nkokela, vakedi mene, i lumbu kiasambanu.
Mvovo vana yand'a lukaya
^ Yovo “maza ma sina.”
^ Yovo “mwand’a Nzambi.”
^ Yovo “Matuti.”
^ Mvovo wa sina: “mena ku nsi a zulu.”
^ Yovo “ntemo.”
^ Mvovo wa sina: “mini yole.”
^ Yovo “yayala o mwini.”
^ Yovo “yayala o fuku.”
^ Yovo “matuti.”
