Mfumu za mabundu besianga Yesu kitantu ke balendele kumbaka mu ntambu ko yo kunkangisa kwa luyalu lwa Roma. (Luka 20:20) O Yesu, wau kena muna tempelo, kina kia 11 kia Nisani, o mambu masobele, Yesu osongele kana nani kikilu kena. Yandi kibeni, ubayuvuidi vo: “Adieyi nubenze mu kuma kia Kristu? Mwan’a nani?” (Matai 22:42) Ditomene zayakana vo Kristu, yovo Masia mu luvila lwa Davidi ketuka. E zazi i mvutu bavene.—Matai 9:27; 12:23; Yoane 7:42. 

Yesu ubayuvuidi vo: “Ozevo, o Davidi muna mwand’avelela, ekuma kanyikila vo Mfumu, vava kavova vo, ‘O Yave ovovese Mfumu ame vo: “Vuanda oku koko kwame kwalunene yavana nsia mbeni zaku kuna nsi a tambi yaku”’? Ozevo, avo Davidi wanyikila vo Mfumu, aweyi kenena se mwan’andi?”—Matai 22:43-45.

Afarisi badingalele kaka, kadi vuvu bena kiau vo muna mbongo a Davidi muvaikila muntu okubakûla vana moko ma luyalu lwa Roma. Yesu ovutukidi e mvovo mia Davidi miasonama muna Nkunga 110:1, 2, mu songa vo Masia osundidi e mfumu za wantu. Yandi i Mfumu a Davidi, vava kevuanda kuna koko kwalunene kwa Nzambi, otambula e Kintinu. E mvutu za Yesu zikangidi e nua mia atantu andi.

Alongoki yo wantu ayingi mu wá bena e moko kiaki. Yesu ubalukisi mu kuma kia asoneki ye Afarisi. Kadi “bavuende vana kunda kia Mose” kimana balonga Nsiku a Nzambi. Yesu ovovese o wantu vo: “Mawonso bekunuvovesa, nuvanga yo lunda mo, kansi ke nutanginina mavangu mau ko, kadi mana bevovanga ke bevangilanga mo ko.”—Matai 23:2, 3.

I bosi, Yesu ovovele diambu disonganga o luvunu lwau, ovovele vo: “Bevongesanga nkela zakete zina ye sono zina bevuatanga muna kuyitanina.” Akaka muna Ayuda bevuatanga vana nkuta lose yovo muna koko e nkela zina ye mambu masonama muna Nsiku. Afarisi bevongesanga e nkela zau mu songa kwa wantu vo bena yo vema muna Nsiku. Afarisi ‘bavongesanga mpe nswiku mia mvuatu miau.’ Aneyisaele batulanga nswiku muna mvuatu miau, kansi Afarisi basakisanga e nswiku mia mvuatu miau. (Ntalu 15:38-40) Bavanganga mawonso mama kimana “bamoneka kwa wantu.”—Matai 23:5.

Kana nkutu alongoki a Yesu badi vukumunwa kwa luzolo lwa vava tunda. Muna kuma kiaki, Yesu ubavene longi edi: “Oyeno, ke nuyikilwa ko vo Rabi, kadi mosi kaka i Nlongi eno, yeno awonso nu ampangi. Ke nuyikila muntu ko ova ntoto vo se dieno, kadi vena ye mosi kaka wa Se dieno kuna zulu. Ke nuyikilwa ko vo mfumu, kadi mosi kaka i Mfumu eno, Kristu.” Ozevo, aweyi alongoki bafwete kuyimwena? Aweyi bafwete kadilanga? Yesu ubavovese vo: “Ona wanene vovo nwina kafwete kala selo kieno. Konso ona okuyitundidika, okululwa, konso ona okuyikulula, otundidikwa.”—Matai 23:8-12.

I bosi, Yesu ovovele mambu mesonganga vo asoneki ye Afarisi mu vonza bena. Ovovele vo: “Tâtu kwa yeno asoneki ye Afarisi, akwa kivunina! kadi nukakididi wantu e Kintinu kia zulu; kansi yeno kibeni ke nukotele mo ko, ngatu yambula awana bazolele mo kota.”—Matai 23:13.

Yesu otumbidi Afarisi kadi ke bazeye ko o mambu masundidi o mfunu kuna kwa Yave, yo sikidisila o nkangu nsiku miangolo-ngolo. Tala dina basikidisa: “Avo muntu odididi tempelo e ndofi, yankatu kwandi; kansi avo muntu odididi wolo wa tempelo e ndofi, kafwete yo lunganesa.” Muna mpila yayi, basongele vo bafwa o meso ma mwanda, kadi basidi e sungididi kiau muna wolo ya tempelo vana fulu kia zaya vo e tempelo i fulu kia sambidila Yave yo kumfinamena. ‘Babembwele mambu masundidi o mfunu muna Nsiku, i sia vo, unsongi, nkenda ye kwikizi.’—Matai 23:16, 23; Luka 11:42.

Yesu oyikidi Afarisi vo, “mfidi miafwa meso, nukenzanga yimbwanzi-mbwanzi kansi numinanga samo.” (Matai 23:24) Afarisi bekenzanga e vinyu muna lembi nua yimbwanzi-mbwanzi kadi má yafunzuka. Kansi e mpila bevezelanga o mambu mamfunu mena muna Nsiku, dina nze yau beminanga samo, bulu kiampwena ye kiafunzuka.—Fuka 11:4, 21-24.