Ke diambote ko. Nkand’a Nzambi uvovanga vo, kwa Yave wa Nzambi kaka tufwete sambanga ye muna nkumbu a Yesu. Tala dina Yesu kavovesa alongoki andi: “I wau wuwu nufwete sambila: E Se dieto koko zulu, yambula nkumbu aku yazitiswa.” (Matai 6:9, Nsekola ya Nz’ampa) Yesu kavova ko vo tufwete sambanga kwa asantu, kwa mbasi yovo kwa muntu ankaka, kansi kwa Nzambi kaka.

 Yesu wavovesa diaka alandi andi vo: “Mono i nzila ye ludi yo moyo. Ke vena ona okwiza kwa Se ko avo ke mu mono ko.” (Yoane 14:6, Nsekola ya Nz’ampa) Yesu kaka wavewa o nswa kwa Nzambi wakutudodokela.—Ayibere 7:25.

Adieyi mvanga kele vo isambanga kwa Nzambi ye kwa asantu?

 Muna Nsiku Kumi Nzambi wavova vo: “Omono Yave wa Nzambi aku, i Nzambi ansongo.” (Luvaiku 20:5) Mu nkia mpila o Nzambi kenena nkwa “nsongo”? Muna nsekola ya A Nova Bíblia Americana, o mvovo nsongo wasekolwa vo “ozolanga vo yandi kaka kasambilwa.” Nzambi ozolele vo wantu awonso basambanga kwa yandi kaka.—Yesaya 48:11.

 Nzambi tuvezanga kele vo tusambidi kwa muntu yovo lekwa, kwa asantu yovo mbasi. Lumbu kimosi ntumwa Yoane wazola sambila mbasi, kansi o mbasi kazola dio ko, wamvovesa vo: “Keba! Kuvangi wo ko! Omono i ntaudi wa nkw’aku ye mpangi zaku ana bena ye kiyekwa kia sia umbangi wa Yesu. Kunda Nzambi.”—Lusengomono 19:10.