Bala ba kula dema die nawu dia kipa bibuti biawu bia nuna. Bibila ditêle ti bala bafweti “sarila kangama kwe Nzambi mu kanda diawu mpe bahana kwe bibuti biawu [. . .] mio mifwanane kwe bawu, mu bungu ti ni wo wufwanane kwe Nzambi.” (1 Timote 5:4, NWT)[1] Bala basarilaka ngolo mu kipa bibuti biawu bia nuna, musiku wa Bibila batumamanaka wulombaka mu zitisa bibuti.​—Bisi-Efeze 6:2, 3.

 Bibila ka dihanaka lutangu lwa misuku ko mu mpila ya kipila bibuti bia nuna. Kâ, tifwani dihanaka tia babakala na tia bakento ba timinu babâ na dema dio. Malongi mpe ma mbote dihanaka malendi bakisa bô bakipaka bibuti biawu.

•  Mu ntangu ya ntama bwe beri kipilaka bibuti bia nuna?

•  Ntia malongi ma mbote malendi bakisa bô bakipaka bibuti biawu?

•  Ngano Bibila mbo ditâka ti bibuti bia nuna bafweti biakipa ku nzo?

 Mu mpila za swaswana babakipila, buna bweri têlaka misamu.

•   Yozefe mala keri bâka na tata’andi, Yakobe. Bu kayizi bâ na lenda, Yozefe watikisa tata’andi mu bâ penepene na yandi. Buna Yozefe wahana nzo, na bidia kwe tata’andi mpe wamukengerela.​—Mbatukulu 45:9-11; 47:11, 12.

•   Rite waye bâ ku hata dia buko bwandi mpe wasala ngolo mu mu kipa.​—Rite 1:16; 2:2, 17, 18, 23.

•   Ntete lufwa lwandi, Yezu wasola muntu waketi kipa nguri’andi Mariya kampe weri mufwiri.​—Za 19:26, 27. a

 Mu Bibila mitieno mie mô milendi bakisa bô bê na dema dia kipa bibuti bia nuna, ni bu sa ti ntangu zakaka dema diango mbo difwatikisaka mpe misamu ditulumunaka.

•   Zitisa bibuti biaku.

   Mio mi tâka Bibila: “Zitisa tata’aku na nguri’aku.”​—Ndukulu 20:12.

   Bwe balendi sarila malongi mô? Zitisa bibuti biaku bu bahanaka nzila mu yirika misamu buna bu bazololo. Tala ti lenda na dio babikeno babonga nzengolo zi batariri. Mpe bazitiseno bu lubabakisaka buna bu fwanane.

•   Bâ ha tibuka tiawu mpe babakula.

   Mio mi tâka Bibila: “Diangana, ndwenga za swasikisa nkesi za muntu zilembekaka, mpe mbote’andi ni mu zimbakana mbi yibamusiri.”​—Bingana 19:11.

   Bwe balendi sarila malongi mô? Tala ti tibuti tia nuna titêle musamu wa mbi peleko ka ta tonda ko mu lubakusu luta mu hana ko, tiyula: ‘Bwe nketi mona tala ti meno mpe misamu ni mio mie nani?’ Tala ti sariri ngolo mu bakulu misamu miawu mpe lemvokele, misamu ka mitulumuka ko.

•   Dinga malongi ma bantu bakaka.

   Mio mi tâka Bibila: “ Makani ka malunganaka ko bu balembo dingaka malongi; kâ milongi bu mibâka miamingi mbo malunganaka.”​—Bingana 15:22.

   Bwe balendi sarila malongi mô? Dinga mpila yi kipila tikolela tia bibuti biaku. Dinga mu zaba tala ti lendi baka lubakusu kwe bantu bakaka. Zonza na bantu bakipaka mpe bibuti bia nuna. Tala ti nkazi ze naku peleko bibusi, dinga mu vukasa kanda ngatu lwazonzela nsatu za bibuti bieno mpe lwatala bwe lulendi kabana dema dio.

•   Zaba ndilu zaku.

   Mio mi tâka Bibila: “Ndwenga kwe bô bazabaka ndilu zawu zena.”​—Bingana 11:2.

   Bwe balendi sarila malongi mô? Tatamana mu zabaka ndilu zaku. Mu tifwani, bantu babansoni ka bêna na ntangu ya sarila ko peleko ngolo zimosi na bantu bakaka. Misamu mio milendi sa ti walembo sa miamiansoni mi fwanane mu kipa bibuti biaku. Tala ti kuta vutu lenda ko nge kaka mu kipa bibuti biaku, lomba lubakusu lwa bantu bakaka mu kanda peleko lwa bantu bazebi tisalu tiango.

•   Tikipa.

   Mio mi tâka Bibila: “Ka kwena muntu ko wuyinaka nitu ya yandi beni, kâ mbo kadikilaka yo mpe mbo kakipaka yo.”—Bisi-Efeze 5:29.

   Bwe balendi sarila malongi mô? Ni bu sa ti dema die naku dia kipa bibuti biaku, fweti tikipa mpe fweti kipa kanda diaku tala ti wa kwela wena. Fweti diaka bubote. Tomo huma mpe tomo bwaka tolo. (Ekleziaste 4:6) Tala ti lenda na dio saka nsaka. Bu sila bo, mbo bâ na lenda dia tomo kipa bibuti biaku.

 Bibila ka dihanaka misiku ko mu musamu wo. Makanda makaka mbo masolaka mu kipa bibuti biawu ku tala ti lenda na dio. Mu nsi zakaka, makanda lendi sola mu tula bibuti biawu mu nzo zi bakipilaka bantu ba nuna (maison de retraite). Kanda difweti vukana mu bonga nzengolo zi delakana mu bungu dia bantu babansoni.​—Bisi-Ngalate 6:4, 5.