MBALA mingi bato babengaka Nicaragua mokili ya balaki mpe ya ba-volcan. Mokili yango ezali na laki oyo eleki monene na Amerika ya ntei​—Laki Nicaragua. Bana-mboka babengaka yango Cocibolca, oyo elakisi “Mbu ya kitoko.” Ezali na bisanga ebele mpe na mai kaka moko ya kitoko oyo ezali na bikelamu ya bomoi oyo efandaka na mbu, na ndakisa mbisi babengi requin, espadon, mpe tarpon.

Nicaragua ezali mpe na teritware moko oyo ezali mosika koleka bateritware mosusu ya Amerika ya ntei​—la côte des Mosquitos. Mwa eteni yango ya mabele oyo ezali ya bakilomɛtrɛ 65 ekendá pembenipembeni ya mai yango tii na Honduras. Miskito (lolenge mosusu ya kobenga Mosquitos) ezali moko ya bituluku ya bana-mboka ya Nicaragua oyo istware na bango ebandá liboso ete bato ya Mpoto bakóma na mboka yango na siɛklɛ ya 16.

Ba-Miskito balinganaka mingi mpe bazalaka na mimeseno oyo ekeseni mpenza na oyo ya bato mosusu. Na ndakisa, monɔkɔ ya Ba-Moskito ezali mpenza te na ebengeli lokola “mesye” to “madame.” Na bamboka, bilenge babengaka mikóló “Nɔkɔ” to “Tata mwasi,” ezala bazali bandeko ya libota to te. Momeseno moko ya kala oyo  basi ya mboka yango bazalaka na yango mpo na kopesa baninga na bango ya motema to bato ya libota mbote ezali ya kosimba litama na ye mpe na nsima kosimba oyo ya mosusu. Na nsima, mwasi oyo abandisaki mbote abendaka mpema na zolo.