Kobala basi ebele ezali mabe?
Eyano ya Biblia
Na ntango moko boye, Nzambe atikaki ete mobali azala na basi ebele. (Ebandeli 4:19; 16:1-4; 29:18-29) Kasi Nzambe te moto abandisaki likambo ya kobala basi ebele. Apesaki Adama mwasi moko kaka.
Nzambe atikaki Yesu Kristo azongisa mobeko na Ye ya ebandeli: mwasi moko mobali moko. (Yoane 8:28) Ntango batunaki Yesu mituna mpo na libala, alobaki boye: “Moto oyo azalisaki bango na ebandeli asalaki bango mobali ná mwasi mpe alobaki ete: ‘Yango wana mobali akotika tata na ye ná mama na ye mpe akokangama na mwasi na ye, mpe bango mibale bakozala mosuni moko.’”—Matai 19:4, 5.
Na nsima, elimo ya Nzambe etambwisaki moyekoli moko ya Yesu akoma ete: “Mobali mokomoko azala na mwasi na ye moko mpe mwasi mokomoko azala na mobali na ye moko.” (1 Bakorinti 7:2) Biblia elobi mpe ete na kati ya lisangá, mokristo ya mobali nyonso oyo abalá mpe azali na mikumba asengeli kozala “mobali ya mwasi kaka moko.”—1 Timote 3:2, 12.