Bibele ibulela cwana kuli ilutuse kuziba shutano ye mwahalaa batu babali mwa bulapeli bwa niti ni babali mwa bulapeli bwa buhata: “Muka baziba ka miselo yabona. Kana batu bakona kuyanga miselo ya veine kwa mikakani kamba kukoyola lifeiga kwa mikona?” (Mateu 7:16) Sina feela hamukona kuziba shutano ye mwahalaa kota ya veine ni mikakani ka miselo yayona, mwakona kuziba bulapeli bwa niti ka miselo yabona kamba ka lika zelatelela ze.

1.   Bulapeli bwa niti buluta niti yetomile fa Bibele, isiñi lituto za butali bwa batu. (Joani 4:24; 17:17) Taba yeo ikopanyeleza ni kuluta niti ka za moyo ni sepo ya kuba ni bupilo bobusa feli fa lifasi. (Samu 37:29; Isaya 35:5, 6; Ezekiele 18:4) Hape bupatululanga lituto za buhata za bulapeli.—Mateu 15:9; 23:27, 28.

2.   Bulapeli bwa niti butusanga batu kuziba Mulimu, kukopanyeleza cwalo ni kubaluta libizo lahae, lona la Jehova. (Samu 83:18; Isaya 42:8; Joani 17:3, 6) Habuluti batu kuli hakuna yakona kuziba Mulimu kamba kuli Mulimu haana taba ni luna; kono mane buluta kuli ubata kuli lube balikani bahae.—Jakobo 4:8.

3.   Bulapeli bwa niti buluta kuli ka sitabelo sa Jesu Kreste, Mulimu uka lutusa kuba ni bupilo bobusa feli. (Likezo 4:10, 12) Ba mwa bulapeli bo, bamamela litaelo za Jesu mi baeza mobakonela kaufela kumulikanyisa.—Joani 13:15; 15:14.

4.   Bulapeli bwa niti bulumela kuli Mubuso wa Mulimu ki ona feela okona kufelisa miinelo yetaata yebakopana ni yona batu. Ba mwa bulapeli bo, batalusezanga batu babañwi ka za Mubuso wo ka tukufalelo.—Mateu 10:7; 24:14.

5.   Bulapeli bwa niti bususuezanga batu kulata babañwi kusina buitati. (Joani 13:35) Ba mwa bulapeli bo, balutiwa kuli baswanela kukuteka batu kaufela mi buamuhela batu kaufela kusina taba ni litalo labona, lizo, lipuo, kamba lisimuluho zabona. (Likezo 10:34, 35) Bakeñisa kuli ba mwa bulapeli bo, balata batu babañwi, habayangi kwa ndwa.—Mika 4:3; 1 Joani 3:11, 12.

6.   Bulapeli bwa niti habuna babahulu ba bulapeli babalifiwa masheleñi, mi habufi mutu ufi kamba ufi wa mwa bulapeli bo malumbatina akutekeha hahulu.—Mateu 23:8-12; 1 Pitrosi 5:2, 3.

7.   Bulapeli bwa niti habuikenyangi nihanyinyani mwa litaba za lipolitiki. (Joani 17:16; 18:36) Nihakulicwalo, ba mwa bulapeli bo, bakuteka muuso mi bamamela milao ya muuso ya mwa libaka zebapila ku zona, ili kulumelelana ni taelo ya mwa Bibele yeli: “Mukutiseze Sesare zeli za Sesare[ili kutalusa milonga], kono mukutiseze Mulimu zeli za Mulimu.”—Mareka 12:17; Maroma 13:1, 2.

8.   Bulapeli bwa niti buama mupilelo, haki sizo kamba nto ya kuezeza feela mulao. Batu ba mwa bulapeli bo, bayemela likuka zepahami za Bibele za muzamao mwa bupilo bwabona kaufela. (Maefese 5:3-5; 1 Joani 3:18) Kono habaikutwi bumaswe kuli batokwa kueza cwalo; banani tabo kabakala kuli basebeleza “Mulimu yatabile.”—1 Timotea 1:11.

9.   Baba mwa bulapeli bwa niti bakaba babanyinyani. (Mateu 7:13, 14) Hañata, batu baba mwa bulapeli bwa niti habaangiwangi kuli ki sesiñwi, banyefulwanga, mi banyandiswanga kabakala kueza tato ya Mulimu.—Mateu 5:10-12.

Mutu haakoni kuziba bulapeli bwa niti kamba bwa buhata ka kuya ka mwaikutwela feela ka za bulapeli bo

 Lukona kukena mwa butata haiba luketa kuswalisana ni bulapeli bobuñwi ka libaka feela la kuli kunani moluikutwela ka za bulapeli bo. Bibele neipolofitile nako yeo ili fo batu “bakaikubukanyeza baluti [ba bulapeli] kuli bababulelele zebalata kuutwa mwa mazebe abona.” (2 Timotea 4:3) Kono Bibele ilususueza kuswalisana ni “bulapeli bobukenile ni bobusa nyazahali fapilaa Mulimu Ndataa luna,” nihaike kuli batu babañata habatabeli bulapeli bo.—Jakobo 1:27, litaluso ze kwatasi; Joani 15:18, 19.