Jeremia 21:1-14
21 Jeremia naamuhezi linzwi lelizwa ku Jehova, Mulena Zedekia+ hanaa mulumezi Pashuri+ mwanaa Malikija ni muprisita Zefania+ mwanaa Maaseya, kuli bayo mukupa, bali:
2 “Lwakukupa, ulubuzeze Jehova, kakuli Mulena Nebukadenezare* wa Babilona walulwanisa.+ Mwendi Jehova uka luezeza omuñwi wa misebezi yahae yekomokisa, ilikuli Nebukadenezare* akute, alusiye.”+
3 Jeremia ali ku bona: “Muyo bulelela Zedekia, muli:
4 ‘Jehova Mulimu wa Isilaele sabulela ki se, uli: “Nitahisa kuli lilwaniso za ndwa ze mwa mazoho ahao likufetuhele, zona lilwaniso zeulwanisa ka zona mulena wa Babilona+ ni Makaladeya baba kwande a lukwakwa, baba kuambekile. Mi nika likubukanyeza fahalaa muleneñi wo.
5 Mi na kasibili, nika milwanisa+ ka lizoho leliotolohile, lelimaata, ka buhali ni mabifi ni ka bunyemi bobutuna.+
6 Nikanata babayahile mwa muleneñi wo, batu hamoho ni lifolofolo. Bakabulaiwa ki butuku bobutuna, bobuyambukela.”’+
7 “‘“Mi hasamulaho,” kubulela Jehova, “Mulena Zedekia wa Juda ni batanga bahae ni batu ba muleneñi wo—bona babaka banda kwa butuku bobuyambukela bobubulaya, kwa mukwale, ni kwa lukupwe—nika bafa mwa lizoho la Mulena Nebukadenezare* wa Babilona, mwa mazoho a lila zabona, ni mwa mazoho a batu kaufela bababata kubabulaya.+ Uka babulaya ka mukwale. Haana kubautwela butuku, kamba kubaeza ka mukekecima kamba kubashwela makeke.”’+
8 “Mi ubulelele sicaba se, uli: ‘Jehova sabulela ki se, uli: “Nibeya nzila ya bupilo ni nzila ya lifu fapilaa mina.
9 Babaka siyala mwa muleneñi wo bakabulaiwa ka mukwale, ka lukupwe, ni ka butuku bobuyambukela. Kono mutu kaufela yakazwela kwande kuyo koza kwa Makaladeya baba miambekile, ukapila, mi bupilo* bwahae bukaba sina mbuya yahae.”’*+
10 “‘“Kakuli nilibisize pata yaka kwa muleneñi wo kuli niutahiseze kozi isiñi bunde,”+ kubulela Jehova. “Ukafiwa mwa mazoho a mulena wa Babilona,+ mi uka ucisa ka mulilo.”+
11 “‘Ku ba ndu ya mulena wa Juda: Hamuutwe linzwi la Jehova.
12 Mina ba ndu ya Davida, Jehova sabulela ki se, uli:
“Muyemele katulo yelukile zazi ni zazi kakusasana,Mi mulamulele yabukulwa ki muputeleli,+Kuli buhali bwaka busike bwatuka inge mulilo+Mi bulyante kusina yakona kubutima,Kabakala likezo zamina zemaswe.”’+
13 ‘Nilwanisa wena yayahile mwa musindi,*Wena licwe la naha yepatami,’ kubulela Jehova.
‘Haili wena yali: “Ki mañi yakato lulwanisa?
Mi ki mañi yakato taseza sibaka saluna?”
14 Nika kufa kotoKulikana ni likezo zahao,’+ kubulela Jehova.
‘Mi nikatumbeka mushitu wahao mulilo,Mi ukayongisa lika kamukana zekupotolohile.’”+
Litaluso ze kwatasi
^ Linzwi ka linzwi, “Nebukaderezare,” ka muñolelo omuñwi.
^ Linzwi ka linzwi, “Nebukaderezare,” ka muñolelo omuñwi.
^ Linzwi ka linzwi, “Nebukaderezare,” ka muñolelo omuñwi.
^ Kamba “moyo.”
^ Kamba “ukabanduka ni bupilo bwahae.”
^ Kamba “libala.”
