KAIZELI yabizwa Lisa * utalusa kuli: “Nenisusuelizwe hahulu ki sishemo sene banibonisize mizwale ni likaizeli.” Hanaabulela manzwi ao, naatalusa zenee mutusize kutaha mwa niti. Kaizeli yabizwa Anne ni yena naatusizwe ki nto yeswana, utalusa kuli: “Nto yenee nitusize kuituta niti ki sishemo sene banibonisize Lipaki za Jehova isiñi litaba zene baluta.” Likaizeli bababeli bao cwale baikola kubala Bibele ni kunahanisisa zebaituta, kono nto yenee batusize hahulu ki kuboniswa sishemo.

Lukona kubonisa cwañi sishemo kuli lususueze batu babañwi? Halunyakisiseñi linzila zepeli molukona kuezeza cwalo ili: ka lika zelubulela ni zelueza. Hasamulaho, lukanyakisisa ka za batu boluswanela kubonisa sishemo.

Musali wa miswalo yatalusizwe kwa Liproverbia kauhanyo 31 unani “mulao wa sishemo” fa lulimi lwahae. (Liprov. 31:26) Utuhelezi “mulao” wo kuetelela zabulela ni mubulelelo wahae. Bo ndate lubasi ni bona baswanela kuba ni “mulao” wo fa lulimi lwabona. Bashemi babañata baziba kuli haiba bahalifela bana babona, bakazwafa. Haiba bashemi baitusisa lipulelo zemaswe ni kusaiyakatwa maikuto a bana babona, bana babona mwendi habana kubautwa. Kacwalo, haiba bashemi babulela ka sishemo, kukabela bunolo bana babona kubautwa.

Ibe kuli mu bashemi kamba kutokwa, ki lika mañi zekona kumitusa kubulela ka sishemo? Kalulo yapili ya liñolo la Liproverbia 31:26 ilutusa kuziba zeluswanela kueza, ibulela kuli: “Mulomo wahae hauatama, kuzwa manzwi a butali.” Taba yeo italusa kuli luswanela kuketa hande manzwi elubulela ni molu abulelela. Hañata, kwatusa kuipuza kuli: ‘Kana taba yenibata kubulela ikahalifisa babañwi kamba ikatahisa kozo?’ (Liprov. 15:1) Kaniti, ki kwa butokwa kunahanisisanga pili lusika bulela kale.

Lishitanguti leliñwi libulela kuli: “Lipulelo zebulelwa ka kusanahanisisa liswana sina lilumo lelitaba.” (Liprov. 12:18) Haiba lunahanisisa mo litaba zelubulela ni molu libulelela kukona kuamela babañwi, kuka lubela bunolo kuketa hande manzwi. Kaniti luli, haiba lusebelisa “mulao wa sishemo,” haluna kubulela litaba zeutwisa babañwi butuku kamba kubulela ka buhali. (Maef. 4:31, 32) Mwa sibaka sa kunahana lika zemaswe ni kubulela lika zeutwisa babañwi butuku, lukabulela litaba zende, mi luka libulela ka sishemo. Jehova ulutomezi mutala omunde mwa taba ye ka kutiisa Elia yanaasabile hahulu. Lingeloi lene liyemela Jehova neliambozi ni yena ka “linzwi lene liutwahalela mwatasi, leliombalile.” (1 Mal. 19:12) Nihakulicwalo, kuba ni sishemo hakutalusi feela kubulela lipulelo zende. Hape luswanela kubonisa sishemo ka likezo zaluna. Lukona kueza cwañi cwalo?

Haiba luitusisa lipulelo zende ni kueza lika ka sishemo, lukalikanyisa Jehova. (Maef. 4:32; 5:1, 2) Bo Lisa, bababulezwi kwamulaho, batalusa mo Lipaki za Jehova neba baboniselize sishemo. Babulela kuli: “Lubasi lwaka hane lutaluselizwe kututa mwa ndu mone luina ka sipundumukela, mizwale bababeli ni bakubona  nebakupile sibaka kwa misebezi yabona kuli bato lutusa kulonga libyana. Ka nako yeo mane nenisika kala kale kuituta Bibele!” Sishemo sanaabonisizwe Kaizeli Lisa nesitahisize kuli akale kuituta niti.

Bo Anne, bababulezwi kwamulaho, ni bona nebaitebuhile hahulu sishemo sene babonisizwe ki Lipaki za Jehova. Batalusa kuli: “Nenituhezi kusepa batu babañwi bakeñisa zene baezize ku na batu bane basalapeli Jehova. Neku nibezi taata kusepa batu.” Bazwelapili kutalusa kuli: “Hane nikopani ni Lipaki za Jehova, nenisa basepi. Neniipuzize kuli: ‘Ki kabakalañi haba niisa pilu?’ Kono bakeñisa kuli bane baitutanga Bibele ni na neba nibonisize sishemo sa luli, nakala kubasepa.” Kueza cwalo nekutusize cwañi? Batalusa kuli: “Hamulaho wa nako, nakala kuisa pilu kwa litaba zene niituta.”

Mulemuhe kuli bo Lisa ni bo Anne nebasusuelizwe hahulu ki sishemo sene babonisizwe ki mizwale ni likaizeli mwa puteho, mi taba yeo neitahisize kuli batabele kuituta niti. Sishemo sene babonisizwe nesi batusize kukala kusepa Jehova ni batu bahae.

Batu babañwi kubabelanga bunolo kuitusisa manzwi amande ni kumenya kabakala sizo sabona. Ki hande kuli batu babañwi banani likute kabakala sizo kamba butu bwabona. Kono haiba leo ki lona feela libaka lelitahisa kuli lubonise sishemo, uzibe halubonisi sishemo sa Mulimu.—Mubapanye Likezo 28:2.

Sishemo sa Mulimu sa luli ki kalulo ya muselo wa moya wa Mulimu okenile. (Magal. 5:22, 23) Taba yeo italusa kuli lutokwa kutusiwa ki moya wa Mulimu kuli lubonise sishemo sa luli. Haiba lueza cwalo, lukalikanyisa Jehova ni Jesu. Mi ka kuba Bakreste, lwaiyakatwa batu babañwi luli. Kacwalo, lilato laluna ku Jehova Mulimu ni kwa batu babañwi lilususueza kubonisa sishemo. Haiba lueza cwalo, lukabonisa sishemo kuzwelela kwatasaa pilu yaluna mi lukatabisa Mulimu.

Kukona kulubela bunolo kubonisa sishemo ni buitumelo kwa batu baba lubonisize sishemo kamba batu boluziba. (2 Sam. 2:6; Makolo. 3:15) Kono kucwañi haiba luikutwa kuli hakuswaneli kubonisa mutu yomuñwi sishemo?

Halunyakisiseñi taba ye: Jehova ulutomezi mutala omunde hahulu wa kubonisa sishemo niha nelusa swaneli kuboniswa sishemo seo, mi mwa Linzwi lahae, luituta tuto ya butokwa ka za molukona kuboniseza kalemeno ka. Pulelo ya “sishemo sa Mulimu” iitusisizwe hañata-ñata mwa Mañolo A Sigerike A Sikreste. Mulimu ulubonisanga cwañi sishemo?

Jehova ubonisize sishemo batu babañata-ñata babapilile fa lifasi ka kubafa lika zebatokwa kuli bazwelepili kupila. (Mat. 5:45) Mane Jehova ulubonisize sishemo pili lusika muziba kale. (Maef. 2:4, 5, 8) Ka mutala, naafile batu kaufela mpo yende ka kufitisisa, ili Mwanaa hae wa libanda. Muapositola Paulusi naañozi kuli Jehova naalufile tiululo “kulikana ni butuna bwa sishemo sahae.” (Maef. 1:7) Hape nihaike kuli lwaezanga sibi mi fokuñwi luezanga lika zesatabisi Jehova, uzwelangapili kuluetelela ni kululuta. Litaelo zahae ni manzwi ahae aswana sina “pula yenela hande.” (Deut. 32:2) Kaniti luli, halukoni kumukutiseza kabakala sishemo kaufela salubonisize. Mi niti kikuli, nelusike lwaba ni sepo ya za kwapili kambe Jehova naasika lubonisa sishemo.—Mubapanye 1 Pitrosi 1:13.

Kusina kukakanya, sishemo sanani sona Jehova silususueza kumulata ni kumulikanyisa. Kacwalo, kufita kuketa batu ba kubonisa sishemo, luswanela kueza molukonela kaufela kulikanyisa Jehova ka kubonisa sishemo batu kaufela. (1 Mates. 5:15) Haiba lubonisa sishemo ka nako kaufela, batu bakabata kuba bukaufi ni luna sina feela mutu yasutelela kwa mulilo hakubatile. Lukaomba-omba ba lubasi lwaluna, mizwale ni likaizeli mwa puteho, bolusebeza ni bona, bolukena ni bona sikolo, ni batu babapila bukaufi ni luna.

Munahanisise mobakona kutusezwa batu mwa lubasi lwamina kamba mwa puteho haiba muitusisa manzwi amande ni kubabonisa sishemo ka lika zemueza. Mwa puteho yamina, mwendi kunani mutu yomuñwi yatokwa hahulu kutusiwa kukenisa ndu mwahali kamba fande kamba kuyo mulekelanga lika zeñwi. Hape mukona kubonisa sishemo ka kutusa mutu yomuñwi yemukopani ni yena mwa bukombwa yatokwa tuso.

Ka kulikanyisa Jehova, haike manzwi ni likezo zaluna kamita lietelelwe ki “mulao wa sishemo.”