Mwa ku Lutela Banana ka za Mulimu—Ki Milutelo ifi ye Sebeza Hande?

“Mi manzwi ao, e ni ku laela kacenu, a ine mwa pilu ya hao; mi u na ni ku a luta bana ba hao ka tokomelo, u be ni ngambolo ka ona, niha u inzi mwa ndu ya hao, niha u zamaya mwa nzila, niha u yo lobala, niha u zuha.”—DEUTRONOMA 6:6, 7.

FOKUÑWI, bashemi ba kona ku ikutwa ku imezwa ki buikalabelo bwa ku luta bana ba bona. Ha ba nze ba bata-bata likelezo, ba kona ku lyanganiswa ki liakalezo ze ñata ze ba utwa kamba ku bala za mwa ku petela buikalabelo bwa bona. Hañata, bahabo ni balikani ba matukelanga ku fa liakalezo za bona za mwa ku lutela bana. Mi mwa libuka, limagazini, ni fa Intaneti ku fumaneha likelezo ze ñata ze lukiselizwe bashemi mi fokuñwi likelezo zeo za lwanisananga.

Ka ku shutana, Bibele ha i fi feela kelezo ye itingwa ka ze ba swanela ku lutiwa banana, kono hape i fa ketelelo ye sebeza ya mwa ku lutela banana. Sina mo li boniseza litimana za mwa Bibele ze fahalimu, bashemi ba swanela ku fumana nako zazi ni zazi ya ku ambolanga ni bana ba bona ka za Mulimu. Ha lu nyakisiseñi liakalezo zee ne feela ze tomile fa Bibele ili ze tusize bashemi ba bañata-ñata ku luta bana ba bona ka za Mulimu.

1. Mu lute bana ba mina ze ba kona ku ituta kwa pupo. Muapositola Paulusi naa ñozi kuli: “Za Mulimu ze sa bonwi, ona maata a hae a kamita ni bumulimu bwa hae, ki ze bonahala hande haisamba lifasi li ezwa, inze li lemuhiwa mwa misebezi ya hae.” (Maroma 1:20) Bashemi ba kona ku tusa bana ba bona ku utwisisa kuli ba kona ku ba ni bulikani bwa luli ni Mulimu ha ba ba luta ku itebuha misebezi ya pupo ya Mulimu ni ku ba tusa ku utwisisa tulemeno twa Mulimu to tu patululwa mwa pupo.

Jesu naa itusisize mulutelo wo ha na luta balutiwa ba hae. Ka mutala, naa ize: “Mu talime linyunywani za lihalimu; kakuli ha li cali, ha li kutuli, ha li buluki mwa matuli; kono Ndataa mina ya kwa lihalimu wa li uta. Ha ni li, mina mu li fita hahulu?” (Mateu 6:26) Jesu fa, naa koñomekile tulemeno twa Jehova twa lilato ni mufelañeke. Jesu naa si ka feleza feela fo. Naa tusize balutiwa ba hae kuli ba nahanisise nzila yeo Mulimu naa bonisa ka yona tulemeno too kwa bana ba hae.

Mulena Salumoni ya butali naa bulezi ka za butali bwa file Mulimu kwa butwa, mi naa koñomekile tuto ya butokwa ka ku itusisa butwa. Naa ñozi kuli, “Wena ya buzwa, u ye kwa butwa, u shalime mukwa wa bona, u talife; ha bu na nduna, kamba muzamaisi ni mutatubi; nihakulicwalo, bu itukiseza sico sa bona litabula,  bu ipulukela sona ha ku kutulwa.” (Liproverbia 6:6-8) Ki nzila ye nde ya ku luta ka yona bana mwa ku itomela likonkwani ze nde ni mwa ku itusiseza maata a lu file Mulimu mwa ku taleleza likonkwani zeo!

Bashemi ba kona ku latelela mulutelo wo munde wa Jesu ni wa Salumoni ka ku eza lika ze latelela: (1) Ka ku buza bana ba bona limela ni lifolofolo ze ba tabela. (2) Ka ku ituta ze ñata ka za limela ni lifolofolo zeo. (3) Ka ku bata ze ba kona ku ituta bana ba bona ka za Mulimu kwa limela ni lifolofolo zeo.

2. Mu likanyise mubonelo wa Jesu kwa batu ba naa luta. Kwa batu ba ba pilile, Jesu ki yena feela ya naa na ni litaba za butokwa hahulu za ku bulela. Nihakulicwalo, naa tandile nako ye ñata kwa ku buza batu lipuzo. Naa iyakatwa luli ku utwa mihupulo ni maikuto a batu ba naa luta. (Mateu 17:24, 25; Mareka 8:27-29) Ka ku swana, bashemi ba na ni litaba ze ñata za butokwa za ku luta bana ba bona. Kono kuli ba kondise mwa buikalabelo bo, bashemi ba swanela ku likanyisa Jesu ni ku susueza bana ba bona kuli ba lukuluhe ku talusa mo ba ikutwela.

Ku cwañi haiba banana ba na ni mubonelo o maswe kamba ba palelwa ku ituta ka bubebe tuto ye ñwi ya butokwa? Ha mu nyakisise mo Jesu naa lutezi baapositola ba hae. Ka linako ze ñwi, baapositola ne ba kananisananga mi ne ba sa koni ku ituta ka bunolo bunde bo bu fumanwa mwa ku ikokobeza. Niteñi, Jesu naa zwezipili ku ba ni pilu-telele, mi naa kuta-kutezi ku ba bulelela butokwa bwa ku ikokobeza. (Mareka 33, 34; Luka :46-48; 22:24, 25) Bashemi ba ba likanyisa Jesu ba ka hakulula bana ba bona ka pilu-telele, mi ha ku swanela ba ka kuta-kutela ku luta bana ba bona ku fitela ba utwisisa butokwa bwa tuto ye ba lutiwa. *

3. Mu eze ze mu ba luta. Bashemi ba swanela ku teeleza kwa kelezo ya naa file muapositola Paulusi kwa Bakreste ba ne ba pila mwa Roma. Naa ba ñolezi kuli: “Kono wena ya luta ba bañwi, hasi ha u na so ituta ili wena? Wena ya bulela kuli ku si ke kwa uzwiwa, hasi wa uzwa?”—Maroma 2:21.

Kelezo yeo ya swanela bakeñisa kuli banana ba latelelanga hahulu ze ba eza bashemi ba bona ku fita ze ba bulela. Haiba bashemi ba eza ze ba luta, ba kona ku tusa bana ba bona ku utwa ze ba lutiwa.

4. Mu kalise ku luta mwanaa mina inze a sa li mbututu. Timotea, ya na zamayanga ni muapositola Paulusi mwa misipili ya bulumiwa naa na ni libubo le linde mwa silalanda sa na pila ku sona. (Likezo 16:1, 2) Libaka ne li la kuli “ku zwa kwa bwanana” naa lutilwe “Mañolo a kenile.” Bo mahe Timotea ni bo kukwaa hae ne ba si ka mu luta feela ku bala Mañolo, kono hape ne ba mu tusize ku nahanisisa fa niti ye fumaneha mwa Mañolo ao.—2 Timotea 1:5; 3:14, 15.

Ko mu Kona ku Fumana Tuso

Lipaki za Jehova ba hatisanga libuka ze shutana-shutana ili ze lukiselizwe ku tusa bashemi kuli ba lute bana ba bona niti ka za Mulimu. Libuka ze ñwi sihulu li ñolelwanga ku tusa banana. Batu ba bañwi ba kona ku tusa bashemi ni bana ba bona kuli ba ambolisanange ka ku lukuluha ka nako kaufela. *

Niti kikuli, pili bashemi ba si ka luta kale bana ba bona ka za Mulimu, ba swanela ku ziba likalabo kwa lipuzo ze ñwi ze taata ze ba kona ku buza banana. Ka mutala, mu kona ku alaba cwañi lipuzo ze latelela: Ki kabakalañi Mulimu ha tuhelela manyando ku ba teñi? Mulelo wa Mulimu ka za lifasi ki ufi? Ba ba shwile ba kai? Lipaki za Jehova ba ka tabela ku mi tusa kuli mu zibe likalabo kwa lipuzo zeo mane ni lipuzo ze ñwi ilikuli mina ni lubasi lwa mina mu kone ku sutelela ku Mulimu.—Jakobo 4:8.

[Litaluso za kwatasi]