Kana Likozi za ka Taho li Bonisa Kuli Mulimu u Situhu?

ZE BA BULELA BATU BA BAÑWI: “Mulimu ki yena ya busa lifasi, mi ki yena ya tahisa likozi za ka taho; kamukwaocwalo, u lukela ku ba ya situhu.”

ZE I BULELA BIBELE: “Lifasi kamukana li mwa maata a ya maswe.” (1 Joani 5:19) “Ya maswe” yo ki mañi? Bibele i talusa kuli ki Satani. (Mateu 13:19; Mareka 4:15) Kana taba yeo haki ya niti? Mu nahane taba ye: Haiba Satani u na ni maata fahalimwaa lifasi, u zibe ki yena ya kukueza batu ku ba ni buitati, ku ba ni mukwañuli ni ku eza likatulo ze maswe sina yena. Kana taba yeo ha i bonisi libaka batu ha ba palelwa ku babalela lifasi mo ba pila? Licaziba ze ñata li bulela kuli, ku sa babalela hande lifasi ki kona ko ku tahisa likozi za ka taho, ku li ekeza, kamba ku beya bupilo bwa batu mwa lubeta.

Haiba ki cwalo, ki kabakalañi Mulimu ha tuhelezi Satani ku kukueza batu ku eza lika ze maswe ku zwelela feela foo bashemi ba luna ba pili ne ba kwenuhezi puso ya Mulimu? Ku zwelela feela ona fo, buñata bwa batu ba bile bakwenuheli. Keto yeo, ya ku kwenuhela puso ya Mulimu, ki yona ye tahisize kuli lifasi li be mwatasaa puso ya Satani yena ya li sila sa Mulimu. Ki lona libaka Jesu ha naa bizize Satani kuli ki “mubusi wa lifasi.” (Joani 14:30) Kana Satani u ka busa ku ya ku ile? Batili!

Jehova * haa na lunya mi haki kuli haa na taba ni manyando a tahisa Satani kwa batu. Kakuli mane Mulimu wa utwanga bumaswe ha bona batu inze ba nyanda. Ka mutala, ka nako ye ne si nyanda sicaba sa Isilaele, Bibele i bulela mwa naa ikutwezi Mulimu kuli: “Mwa liñalelwa za bona a kalelwa hamoho ni bona.” (Isaya 63:9) Bakeñisa sishemo sa hae, hona cwale-cwale fa Mulimu u ka felisa puso ya Satani ye situhu! U ketile Mwanaa hae, yena Jesu Kreste, kuli a buse ka ku luka ni ka busepahali ku ya ku ile.

LIBAKA HA LU SWANELA KU ZIBA KALABO: Nihaike kuli puso ya Satani i palezwi ku sileleza batu kwa likozi za ka taho, puso ya Jesu yona i ka kona ku eza cwalo. Ka nako ye ñwi Jesu naa silelelize balutiwa ba hae kwa liñungwa le lituna. Bibele i bulela kuli: “A kalimela moya mi a li kwa liwate: ‘Kuza! U li tuu!’ Mi moya wa yema, mi kwa ombala luli.” Balutiwa ba ipuza kuli: “Ki mañi luli yo? Nihaiba moya ni liwate za mu utwa.” (Mareka 4:37-41) Kezahalo yeo, i lu fa sepo ya kuli Jesu u ka sileleza batu kaufela ba ba ipeya ku utwa ka nako ya ka busa sina Mulena—Daniele 7:13, 14.

[Litaluso za kwatasi]

[Siswaniso se si fa likepe 4]

Mulimu naa file Mwanaa hae maata a ku felisa likozi za ka taho