Bibele yashutana ni libuka zeñwi. Mwa Bibele, kunani likelezo zezwa ku Mubupi waluna. (2 Timotea 3:16) Litaba ze mwateñi zakona kulutusa hahulu. Mane Bibele ibulela kuli: “Linzwi la Mulimu lapila mi linani maata.” (Maheberu 4:12) Bibele inani maata akulutusa mwa linzila zepeli zetuna ili kuluetelela mwa bupilo bwaluna bwa ka zazi ni zazi, ni kulutusa kuziba Mulimu ni lisepiso zahae.—1 Timotea 4:8; Jakobo 4:8.

Yakona kumitusa mwa bupilo bwamina ka nako ya cwale. Bibele yakona kumitusa mwa bupilo bwamina bwa ka zazi ni zazi. Mwa Bibele kunani likelezo zekona kulutusa mwa linzila zelatelela

•   Kupilisana hande ni babañwi.—Maefese 4:31, 32; 5:22, 25, 28, 33.

• Kuba ni buiketo bwa mwa munahano ni bwa kwa mubili.—Samu 37:8; Liproverbia 17:22.

• Kuambuka muzamao omaswe.—1 Makorinte 6:9, 10.

• Kusebeza ka taata kuli lufumane za kuipilisa ka zona.—Liproverbia 10:4; 28:19; Maefese 4:28. *

Mutu yomuñwi ni musalaa hae babapila kwa Asia, nebaitebuhile hahulu kelezo yetusa ya mwa Bibele. Sina feela mokuinezi kwa batu babañata babasazo nyalana, nekubile taata ku mutu yo ni musalaa hae kuutwisisana mi nekuli taata kuambolisana ka kulukuluha. Kono nebakalile kusebelisa zene babala mwa Bibele. Ki lika mañi zene zwile mwateñi? Bo Vicent, ili ba baana, babulela kuli: “Zene nibalile mwa Bibele, nelinitusize kutatulula matata a mwa linyalo laluna ka nzila ye lilato. Kusebelisa litaba za mwa Bibele, kulutusize kupila ka tabo ni musalaa ka.” Bo musalaa bona bababizwa bo Annalou, balumela taba yeo ka kubulela kuli: “Kubala litaba za batu babañwi mwa Bibele kulutusize. Ninani tabo ka nako ya cwale, mi naitebuha linyalo laluna hamoho cwalo ni likonkwani zeluitomezi mwa bupilo.”

Kuziba Mulimu. Kwandaa kubulela litaba zeama linyalo labona, bo Vicent hape babulela kuli: “Kubalanga Bibele kunitusize kusutelela hahulu ku Jehova kufita haisali.” Taba yebabulela bo Vicent ikoñomeka taba ya butokwa ya kuli Bibele yakona kumitusa kuba ni bulikani bobunde ni Mulimu. Ka kueza cwalo, mukatusiwa ki kelezo yafa Mulimu mi mukaziba hande Mulimu sina mulikanaa mina. Mi mukalemuha kuli Mulimu upatulula litaba ka za bupilo bobunde bwa kwapili, ili nako yemuka ikola “bupilo sakata” bwa kuya kuile. (1 Timotea 6:19) Kwandaa Bibele, hakuna buka yeñwi yekona kusepisa litaba zende zeo.

Haiba muikataza kubalanga Bibele ni kusatuhela, ni mina mwakona kutusiwa cwalo, ili kutusiwa mwa bupilo bwamina ka nako ya cwale ni kuziba Mulimu. Kono hamunze mubala Bibele, mwendi mukaba ni lipuzo zeñata. Haiba kuba cwalo, muhupule mutala omunde wa Muetopia yanaapilile lilimo ze 2,000 kwamulaho. Naanani lipuzo zeñata ka za Bibele. Hanaabuzizwe ka za haiba naautwisisa zanaabala, naaalabile kuli: “Nikautwisisa cwañi, konji haiba yomuñwi anietelela?” * Hasamulaho, aamuhela tuso yanaafilwe ki Filipi, yanaali muluti yomunde wa Bibele, ili yo hape naali mulutiwa wa Jesu wa kwa makalelo. (Likezo 8:30, 31, 34) Ka kuswana, haiba mwatabela kutusiwa kuli muzibe zeñata ka za Bibele, lumisusueza kukupa tuso fa Intaneti, ili fa webusaiti ya www.dan124.com kamba muñolele kwa keyala ya sibaka sesili bukaufi ni mina yebonisizwe mwa magazini ye. Hape mwakona kubuza Lipaki za Jehova babapila bukaufi ni mina kamba mwakona kuya kwa Ndu ya Mubuso ye mwa silalanda semupila kusona. Mwakona kuipumanela Bibele mi mulike mo mukonela kuli imietelele ilikuli mupile bupilo bobunde.