LITANGWA“Batu basweli kueza lika zemaswe zeñata ili zekatahisa butata mwa lifasi honacwale-cwale fa. Litolopo zetuna likatuha litiba mwa mezi. Kucisa kokutuna hahulu. Mañungwa asabisa. Kutaela kwa mezi mwa libaka zeñata za lifasi. Kufela kwa mifuta yemiñwi ya likota ni lifolofolo. Taba ye haki matangu feela kamba litaba za kushangela feela. Basayansi batalusa kuli ki zona zeka ezahala haiba ba muuso basacinci milao ya bona yeama mwa kuitusiseza maata azwelela fa lika zebupilwe.”—Ao ki manzwi anabulezwi ki yomuhulu wa katengo ka United Nations, yabizwa António Guterres, ka za piho yene ihatisizwe la April 4, 2022 kuamana ni mukopano wa baeteleli ba linaha zeshutana-shutana kone kuambolwa za butata bwa kubata kamba kucisa hahulu.

 “Basayansi basweli kulemusa kuli mwa lilimo zetaha mishitu yebato eza 423 [mwa United States], ikasinyeha kabakala butata bwa kubata kamba kucisa hahulu, sihulu bakeñisa kuli mwa mishitu yeo kucisanga hahulu. Lika zemaswe zekaezahala zeo libata kuswana ni likozi zelubalanga mwa Bibele: mulilo ni muunda, kushengunuka kwa bikoto bya mezi, kuekezeha kwa mandinda a mwa mawate ni kucisa kokutuna.”—Mutende wa The New York Times, wa June 15, 2022 mwatasaa toho ya taba yeli, “Flooding Chaos in Yellowstone, a Sign of Crises to Come.”

 Kana butata bwa kusinyeha kwa lifasi bwakona kufeliswa? Haiba ki cwalo, ki mañi yaka bufelisa? Munyakisise zeibulela Bibele.

 Bibele ibulela kuli Mulimu ukasinya “babasinya lifasi.” (Sinulo 11:18) Timana ye iluluta lika zetaalu ze:

1.  1. Likezo za batu likasinya hahulu lifasi.

2.  2. Butata bwa kusinyeha kwa lifasi bukafela.

3.  3. Mulimu ki yena yakafelisa butata bwa kusinyeha kwa lifasi, isike batu.

 Bibele ibulela kuli “lifasi liina kuya kuile.” (Muekelesia 1:4) Kukaba ni batu fateñi kamita.

•   “Babalukile bakaluwa lifasi, mi bakapila ku lona kuya kuile.”—Samu 37:29.

 Lifasi laluna lika kutela kuba leliiketile hape.

•   “Lihalaupa ni naha yeomile likanyakalala, mi lihalaupa likawabelwa ni kutubula lipalisa sina safrani.”—Isaya 35:1.