La January 27, 2023, batu babañata mwa lifasi kaufela bakaeza Mukiti wa Kuhupula Lizazi la Pulao Yesituhu ya Majuda. Lika zemaswe zene ezahezi ibatoba lilimo zefitelela 75 kwamulaho, likona kumitahiseza kunahana libaka Mulimu hanaatuhelezi pulao yesituhu yeo.

•   Kuli muzibe zeibulela Bibele ka za taba yeo, mubale taba yeli, “Ki Kabakalañi Hane Kubile ni Pulao Yesituhu ya Majuda? Ki Kabakalañi Mulimu Hanaa Ituhelezi?”

 Majuda ki bona bane babulailwe hahulu mwa pulao yesituhu yeo. Batu babañata nebabulailwe ka bomu. Batu babañwi ni bona nebanyandisizwe ni kubulaiwa ka nako ya pulao yesituhu yeo. Babañwi ba batu bao neli Lipaki za Jehova ili bane banyandisizwe kabakala tumelo yabona yetomile fa Bibele.

•   Kuli muzibe zeñata, mubale taba yeli, “Nekuezaheziñi Kwa Lipaki za Jehova ka Nako ya Pulao Yemaswe ya ba Nazi?”

 Batu babañata banani sabo ya kuli kezahalo yemaswe yeswana sina Pulao Yesituhu ya Majuda yakona kuezahala hape. Kwatabisa kuziba kuli, Bibele isepisa kuli likezahalo zemaswe zecwalo halisana kuba teñi kwapili.

•   “‘Kakuli niziba hande mihupulo yeni minahanela,’ kubulela Jehova, ‘ili mihupulo ya kozo, isiñi ya kozi, kuli nimife bupilo bobunde kwapili, ni sepo.’”—Jeremia 29:11. a

 Sepiso yeo ikatalelezwa Jehova Mulimu haakaanga muhato wa kufelisa bumaswe. Honacwale-cwale fa:

•   Ukazwisa batu babanyandisa babañwi.—Liproverbia 2:22.

•   Ukafelisa miinelo yetaata yebatalimana ni yona batu.—Sinulo 21:4.

•   Ukazusa babashwile kuli bato pila hape fa lifasi.—Joani 5:28, 29.

 Mwakona kusepa sepiso yeomba-omba yefumaneha mwa Bibele. Kuli muitute zeñata, muamuhele tuto yaluna ya Bibele yesalifelwi.