Mulangwe wa bubela: Leza wātūdile’ko Sabato kitatyi kyaākōkolokelwe mu difuku dya busamba-bubidi.

 Bubine: Bible unena’mba: “Leza wāesela difuku dya busamba-bubidi ne kwiditela bu dikola, mwanda mu dino difuku’di Leza wādi ukikōkolokwa ku mwingilo onso waāpangile, onso waētungīle kulonga.” (Ngalwilo 2:3) Mu uno vese kemudipo kijila kya muntu, ino binenwa bilombola bintu byālongele Leza mu difuku dya busamba-bubidi dya bupangi. Bible katelelepo muntu wākōkolokelwe dya sabato kumeso kwa mafuku a Mosesa.

 Mulangwe wa bubela: Bene Isalela bādi balonda kijila kya Sabato ku meso kwa Mosesa kwibapa Bijila.

 Bubine: Mosesa wāsapwidile bene Isalela amba: “Yehova Leza wetu wasambile netu kipwano mu Holeba,” kifuko kidi dya ku Lūlu lwa Shinai. Mu kino kipwano mwādi ne kijila kya Sabato. (Kupituluka mu Bijila 5:2, 12) Muswelo wādi umona bene Isalela Sabato ulombola’mba yādi myeni kobadi. Shi bene Isalela bādi balonda kijila kya Sabato dibajinji pobādi mu Edipito, le Sabato yādi ya kwibavuluja namani kunyongololwa mu Edipito na mwānenene’kyo Leza? (Kupituluka mu Bijila 5:15) Mwanda waka bebānenene kuleka kuboya mana mu difuku dya busamba-bubidi? (Divilu 16:25-30) Ne mwanda waka bākomenwe kupwa mwanda wa muntu mubajinji kujilula Sabato?—Umbadilo 15:32-36.

 Mulangwe ya bubela: Sabato i kipwano kya endaenda kadi ifwaninwe kulamwa nyeke.

 Bubine: Mu malamuni amo a Bible i batele’mo Sabato bu “kipwano kya nyeke ne nyekeke.” (Divilu 31:16, Dibuku Dijila) Inoko kishima kya Kihebelu kyalamwinwe bu “kya nyeke ne nyekeke,” kibwanya ne kushintulula pa “kilādila kufika ne mu mafuku a kumeso ampikwa kuyukana,” ke enkapo nyeke. Kimfwa, Bible wingidije kino kishima paesambila pa butobo bwa bene Isalela, bwine bwāfudije Leza pano ke padi kintu kya myaka 2 000.—Divilu 40:15; Bahebelu 7:11, 12.

 Mulangwe wa bubela: Bene Kidishitu bafwaninwe kulama Sabato mwanda Yesu wālamine’yo.

 Bubine: Yesu wālamine Sabato mwanda wadi Muyuda, mungya kibutwila wādi unenwe kukōkela Bijila bya Mosesa. Yesu pa kufwa, kino kipwano kya Bijila, kubadila’mo ne Sabato, byātalulwa’ko.—Bene Kolose 2:13, 14.

 Mulangwe wa bubela: Mutumibwa Polo paāikele ke mwine Kidishitu, wālamine Sabato.

 Bubine: Polo wādi utwela mu mashinankonka mu dya Sabato, ke kukeilamapo pamo na Bayuda. (Bilongwa 13:14; 17:1-3; 18:4) Ino wālondele kibidiji kya mu kine kitatyi’kya, wāsapula myanda miyampe mu mashinankonka, mwanda bādi beta baneni bapempudi ba kunena ku meso a boba bādi bebunga mwanda wa kutōta. (Bilongwa 13:15, 32) Polo wādi usapula “difuku ne difuku” ke enkapo mu dya Sabato.—Bilongwa 17:17.

 Mulangwe wa bubela: Difuku dya Sabato ku bene Kidishitu i Dya Yenga.

 Bubine: Mu Bible i mutupu pantu nansha pamo palombola’mba bene Kidishitu bafwaninwe kukōkolokwa ne kutōta Dya Yenga. Ku bene Kidishitu babajinji, Dya Yenga dyādi difuku dya kwingila’nka bwa mafuku onso. Dibuku dimo (The International Standard Bible Encyclopedia) dinena’mba: “Byalombele kukungila kufika ne mu myaka katwa ka buná, bene Kidishitu bashilula kumona Dya Yenga bu dya sabato, kitatyi kyanenene constantin [mbikavu wa Loma mujentaila] amba mingilo imoimo keifwaninwepo kwingilwa Dya Yenga.” a

 Le penepa, le i bisonekwa’ka bimweka bu bilombola’mba Dya Yenga dyādi difuku dya pa bula? Bible unena’mba mutumibwa Polo wādīle byakudya na banababo mu lwitabijo “mu difuku dibajinji dya mu yenga,” mu Dya Yenga. Byādi na buluji, mwanda Polo wādi utaluka difuku dilonda’ko. (Bilongwa 20:7) Muswelo umo onka, bipwilo bimo bēbilombwele kulea’ko lupeto mu “difuku dibajinji dya yenga ne yenga,” mu Dya Yenga, lwa kukwasha nalo bantu. Ino wādi’tu mulangwe wa kamweno wa mwa kulamina lupeto. Kebādipo bāya na byabuntu ku kifuko kya kutōtela’po ino byādi bibīkwa ku njibo.—1 Bene Kodinda 16:1, 2.