Aa, aye kafundijangapo amba ‘kukūlwa, i kukūlwa lonsololo.’ Muntu umona lupandilo kupityila ku lwitabijo mudi Yesu Kidishitu, ubwanya kujimija lwitabijo lwandi ne lupandilo lwine kumo. Bible unena’mba pa kulama lwitabijo bilomba kulonga bukomo bukatampe, kulwa “bulwi bukatampe.” (Yude 3, 5) Bāsapwidile bene Kidishitu babajinji bādi kala betabije Kidishitu amba: “Mwielelei’ko nyeke mufikijije lupandilo lwenu na moyo ne luzakalo ponka.”​—Bene Fidipai 2:12.

Bisonekwa bya mu Bible bipela bufundiji bwa amba, ‘kukūlwa, i kukūlwa lonsololo’

•   Bible uletanga bidyumu pa bubi bukatampe bubwanya kulengeja muntu aleke kukatwela mu Bulopwe bwa Leza. (1 Bene Kodinda 6:9-11; Bene Ngalatea 5:19-21) Shi muntu kadipo ubwanya kujimija lupandilo, nabya bino bidyumu byadi bya kwikala bya bitupu. Ino aye Bible ulombola’mba muntu mukūlwe ubwanya kujimija lupandilo shi walonga monka bubi bukatampe. Kimfwa, Bahebelu 10:26 unena’mba: “Shi tulongalonga bubi ku kusaka batwe papo ketudi kala batambule buyuki bwinebwine bwa bubine, kekukishelepo kitapwa kya bubi nansha kimo.”​—Bahebelu 10:26; 6:4-6; 2 Petelo 2:20-22.

•   Yesu wālombwele amba kulama lwitabijo kudi na kamweno, paēdingakenye na muñanza mu kyelekejo, balondi bandi nabo na misambo ya uno muñanza. Bamo mobadi bādi bakulombola lwitabijo mwadi kupityila ku bipa byabo, nansha bilongwa byabo, ino ne kukomenwa kulonga namino kupwa ‘baelwa panja pamo bwa musambo,’ bajimija ne lupandilo lwabo. (Yoano 15:1-6) Mutumibwa Polo nandi wāingidije kyelekejo pamo bwa kino, wānena’mba bene Kidishitu kebalaminepo lwitabijo ‘bakebatēta’ko.’​—Bene Loma 11:17-22.

•   Bene Kidishitu i bebasoñanye ‘bakeshe’nka kukesha.’ (Mateo 24:42; 25:13) Boba baponena mu tulo twa ku mushipiditu, shi na kulonga “mingilo ya fukutu” nansha na kuleka kwingila ne pa mfulo mingilo yāsoñenye Yesu, bajimijanga lupandilo lwabo.​—Bene Loma 13:11-13; Kusokwelwa 3:1-3.

•   Bisonekwa bivule bilombola’mba boba bakūdilwe bafwaninwe kūminina na kikōkeji kufika ne ku mfulo. (Mateo 24:13; Bahebelu 10:36; 12:2, 3; Kusokwelwa 2:10) Bene Kidishitu ba mu myaka katwa kabajinji bāsangele pobāivwene amba banababo mu lwitabijo bōminine mu lwitabijo lwabo. (1 Bene Tesalonika 1:2, 3; 3 Yoano 3, 4) Le byadi bya kwikala na buluji Bible esambile pa kūminina na kikōkeji shi bantu kebāūminepo nabo bakapanda?

•   Polo wāyukile amba ukapanda bya bine enka pāfwenene lufu lwandi. (2 Temote 4:6-8) Ku ngalwilo kwa būmi bwandi, wāitabije amba shi wālongele bintu mungya bya kusakasaka bya ngitu wādi wa kujimija lupandilo lwandi. Wālembele amba: “Nkupilanga umbidi wami ne kwiumuna bupika, kutyina’mba pa kupwa kusapwila bakwabo, ami mwine nakapelwa mu muswelo kampanda.”​—1 Bene Kodinda 9:27; Bene Fidipai 3:12-14.