Ezekyele 38:1-23
38 Kinenwa kya Yehova kyaiya monka kondi amba:
2 “Mwanā muntu, tadija mpala yobe kudi Koka wa ntanda ya Makoka,+ mfumu mukatampe* wa Mesheke ne Tubala,+ unene bupolofeto pādi.+
3 Nena’mba, ‘Mfumu Mwinē Lupusa Lonso Yehova wanena namino amba: “Nsa kulwa nobe, abe Koka, mfumu mukatampe* wa Mesheke ne Tubala.
4 Nsa kukujokeja ne kukutunga malobo mu bibanga+ byobe ne kukutambija pamo na kibumbo kyobe kyonso kya divita,+ tubalwe ne bakandanga pa tubalwe, abo bonso bavwele bya buya bwa dyangi, kitango kikatampe kidi na mangabo makatampe ne mangabo matyematye,* abo bonso bengidija bipete;
5 Peleshia, Efiopya, ne Puta+ badi nabo, abo bonso na ngabo mityetye ne kilama mutwe;
6 Ngomela, ne bibumbo byandi byonso bya basola, njibo ya Tongalama+ ya ku bipindi bya kulampe bininge bya kungala, pamo ne bibumbo byandi byonso bya basola—bantu bavule badi nobe.+
7 “‘“Mwiteakanyei, mwilongololei, abe ne bibumbo byobe byonso bya divita bibungile nobe pamo, abe ukekala mukatampe* wabo.
8 “‘“Kupwa kwa mafuku mavule, ukatebwa mutyima.* Ku mfulo ya myaka ukatamba ntanda ya bantu bajokejibwe ku musala obasadilwe na kipete, balupwilwe ku bantu bavule babungilwa pa ngulu ya Isalela, yadi ilēle mu masala tamba kala. Bekadi ba ino ntanda bajokejibwe kutamba ku bantu, kadi abo bonso bashikete na mutyima-ntenke.+
9 Abe ukāya pobadi pamo bwa kimpumpu, kadi ukapūta ntanda pamo bwa makumbi, abe ne bibumbo byobe byonso bya basola ne bantu bavule bokekala nabo.”’
10 “Mfumu Mwinē Lupusa Lonso Yehova wanena namino amba: ‘Mu dyodya difuku, milangwe ikakwiya mu mutyima obe, kadi ukakuta nkuku mibi.
11 Ukanena’mba: “Nsa kutamba ntanda ya bīkalo byampikwa kukingwa.*+ Nsa kwiila boba bashikete na mutyima-ntenke, pampikwa kukambakanibwa, abo bonso bashikete mu bīkalo byampikwa kukingwa na mumbu, na mikabo, nansha na bibelo.”
12 Mwanda wa kusela bikwatwa ne bitūtwa, kutamba bifuko bisalwe bikelwe+ pano ne bantu bebunge dipya batambile ku mizo,+ bongwija bupeta ne bintu,+ boba bekele pa bukata bwa ntanda.
13 “‘Sheba+ ne Dedane,+ bansunga ba Talashishi+ ne ba bulwi* bandi bonso bakakunena’mba: “Le wiyanga kutamba mwanda wa kusela bikwatwa ne bitūtwa bivule? Le ubabunge bibumbo byobe bya divita mwanda wa kusela ndalama ne olo, kuyata bupeta ne bintu, kukwata bikwatwa bikatampe bininge?”’
14 “O mwanda, a mwanā muntu, nena bupolofeto, sapwila Koka amba, ‘Mfumu Mwinē Lupusa Lonso Yehova wanena namino amba: “Mu dine difuku’dya pakekala bantu bami bene Isalela na mutyima-ntenke, le kukayuka’kyopo?+
15 Ukatamba ku kifuko kyobe, ku bipindi bya kulampe bininge bya kungala,+ abe ne bantu bavule bokekala nabo, abo bonso bakandile pa tubalwe, kitango kikatampe, kibumbo kikatampe kya divita.+
16 Ukāila bantu bami bene Isalela pamo bwa makumbi apūta ntanda. Ku mfulo ya mafuku nkakuleta pa ntanda yami+ amba mizo indyuke ponkepandula ami mwine kupityila kudi abe ku meso abo, abe Koka.”’+
17 “Mfumu Mwinē Lupusa Lonso Yehova wanena namino amba: ‘Le ke’nkapo abe onanenene mafuku a kala kupityila kudi bengidi bami bapolofeto ba Isalela, banenene bupolofeto myaka mivule amba ukaletwa mwanda wa kulwa nabo?’
18 “‘Mu dyodya difuku, difuku dikatamba Koka ntanda ya Isalela,’ i Mfumu Mwinē Lupusa Lonso Yehova unena, ‘bukalabale bwami bukatampe bukāka.+
19 Nkesamba na bupyasakane bwami, na mudilo wa bukalabale bwami; kadi mu dyodya difuku kukekala kutenkana kukatampe kwa ntanda mu ntanda ya Isalela.
20 Pa mwanda wami, mwita wa dijiba, byoni bya mūlu, banyema ba ntanda, bībulula byonso bilandala pa nshi, ne bantu bonso badi pa ntanda bakazakala, kadi ngulu ikafulamikwa,+ manenekelo akabunduka, mumbu yonso nayo ikapona pa nshi.’
21 “‘Nkamwityila kipete pa ngulu yami yonso,’ i Mfumu Mwinē Lupusa Lonso Yehova unena. ‘Kipete kya muntu ne muntu kikalwa na mwanabo.+
22 Nkamutyibila mambo* na kipupo kya misongo+ ne kumwanga mashi; kadi nkanokeja kinya kikatampe kya mvula ne mabwe a mvula+ ne mudilo+ ne bibidikityi+ pādi ne pa bibumbo byandi bya basola ne pa bantu bavule bakekala nabo.+
23 Kadi na bubine nketumbija ami mwine ne kwipandula ami mwine ne kwiyukanya ku meso a mizo mingimingi; penepo bakayuka’mba ami ne Yehova.’
Kunshi kwa Dyani
^ Nansha’mba “mfumu mukulu.”
^ Nansha’mba “mfumu mukulu.”
^ Kangabo, divule kaselwanga na boba bela miketo.
^ Kishima pa kishima i, “mulami.”
^ Nansha’mba “uketwa.”
^ Nansha’mba “ntanda ya kunja idi pululu.”
^ Nansha’mba “bantambo bana ba manyenze.”
^ Nansha’mba “Nkatwela nandi mu butyibi.”
