Kitango kya ntanda kya mu 2020 kyadi kya kasekuseku mānga, mwanda kyadi kitango kibajinji ntanda yonso kyakwetwe ku mawi ne kutūlwa pa Entelenete! Inoko, mu Malawi ne mu Mozambike, batutu ne bakaka bavule balondele kitango pa kubulwa kwingidija Entelenete. Le balongele’byo namani?

 Makomite abidi, wa Bakwatakani ne wa Bufundiji, aitabije mu muswelo wa pa bula amba kitango kilondwe ku televijo ne ku ladiyo mu Malawi ne mu Mozambike. Mwanda waka baitabije mu uno muswelo wa pa bula? Kujokoloka ntanda yonso, Entelenete ya mu Malawi idi na bei bininge, o mwanda i Batumoni batyetye kete babwanya kutwela pa Entelenete. William Chumbi, tutu umo wa mu Komite wa Musambo wa Malawi washintulwile amba: “Muswelo umo kete wa kupa batutu ne bakaka byakudya bya ku mushipiditu i kupityila ku ladiyo ne ku televijo.” Luka Sibeko, tutu mukwabo wingilanga mu Komite wa Musambo wa Malawi ubweja’ko amba: “Shi kebetupelepo bino bidibwa kupityila ku Televijo ne ku ladiyo, i banabetu batyetye kete ba mu mwaba wa wetu musambo badi babwanya kulonda kino kitango.” Mu Mozambike namo, i banabetu batyetye badi ba kubwanya kupota bingidilwa bya busendwe bya kutwela nabyo pa Entelenete.

 Pa mwanda wa kipupo kya COVID-19, kupwila kwetu kwadi kupityijibwa kala ku televijo ne ku ladiyo. a Batutu baendele’ko kukalomba kitatyi kyobabwanya kupityija’ko kitango.

 Mu Malawi, banabetu batenwe na makambakano. Divule dine bantu ba ku mashene bapānanga nsá umo. Mashene alangalañanga’mba mpangiko milampe bininge ibwanya kupungija bantu bakomenwa kwiilonda. Ino batutu bebashintulwidile amba mwingilo wetu ukwashanga bantu. Nansha ke mu kitatyi kya kuleka kutaluka ku mobo, tusapwilanga bantu myanda miyampe ya mu Bible ibasenga, mine ikokeja kwibakwasha bekale bana ba kibundi bayampe ne na būmi bwa kisaka bwa nsangaji. Kino kyebakulupije, betupa ne mansá a ntentekelo.

 Mu Malawi, kitango kyalondelwe ku shene imo ya televijo ne antene imo ya ladiyo, ano mashene alondwanga mu yabo ntanda yonso, kadi bantu bavule babwanya kwialonda. Mu Mozambike, kitango kyalondelwe ku shene imo ya televijo ne maantene 85 a ladiyo.

 Mu ano matanda onso abidi, twalupwile madolala 28 227 b mwanda wa kitango kilondwe ku televijo ne kintu kya madolala 20 000 mwanda wa kupityija’kyo ku ladiyo. Ku antene imo mityetye ya ladiyo bavudile kulomba madolala 15, ne madolala 2 777 ku antene mikatampe ya ntanda.

 Banabetu balongele bukomo bwa kwingidija biyampe lupeto lwa byabuntu. Kimfwa mu Malawi, balongele bukomo bwa kusokola mashene aitabije lupeto lutyetye. Kulonga namino kwalengeje baleye’ko lupeto lwa madolala 1 711. Mu Mozambike, maantene amo a ladiyo aitabije kutyepeja bei mwanda tunenenwanga māya amba twi bantu bampikwa budimbidimbi kadi bafuta lupeto pa kitatyi.

 Banabetu bafwijije’ko bininge pa kumona ne kwivwana kitango ku mashene a mu kyabo kibundi. Patrick, mukulumpe umo wa mu Malawi, wanenene amba: “Tubafwija’ko Kitango Kyendeji pa byonso byobetulongela mu kino kitatyi kya kipupo.” Isaac, wa mu Malawi, nandi wanenene amba: “Ketudipo na bya busendwe bikwabo, o mwanda tufwija’ko bininge pa mpangiko ya pa bula yakwete bulongolodi bwa Yehova mwanda wa tulonde kitango ku ladiyo. Pa mwanda wa ino mpangiko, kisaka kyami kyonso kyamwenine bininge mu kino kitango. Twamwene amba buno i bukamoni bulombola’mba Yehova usenswe bantu bandi.”

 Kitango kya mu 2020 kyadi kitango kibajinji kyatenwe’ko musapudi umo wa mu Mozambike. Unena’mba: “Mpangiko ya kulonda kitango ku televijo yamvulwije amba Yehova i Leza mwine bukomo bonso. Kipupo kekyamulengejepo aleke kwitupa byakudya bya ku mushipiditu, ne kadi wampele’byo enka mu kyami kyumba. Kondi, i kilomboji kilombola’mba bantu ba Yehova besenswe abo bene na bene. Nkulupile amba kino i kipwilo kya bine.”

 Mukulumpe umo witwa bu Wyson unena’mba: “Nafwija’ko umpika mukōkele pa muswelo wavuija bisakibwa byetu mu kino kitatyi kya kipupo. Ino mpangiko ya kulondela kitango ku ladiyo ne ku televijo itukwashanga batwe bavule badi na makambakano a lupeto bashikete mu kino kipindi kilanda kya ntanda, amba netu betutumine kitango kyotumwena’mo.”

 Pa mwanda wa kitango kya mu 2021, makomite abidi, wa bakwatakani ne wa Bufundiji baitabije mu muswelo wa pa bula amba kitango kilondwe ku televijo ne ku ladiyo mu bibundi bimobimo. Le lupeto lulupulwanga pa kupityija bitango uno muswelo, lutambanga kwepi? I kupityila ku byabuntu bya mwingilo wa ntanda yonso, bivule bine bitūlwanga mu donate.dan124.com. Mwafwai’ko pa byabuntu byenu.