Kiteba kya Mulami kya difuku 1 Kweji 6, 1912, kyanenene amba: “Mobimwekela bantu bavule batañanga mabuku etu beyukile na bampofu. Kebabwanyapo kusokola myanda ya kutanga ku bitupu . . . Dino dibuku i dilembwe na masomo abwanya kutanga bampofu.” Kino Kiteba kya Mulami kyabwejeje’ko amba: “Bampofu bavule bafwijanga’ko pa musapu wa amba, kudi madyese a kutendelwa ebatengele mu ntanda īya’ko.”

 Kitatyi kyalembelwe bino bishima, mu matanda mavule mwisambwa Angele mwadi milembelo mishileshile ya bilembwa bya bampofu. Inoko Batumoni ba Yehova badi kala balupula bubine bwa mu Bible mu bilembwa bya bampofu. Kadi tukibilupulanga! Pano tudi na mabuku a bilembwa bya bampofu mu ndimi 50 ne kupita. Le alupulwanga namani?

 Kintu kibajinji kiloñwanga pa kulupula bilembwa bya bampofu i kushinta bilembwa mu masomo a bampofu. Michael Millen, tutu wingila ku Mwingilo Utala Myanda ya Bilembwa mu Patterson, New York, ushintulula’mba, “pa kala twadi twingidija mpangiko ya bantu bakwabo ya bilembwa bya bampofu, ino kebyadipo byendeka mu ndimi yonso yotwadi tusakilwa. Pano twingidijanga mpangiko ya Watchtower Translation System (WTS) ikwasha mwa kulembela bilembwa bya bampofu mu ndimi mivule idi pano pa ntanda. Mona’mba kekudipo mpangiko mikwabo idingakene nayo.”

 Mu bitabo bya bilembwa bya bampofu, kemudipo’nka bilembwa, ino mudi ne shintulwilo ya bifwatulo. Kimfwa, kifwatulo kidi pa kibalu kya dibuku Ikala Mūmi Nyeke! dya mu bilembwa bya bampofu i kishintululwe namino amba: “Muntu washilula kwenda mu kashinda kayampe kadi na munamuna miyampe, mityi, mikuna ne ngulu kufulakufula.” Jamshed, mpofu mwingidi wa mingilo kadi pania unena’mba, “nshintulwilo ya kino kifwatulo isangajanga bininge.”

 Shi abapu kutentula, bilembwa bitumwanga ku mabilo a misambo alupula mabuku mu bilembwa bya bampofu. Ku ino misambo, balembanga’ko mu bilembwa bya bampofu pa mapapye eja, keabwanyapo kutubukatubuka pobalemba’po masomo a bampofu nansha koneka shi abaingidijibwa bininge. Kupwa ano mapapye akongakanibwanga pamo, alamikwa, kupwa atumwa pamo na mabuku atuminwanga bipwilo, nansha kutumina’o ku poshita shi idi’ko bu “bintu bya ku bitupu bya bampofu.” Shi i byendele’mo, misambo ikatūla’ko enka ne mpangiko ya kwiatuma bukidibukidi mwanda wa banabetu bampofu nansha bakolelwa kumona, bekale na mabuku obasakilwa a kukapwila nao.

 Uno mwingilo onso ulomba kitatyi ne lupeto luvule. Inoko kitampilo kyetu kya ku Wallkill, mu New York, kilupulanga Mabible 50 000 mu mansá amo onka na aloñwanga pa kulemba Mabible 2 kete mu bilembwa bya bampofu. Mudi mavolime 25 mu ano Mabible abidi a bilembwa bya bampofu, kadi bintu bisakibwa pa kulupula ano mavolime i bitabuke byobya bisakibwa pa kulupula Bible misunsa 123. a Enka’tu bibalu bya dibuku dimo dya mavolime 25 bilombanga kintu kya madolala 150!

 Le boba bakwasha’ko pa kulupula mabuku a bilembwa bya bampofu beivwananga namani pa mwingilo wabo? Nadia, wingilanga ku musambo wa Afrika wa Kunshi unena’mba: “Būmi bwa batutu ne bakaka bampofu nansha bakolelwa kumona i bukomo, o mwanda mwene amba kulupula kintu kya kwibakwasha i dyese dikatampe. I bukamoni bulombola’mba Yehova wibasenswe bininge.”

 Ino le bikekala namani shi mpofu kabwanyapo kutanga bilembwa bya bampofu? Ke padi’tu myaka mityetye, twalupwile dibuku Wifunde Kutanga Bilembwa bya Bampofu, dibuku didi na bilembwa bya bampofu ne masomo malembe. I dilupulwe mwanda wa kwingidijibwa na bantu bamona pamo ne bampofu. Mu uno boloshile mudi bingidilwa bibwanya kwingidija mpofu mwanda wa kulemba mu bilembwa bya bampofu. Boba befunda bilembwa bya bampofu bengidijanga bino bingidilwa mwa kulembela abo bene disomo ne disomo dya bilembwa bya bampofu. Kuno kwiibidija kulemba bino bilembwa kukwashanga yewa wifunda avuluke disomo ne disomo, kadi ediyuke kitatyi kyaeditenga.

 Le ano mabuku akwashanga namani batutu ne bakaka bampofu ne bakolelwa kumona? Ernst ushikatanga mu Haiti, wadi na kibidiji kya kutanwa ku kupwila, inoko kadipo na dibuku nansha dimo dya bilembwa bya bampofu. O mwanda wādi unenwe kukwatyila ku mutwe bya kunena shi udi na kipindi ne shi usaka kulondolola ku kupwila kwa bipangujo ne malondololo. Unena’mba, “inoko pano mbwanya kwela kuboko mūlu ne kulondolola kitatyi kyo-kyonso. Bine, pano nemwene bu ngidi mu bumo na batutu ne bakaka. Batwe bonso tutambulanga byakudya bimo byonka bya ku mushipiditu!”

 Jan i mukulumpe wa mu Ostrali, kamonengapo biyampe ino wendejanga Kiteba kya Mulami ne Kifundwa kya Bible kya Kipwilo. Unena’mba: “Mabuku etu a bampofu apēlanga kwivwana kutabuka mabuku makwabo onkendi mutange. Kimfwa, mapaje adi na manimelo, kunshi kwa dyani kupēla kusokola, kadi mudi nshintulwilo miluji ya bifwatulo.”

 Seon-ok, pania umo wa mu Korea wa Kunshi, i mpofu kadi kamama. Pa kala, badi bamukwasha ku kupwila na kumukwata ku makasa ne kumushintulwila mu ludimi lwa batumama, inoko pano ubwanya kutanga aye mwine bingidilwa bya kwifunda nabyo Bible bya bilembwa bya bampofu. Unena’mba, “mabuku makwabo a bilembwa bya bampofu i makomo kutanga mwanda keadipo na tutonye, milongo i minyengakane, kadi mapapye nao apēla bininge. Ino Batumoni ba Yehova bengidijanga mapapye mayampe ne kutūla tutonye biyampe, kintu kine kinengeja mpēlelwe kutanga.” Ubweja’ko amba: “Pa kala nadi mbwanya kwifunda mabuku esambila pa Bible enka na bukwashi bwa bantu bakwabo. Ino pano mbwanya kwifunda ami mwine. Kino i kindetele nsangaji mwanda pano mbwanya kuteakanya kupwila kwa yenga ne yenga, kupityija’ko bipindi ne kulondolola’ko. Tañanga mabuku onso a bilembwa bya bampofu. Ubwanya kunena’mba ne ‘mwiasanswe’ bininge.”

 Pamo bwa mabuku etu matampe, mu mabuku etu a bilembwa bya bampofu mudi bino binenwa: “Kino kintu ke kya kupotejapo. Kulupulwa kwakyo kubadilwa mu mingilo ya kufundija bantu Bible kujokoloka ntanda yonso, ikwatakanibwanga na byabuntu bya kwilanga. Tukulomba utūle bino byabuntu mu miswelo ilombwelwe mu donate.dan124.com. Bukwashi bobe bwa ku buntu bukwashanga tulupwile bantu bonso mabuku esambila pa Bible, kubadila’mo ne bampofu ne boba bakolelwa kumona.