KIPINDI KYA BUSATU
Kusanshijibwa—Nansha Shi Tudi “na Mwanda”
“Kaka umo mu kyetu kipwilo waumbepele amba ne mumwibe lupeto. Bavule mu kipwilo pa kwivwana’kyo bashilula kumpepenyenga. Ku mfulo kaka’wa waiya kunombola amba abamusapwila amba nkimwibilepo. Nansha byawaunombele lusa, nkyadipo na mutyima wa kumulekela byonso bya waunongele.”—Linda.
LELO nobe wimonanga pamo bwa Linda, obasanshije kudi mwanabo mu lwitabijo? I kya bulanda, bavule basanshijibwanga na mwiendelejo wa bakwabo uyuka baleka bibidiji byabo bya ku mushipiditu. Lelo nobe ke bikutane?
Le Kudi Ubwanya “Kwitusansanya na Buswe bwa Leza”?
Eyo, tukolelwanga pa kulekela mwanetu mu lwitabijo witusanshije. Nansha nabya, bene Kidishitu banenwe kwisanswa. (Yoano 13:34, 35) Shi mwanetu mu lwitabijo wetulubila, bitusansanga ne kwitutyumuna mutyima mpata.—Ñimbo 55:12.
Na bubine, Bible witabije amba kyaba kimo bene Kidishitu babwanya kwikala “na mwanda” wa kutompwela bakwabo. (Kolose 3:13) Ino shi kibetutana, bikalanga bikomo kupwija kino kikoleja. Le kudi kintu kibwanya kwitukwasha? Tala ino misoñanya isatu ya mu Bisonekwa:
Tata wetu wa mūlu uyukile byonso. Yehova umonanga byonso bilongeka, enka ne bukondame botulwa nabo ne masusu alupuka’ko. (Bahebelu 4:13) Ne kadi, Yehova ufītwanga paetumona tususuka. (Isaya 63:9) Kakalekapo nansha dimo ‘byamalwa ne tusua’ nansha kintu kyo-kyonso—nansha ke mwingidi wandi mukwabo—“kwitusansanya na buswe bwa Leza.” (Loma 8:35, 38, 39) Mwene netu tukokeja kulongela monka, kwampikwa kuleka kintu nansha muntu ye-yense epatyike pa bukata bwetu na Yehova?
Kulekela ke kilomo-nyekapo. Potulekela boba betulubila, ketupēlulangapo, ketubingijangapo, ketupūtangapo meso, nansha kutala kilomo-nyeka byobya byobetulonga. Vuluka, Yehova kasangelangapo bubi, ino ulekelanga’bo shi padi bubinga. (Ñimbo 103:12, 13; Habakuka 1:13) Yehova usakanga tumwiule paetusoñanya kulekela bakwetu. Aye “kalamapo kīji nyeke.”—Ñimbo 103:9, DD; Mateo 6:14.
Tumwenanga’mo shi ketulamapo kīji. Namani? Fwatakanya uno mwanda. Ubaboya dibwe, padi dilēma’tu makilo abala-anga, ubedikwata olwele kuboko. Mu kakitatyi katyetye padi kebikakukolelapo. Ino bikekala namani shi ubaendelela kashā ōlola kuboko? Lelo ubwanya kwikōlola mu bula bwa bitatyi binga—le i maminite’ni? i nsá’ni? i mafuku? Ne kutatana kwine mpika, kuboko kusa kukoya! Na bubine bulēmi bwa dibwe kebushintyilepo. Inoko kitatyi kyoija kashā widikwete kyo kyalengeja dibwe dilēme. Ne kulama kīji nako mo monka. Potwendelela kwija na kīji—nansha i kityetye namani—twendelelanga na kwisanshija batwe bene. O mwanda ke kya kutulumukapo shi Yehova witukankamika tuleke kulama kīji. I bine, kuleka kwikilama i kwa kamweno kotudi.—Nkindi 11:17.
Tumwenanga’mo shi ketulamapo kīji
“Neivwene bwa Yehova Wisamba Nami”
Le i kika kyakweshe Linda aleke kulama kīji nansha byamusanshije mwanabo mu lwitabijo? Kimo bidi i kulangulukila pa bubinga bwa mu Bisonekwa bwa kwilekela. (Ñimbo 130:3, 4) Kintu kyakunkile Linda mutyima i kuyuka amba Yehova uketulekela shi netu tulekelanga bakwetu. (Efisesa 4:32–5:2) Pa kulombola mwaeivwanine pa kino, unena’mba: “Neivwene bwa Yehova wisamba nami.”
Mafuku’po, Linda kīji kyamupwa. Walekele kaka’wa na mutyima tō, ne panenwa pano kaka’wa i mulunda nandi wa pa mutyima. Linda wendelelanga kwingidila Yehova. Nobe kulupila’mba Yehova ukakukwasha ulonge uno muswelo.
