Rosie unena’mba, “Nadi nzumbijanga mutyima bininge pa makambakano kupita ne pa moadi ekadile.” Le i bisonekwa’ka bya mu Bible byamukweshe? Kimo bidi i kya Mateo 6:34, kine kinena’mba: “Kemwakikambakanyai mityima nansha dimo mwanda wa dya kesha, ke-pantu dya kesha dikekala na makambakano adyo. Difuku ne difuku didi na bibi byadyo.” Pano Rosie unena’mba bino binenwa bya Yesu byamukweshe aleke kukambakanya mutyima pa bikamufikila dya kesha. Ubweja’ko amba, “Pano ntanwanga na makambakano’nka na onadi ntanwa nao, inoko nkikizumbijangapo mutyima bipitepite pa myanda keyafikile ne kadi padi keibwanyapo ne kufika kwine.”

Yasmine nandi walēmenenwe bininge na kuzumbija mutyima. Unena’mba “Mu yenga ne yenga nadi ndila’mo nansha mafuku abidi, kadi kyaba kimo enka ne tulo twa bufuku twadi tumpwa. Milangwe mibi yaundemenene bininge.” Lelo i kisonekwa’ka kyamukweshe? Utela 1 Petelo 5:7, mwine unena’mba: Elai “makambakano enu onso [kudi Leza], mwanda aye wimutele mutyima.” Yasmine unena’mba: “Mu bula bwa kitatyi, nadi ñendelela’nka na kulomba Yehova, kadi nandi walondolwele milombelo yami. Neivwene’nka na muntu wauntalula kiselwa kilema pa mutwe. Kyaba ne kyaba milangwe mibi yadi injokela mu ñeni, inoko pano ne muyuke mwa kwiinekenenya.”

Isabella, nsongwakaji unena’mba: “Mona’mba kutundululatundulula bintu i bya kwipyana, mwanda ye mwadi mwikadile ne tata. Nadi ngivwana mukose wa kulonga bintu bya mvubu​—mwanda’tu wa kwiolola nansha kutala televijo. I kibidiji kibi, mwanda kiletanga njia ne kulengeja muntu ekale muzoze ku kaji.” Musoñanya wamukweshe i owa utanwa mu 2 Temote 2:15, mwine unena’mba: “Longa bukomo bobe bonso wilombole bu muntu mwitabijibwe kudi Leza, mwingidi wampikwa kyafwila bumvu.” Isabella unena’mba, “Nkyadipo nsaka Yehova afwijibwe bumvu pa mwingilo wami pa mwanda’tu wa kyami kinkosela.” Bine Isabella washintyile bininge.

Mo monka ne Kelsey, nsongwakaji unena’mba: “Shi ngidi na bintu bya kulonga, nadi nebilonga’nka kitatyi ke kyende. Nadi ndila, nkomenwa kulāla, ne kuzumbija mutyima. Byadi bindetela njia.” Kelsey wakwashibwe na kisonekwa kya Nkindi 13:16, kine kinena’mba: “Muntu ense mudyumuke ulonga ne kuyukidija: Ino kivila kisambakanya bulembakane.” Aye pa kulangulukila pa kino kisonekwa, ushintulula mokyamukwashishe amba: “I biyampe kutandika bintu kumeso kwa kitatyi, kadi ke biyampepo kwibitundululatundulula. Pano ngidi na kayé monembanga bintu bya kulonga difuku ne difuku, ne kino kinkwashanga nebilonge pa kitatyi, pa kyaba kya kwibilonga kitatyi ke kyende.”

Kirsten, unena’mba, “Wami mulume waunyemene, waunshiya na bana baná, basatu bana-balume, umo nandi mwana-mukaji.” Le i musoñanya’ka wa mu Bible wamukweshe? I owa utanwa mu Nkindi 17:17, mwine motutanga’mba: “Mulunda usanswanga mafuku onso nyeke, mukimonya-malwa wilombola bu-mwanabo.” Kirsten wadi ulomba bukwashi ku banabetu mu kipwilo. Le bamukweshe muswelo’ka? Unena’mba, “Bano banabetu baunkweshe mu miswelo mivule! Bamo badi bandetela byakudya ne maluba kwami. Misunsa isatu mituntulu banabetu babala-banga betukweshe ami ne bami bana tuvilukile mu njibo mikwabo. Mwanetu umo nandi waunsokwedile kaji. Bine, bano balunda nami kebangelelepo nansha dimo.”

Delphine, utelelwe mu kishinte kibadikile, nandi walwile na ano makambakano a bushiyena. Uvuluka byamutene amba: “Nadi nemona bule pa kumona bantu bakwabo bekele pamo na baswe babo. Nadi mbulwa nsangaji ne kwimona bu ngidi bunka.” Kisonekwa kyamukweshe i kya Ñimbo ya Mitōto 68:6, kine kinena’mba: “Leza ubīkanga wa kasuku mu [njibo].” Ushintulula’mba: “Naivwanije amba uno vese kafunkilangapo pa mobo otwikalanga’mo’a. Ino, nayukile amba Leza witupanga njibo ya ku mushipiditu, mu kifuko mudi mutyima-ntenke, mwine ulengeje bantu basenswe Yehova bekale mu kipwano kya binebine ne kwikala mu bumo. Kadi naivwanije amba pa kufwena bakwetu, mfwaninwe bidi kufwena kudi Yehova. O mwanda Ñimbo ya Mitōto 37:4 yaunkweshe amba: ‘Wisangaje mudi Yehova; nandi ukakupanga bisakasaka mutyima.’”

Ufudija’mba: “Najingulwile amba nsakilwa kulamata bininge Yehova na kusumininwa. Ye muntu muyampe kupita bonso. Kupwa nalembele mulongo wa bintu byombwanya kulonga pamo na bantu bakwabo, ne mu uno muswelo, napwene na balunda basenswe Yehova. Nefundile amba mfwaninwe kuta mutyima ku ngikadila miyampe ya bakwetu ne kwibalekela pa kubulwa kubwaninina kwabo.”

Na bubine, balunda bonso bengidila Leza bakidi bampikwa kubwaninina. Batumoni ba Yehova batanwanga na makambakano’nka na atananga bantu bonso. Inoko byobya byobefunda mu Bible bibatononanga bakwashe bantu bakwabo ponso pobibwanika. Bine, i kya tunangu kupwana na bano bantu. Penepa, le misoñanya ya mu Bible ibwanya ne kwitukwasha tulwe na makambakano makomo kupwija dyalelo, kimfwa misongo ya zenzeka ne bulanda bwa kufwilwa?